A Fundación TIC emitirá novamente en liña o Concurso Lucus Intercentros
martes, 25 de abril do 2017
A
Fundación TIC da Deputación de Lugo vén de anunciar que emitirá a
través da Rede e en directo, en streaming,
a sexta edición do Concurso Lucus Intercentros que se celebra este
xoves, día 27 de abril, no IES Muralla Romana. A cobertura da
Fundación TIC realizarase por cuarto ano consecutivo e nela
participarán novamente alumnos, bolseiros e profesionais da entidade
da Deputación de Lugo. A retransmisión en liña desta competición
entre institutos poderase seguir a tempo real a través dun banner
que se habilitará na web da
TIC e do IES
Muralla Romana.
Para
fornecer a mellor e máis completa cobertura, a Fundación habilitará
catro cámaras que ofrecerán “en detalle” a evolución da
competición. Nela, para quen non o saiba, participan estudantes de
primeiro curso de Bacharelato dos sete institutos de Educación
Secundaria que hai na cidade de Lugo. Os traballos da Fundación TIC
permitirán que o alumnado destes sete centros poida facer seguimento
dende as súas aulas da actividade dos seus compañeiros presentes no
certame. Ademais, aqueles estudantes que non se conecten na xornada
do 27 de abril teñan a posibilidade de ver o concurso en diferido a
través da canle en YouTube da Fundación TIC.
O
certame é unha das prácticas do currículo de Asistencia á
Dirección na organización de eventos e actos públicos, do Muralla
Romana. Da súa organización ocuparanse alumnos de Administración e
Xestión, coa colaboración do departamento de Informática, do CIFP
Politécnico de Lugo, da Escola de Arte e Superior de Deseño Ramón
Falcón e da Escola de Imaxe e Son de Lugo, EIS.
O
Lucus Intercentros busca relacionar a través dunha xornada lúdica
aos alumnos e profesores dos institutos de educación secundaria
públicos de Lugo. Estes son: Anxel Fole, Leiras Pulpeiro, Lucus
Augusti, Muralla Romana, Nosa Señora dos Ollos Grandes, Sanxillao e
Xoán Montes.
A
colaboración da Fundación TIC nesta iniciativa é froito dun
convenio asinado co IES Muralla Romana para promover as ensinanzas
que se imparten no instituto lugués e, tamén, para completar a
formación dos estudantes cara a súa inserción laboral.