A Factoría de Innovación da Coruña forneceu divulgación a máis de 1.300 empresas e profesionais

A Factoría de Innovación da Coruña fixo reconto da súa actividade en materia de formación e divulgación dirixida aos nosos profesionais e ás nosas empresas, principalmente PEME de todos os sectores. En total, participaron nas súas accións ata 1.300 firmas e profesionais, beneficiándose de case 6.000 horas de asesoramento personalizado. Por liñas temáticas, afondouse nas ferramentas chave para o lanzamento de produtos innovadores, na incorporación das compañías á contorna dixital ou na saída a novos mercados internacionais. Máis polo miúdo, houbo actividades e obradoiros (case un centenar) sobre novas tecnoloxías, mercadotecnia en liña, comercio electrónico, novos modelos de financiamento ou comunicación.
Estas cifras e datos foron dados a coñecer durante a celebración, no Pazo de Mariñán de Bergondo, da Xornada Anual desta iniciativa promovida pola Escola de Organización Industrial (EOI) e a Deputación da Coruña, e cofinanciada polo Fondo Europeo de Desenvolvemento Rexional (FEDER) e o Ministerio de Industria, Enerxía e Turismo.
Segundo se fixo saber na xuntanza, durante os vindeiros meses, a factoría porá en marcha un novo programa de asesoramento para 40 empresas da provincia e celebrará diversas actividades como conferencias, encontros sectoriais ou demostracións, dirixidas a todas aquelas persoas interesadas en coñecer mecanismos para deseñar e levar a cabo iniciativas innovadoras.