A Persoa do Ano segundo a revista Time: TI

luns, 18 de decembro do 2006 Marcus Fernández

Ó remate de cada ano a revista Time elixe tradicionalmente a un personaxe representativo que marca o momento histórico que se está a vivir baixo o título do Home do Ano (actualmente a Persoa do Ano) e que destacou a personaxes coma Bill Gates, George W. Bush, Bill Clinton, Rudolph Giuliani, Jeff Bezos, Xoán Paulo II, Mikhail Gorbachev ou Gandhi, aínda que en ocasións especiais non foi unha persoa a que se fixo coa mención anual, senón que en momentos especiais se decidiu destacar incluso a obxectos (o ordenador, en 1982, co que se anticiparon ó que sería toda unha revolución) ou a colectivos (os soldados norteamericanos na guerra de Corea, a un grupo de científicos norteamericanos, á xente nova, á clase media ou mesmo cos chivatos que destaparon os escándalos financeiros de Enron, Worldcom e o FBI).

Portada da revista Time

Este ano seguen nesta última liña, e decidiron considerar que a persoa do ano é o cidadán, pois sosteñen que o novo xeito de ver á Rede coma un elemento cooperativo está a dar protagonismo ó público, de xeito que éxitos coma YouTube, MySpace ou a Wikipedia marcan a importancia do que antes eran clases pasivas e que agora atopan na Internet cunha canle de comunicación sen precedentes.
Así, a revista Time sostén que a persoa do ano es “ti e engade “Si, ti. Ti controlas a Era da Información. Benvido ó teu mundo”. Consideran así que o momento que vivimos non destaca pola prominencia dalgunha persoa relevante, senón que é o conxunto da xente o que está a dar forma ó noso destino colectivo coma especie.
Resulta bastante gratificante que os distintos conflitos bélicos por todo o mundo non eclipsasen á web colaborativa que tanto marcou os últimos meses, e que o momento que se está a producir na Internet reciba un recoñecemento tal como o que vén de outorgar a revista Time.
De tódolos xeitos dende Time tamén buscan ver a Web 2.0 cunha óptica crítica, xa que as mesmas ferramentas que debullan a sabedoría colectiva tamén fan o propio con todo o malo que hai nas persoas, aínda que o momento actual tamén se pode ver coma un enorme experimento que, aínda que poida fracasar, resulta moi interesante, de aí que mereza o seu lugar na publicación norteamericana.

PUBLICIDADE