A Fundación TIC comeza a súa integración coa Deputación de Lugo
xoves, 18 de agosto do 2016
A Deputación de Lugo vén de pór en marcha o proceso
para integrar no seu seo a Fundación
TIC. Así o fixeron saber onte o vicepresidente do organismo
provincial, Álvaro Santos, e o deputado de Goberno Interior, Miguel
Ángel Soutela, ámbolos dous patróns da Fundación. O anuncio da
integración foi dado a coñecer durante unha xuntanza cos
traballadores da entidade destinada a informalos da posta en marcha
do proceso. Álvaro Santos afirmou que “esta decisión do equipo de
Goberno é froito da política de transparencia iniciada pola
Deputación coa disolución do Inludes e da Fundación Tor”.
O vicepresidente engadiu perante o persoal da Fundación
que o proceso abrolla directamente do compromiso da Deputación a
prol “duns servizos públicos xestionados directamente pola
administración”
Miguel Ángel Sotuela dixo que “coa integración da
TIC na Deputación eliminaranse duplicidades administrativas,
optimizaranse recursos e reducirase o gasto corrente”. Ademais,
avanzou que “se manterá a finalidade da entidade, coa promoción
do uso das novas tecnoloxías na nosa provincia, a cooperación cos
Concellos e o apoio ao tecido asociativo”.
A Fundación TIC
A Fundación para o Desenvolvemento das Tecnoloxías da
Información e a Comunicación (TIC) é unha entidade sen ánimo de
lucro promovida pola Deputación e sobre a que exerce o protectorado
a Consellería de Educación. Ten como obxectivo prioritario promover
e levar a cabo actividades dirixidas ao fomento da educación, a
investigación e o desenvolvemento das TIC, así como o impulso e
consolidación da denominada Sociedade do Coñecemento ou Sociedade
da Información, de maneira “que se contribúa a mellorar a
formación relativa a estas tecnoloxías na provincia de Lugo”.
Para desenvolver as súas actividades a entidade lucense
ten subscritos convenios con medios de comunicación social,
institucións, empresas e organismos do sector audiovisual dirixidos
á promoción e consecución dos seus obxectivos. Asemade, conta con
recursos propios como a Escola de Imaxe e Son, o Centro de Produción
de Programas ou a Lugo Film Commission.