A UDC consegue un importante seguimento na feira virtual das universidades españolas

luns, 1 de marzo do 2021 S. P.

O stand de graos da Universidade da Coruña no salón virtual das universidades españolas UNIferia foi finalmente un éxito de seguimento. En concreto, a UDC recibiu preto de 40.000 visitas, situándose entre os emprazamentos informativos máis concorridos da feira virtual de CRUE Universidades Españolas. No seu stand, a UDC mostrou a oferta de titulacións de grao e permitiu interactuar cos servizos de información e orientación universitarios.
Do rexistro de visitas totais, 25.123 eran usuarios únicos. Con estes datos, a UDC acadou a novena posición de España en concorrencia. O 67% das visitas eran mulleres, preto do 80% das consultas procedían de alumnado de bacharelato, seguido do interese do colectivo de orientadores educativos e de ciclos formativos de grao superior.
A maioría dos accesos procedían de España, pero a UDC espertou o interese tamén de usuarios de Estados Unidos, Perú, Colombia, Ecuador, México, Francia, Finlandia, Italia ou Países Baixos. Ao abeiro do territorio estatal, foron numerosas as consultas de Madrid, Sevilla, Barcelona, Mérida, Valencia, Oviedo, Málaga ou Valladolid.
Por certo que logo deste salón virtual de titulacións de grao, a partir deste martes 2 de marzo comezará a feira de mestrados ata o 4 de marzo, coa que as universidades españolas darán a coñecer os títulos oficiais de mestrado (master) que se impartirán o vindeiro curso. A listaxe de alternativas está dispoñíbel na Rede a través da web de estudos da UDC.

PUBLICIDADE