A UDC salienta o valor tecnolóxico e social dos seus proxectos recoñecidos por AMTEGA e Trasno

Un dos moitos distintivos posibles de KDE

A UDC vén de obter un recoñecemento por partida dupla, máis polo miúdo dous investigadores que desenvolven o seu labor na institución educativa. Como informamos hai uns días dende Código Cero, o Premio ao Mellor Proxecto Fin de Carreira con Software Libre, convocado este ano pola axencia AMTEGA, foi dar ao investigador vinculado á Universidade da Coruña José Millán Soto, pola seu traballo Soporte de Accesibilidade nas Aplicacións KDE. Segundo nos conta a UDC, ampliando a información que achegamos o outro día, estamos ante un proxecto que ten como obxectivo dotar ao contorno de KDE das capacidades básicas de accesibilidade das que carecía, empregando como referencia os aplicativos Dolphin (xestor de ficheiros), Kmail (xestor de correo) e Kopete (xestor de mensaxería instantánea).
Deste xeito, afianzaríase a posibilidade de que fosen empregadas as ditas capacidades para un amplo colectivo de persoas con diversidades funcionais ou motrices que, polas razóns que sexan (as máis das veces por mor dos estándares excluíntes da industria), non atopan as máis idóneas condicións de uso nas ferramentas informáticas. O traballo de José Millán ten o valor duplo de mellorar ferramentas de uso común e, ademais disto, de favorecer a inclusión dixital a tódolos niveis. De feito, encamíñase directamente a optimizar e reforzar o compoñente de accesibilidade de KDE.
Como lembraremos, o galardón que recibe José Millán ten unha dotación económica de 1.000 euros.
Por outra banda, lembrar tamén que a Asociación Cultural Trasno, colaboradora da iniciativa, outorgou a Mención especial á promoción da lingua galega nas TIC, dotada con 800 euros, a Leandro Regueiro Iglesias da Universidade da Coruña polo proxecto Terminator: aplicativo para a discusión colaborativa de terminoloxía utilizando tecnoloxías Web 2.0 e a infraestrutura de desenvolvemento web Django. Segundo nos pon ao tanto a Universidade da Coruña, trátase dunha aplicación web para a creación colaborativa de terminoloxías e glosarios multilingües que permitan realizar consultas de maneira rápida e sinxela, exportar ao formato estándar para o intercambio de terminoloxía TBX (TermBase eXchange), que pretende cubrir unha das necesidades específicas da comunidade galega de tradutores de software libre pero con utilidade segura para outras comunidades e idiomas. Arestora, engade a UDC, o desenvolvedor está en contacto coa comunidade do proxecto Translate toolkit & Pootle para incluír a súa ferramenta en dita comunidade.
O Premio ao Mellor Proxecto Fin de Carreira con Software Libre, que vai pola súa V edición, foi creado no 2007 pola empresa galega Igalia, tras detectar unha importante carencia de profesionais especializados neste área, informou esta mesma semana a axencia AMTEGA, que decidiu coller este ano a testemuña, por vez primeira, e darlle un novo pulo á convocatoria integrando nel “aos distintos axentes do ecosistema do software libre galego seguindo a mesma estratexia global e integradora transversal a todas as actuacións do seu Plan de Software Libre”, engade a Axencia. Contouse polo tanto co patrocinio da empresa Igalia e da Asociación Cultural Proxecto Trasno, e coa participación e colaboración das tres universidades galegas, de AGASOL, e das asociacións galegas de usuarios de Software Libre GALPon, Ghandalf, GPUL, Melisa e Trasno.