A OCU sae en defensa de BlaBlaCar é di que é legal e non fai competencia desleal
mércores, 30 de setembro do 2015
A Organización de
Consumidores e Usuarios (OCU) vén de saír en defensa do servizo
BlaBlaCar.es, como lembraremos
plataforma en liña centrada en facilitarnos viaxes en vehículos
compartidos. Ou sexa, centrada en permitirnos rendibilizar
desprazamentos compartindo coches e aforrando en combustíbel,
traballo e emisión de CO2. BlaBlaCar, servizo
do que falamos hai uns días para dar conta do uso que lle damos os
galegos (un uso crecente), está no
punto de mira dos colectivos de transportistas por consideralo
competencia desleal (sinalan que BlaBlaCar fai negocio
funcionando como rede social que une xente para viaxar, e engaden que
isto en ultima instancia lles correspondería a eles: taxistas e
compañías de buses). Agora, a OCU sae en defensa da comunidade de
viaxeiros dicindo que non só cumpre coa Lei senón que non fai
competencia desleal.
Isto sae a conto pola
recente demanda contra BlaBlaCar feita pola patronal de autobuses,
CONFEBUS. Porén, na Organización de Consumidores e Usuarios teñen
claro “que esas acusacións non teñen xustificación algunha”,
comezando pola acusación feita por CONFEBUS sobre a falta de licenza
dos condutores unidos en BlaBlaCar para facer “unha actividade
profesional de transporte”. A OCU opina a este respecto que a
patronal “non comprende o alcance do consumo colaborativo”, un
tipo de consumo que inclúe “un novo xeito de comunicármonos” e
que pon en contacto a cidadáns co obxectivo común de compartir un
traxecto: “Uns teñen coche, outro non, e todos acordan o punto de
orixe, destino, a hora de saída... Pero BlaBlaCar non conta con
vehículos propios nin contrata a condutores nin pode ser considerada
como intermediario segundo o establecido pola Lei de Ordenación do
Transporte Terrestre”, explica a OCU, que engade que BlaBlaCar de
maneira notoria non ten arela de lucro, nin tampouco os usuarios. “O
único que fan”, di, “é compartir gastos de viaxe, cousa que
está permitido facer segundo a Lei de Ordenación do Transporte
Terrestre, artigo 101.
Para profundar nestes
puntos, a OCU realizou un estudo sobre mobilidade alternativa que se
publicará en novembro e que certifica, nas súas palabras, até que
punto resultaría imposíbel enriquecernos como condutores a través
da rede social demandada: “Para cubrir a gasolina, as hipotéticas
peaxes, o desgaste dos pneumáticos, a depreciación do coche, o
seguro, os impostos... faría falta que o condutor levase case 6
pasaxeiros, só a partir de aí empezaría a gañar diñeiro”,
explica a OCU.