A Estratexia Educación Dixital 2030 achegará un investimento inicial de 120 millóns

A Xunta deu este 2 de setembro detalles relevantes sobre a Estratexia de Educación Dixital 2030. O encargado de debullar este plan foi o presidente do Goberno galego, Alberto Núñez Feijóo, quen fixo saber que vén cun investimento inicial de 120 millóns de euros para os primeiros tres anos de aplicación, con vistas a “acadar un ecosistema de alto rendemento” e conseguir “a transformación definitiva das aulas”.
Dixo tamén que se apoia en dous alicerces fundamentais: en primeiro lugar un ecosistema educativo dixital de alto rendemento; e, segundo lugar, o perfeccionamento das competencias e capacidades necesarias para acadar unha verdadeira transformación dixital. En base a isto, porase o foco nun proceso dixitalizador inclusivo, que “non deixe a ninguén fóra”, e máis nun tipo de educación que potencie os contextos híbridos de aprendizaxe, mesturando o dixital e o presencial. Tamén se fará fincapé en emendar o problema da fenda dixital e en loitar contra o despoboamento do rural a través deste proceso transformador.
Feijóo avanzou que a primeira das actuacións terá que ver coa creación, o acondicionamento e a dotación de polos creativos en todos os centros educativos públicos de Galicia. “Estamos a falar de espazos de solución de problemas reais, pensamento de deseño e habilidades, abordados dende unha perspectiva de competencia STEM“, precisou.
Outras das medidas serán a posta en marcha dunha plataforma de asistencia ao profesorado mediante a aplicación de Intelixencia Artificial, así como á creación dunha Aula Virtual Intelixente, que permitirá afondar na recomendación de actividades, tarefas e itinerarios personalizados.