A UDC activa un curso de posgrao sobre protección de datos
mércores, 13 de febreiro do 2019
A
Universidade da Coruña vai completar a súa oferta formativa con
capacitación específica e pormenorizada sobre salvagarda da
información e a privacidade ao abeiro das novas tecnoloxías. Así o
deu a coñecer hoxe a UDC, que xuntou forzas co Colexio de Avogados
(ICACOR), a Deputación da Coruña, a Asociación Española de
Compliance (ASCOM), e a empresa Telefónica para pór en marcha o que
sería, en palabras da Universidade, o
primeiro programa de formación de posgrao sobre compliance e
protección de datos. A iniciativa fornecerá ao alumnado“dunha
formación de calidade orientada cara o emprego”, amais dun título
universitario propio de experta ou experto nas ditas materias.
O
curso de especialización, que será presentado este 15 de febreiro
nos seus detalles (na sede de ICACOR e da man da vicerreitora de
Oferta Académica e Innovación Docente, Nancy Vázquez Veiga),
responde a unha situación ben concreta que achega unha serie de
desafíos que debemos ter en conta: a situación xerada logo da
recente entrada en vigor do Regulamento Xeral de Protección de
Datos, que, entre outras cousas, obríganos (a persoas, empresas,
entidades, organizacións) a ser moito máis exhaustivos e rigorosos
na correcta xestión e protección da información persoal. Como
consecuencia disto, lembra a UDC, creouse unha elevada demanda de
profesionais expertos na dita temática, tanto por parte da empresa
privada como polas distintas administracións públicas.
Este
curso de posgrao iniciarase o 1 de marzo; a matrícula estará aberta
ata o 22 de febreiro; e rematará o 21 de xuño. A docencia e os
diversos obradoiros e seminarios impartiranse os venres pola tarde na
Facultade de Dereito e os sábados pola mañá na sede de ICACOR. A
Deputación da Coruña ofrecerá bolsas para os gastos de matrícula
e das prácticas.