A ETSE da USC, DXC e Obradoiro CAB revolucionan o baloncesto cun software de analítica avanzada
luns, 26 de xullo do 2021
A
Escola
Técnica Superior de Enxeñaría (ETSE) da USC compartiu detalles dun
software creado polo alumnado do Grao en Enxeñaría Informática
para facilitar a análise e a preparación de partidos de baloncesto,
e tamén para o perfilado estatístico de posíbeis incorporacións
de xogadores. A ferramenta está a ser empregada na actividade cotiá
do Obradoiro CAB, facendo cálculos estatísticos e visualizacións
avanzadas sobre distintos aspectos do xogo. O club Monbus Obradoiro
emprégao dentro dos seus procesos de preparación de partidos e
análise de deportistas e estratexias.
A
máis recente versión deste software, que comezou a materializarse
hai agora catro anos, foi dada a coñecer recentemente polo
desenvolvedor Diego Coladas, quen deseñou novas funcionalidades
orientadas a extraer e analizar o tempo de posesión, cruzar esta
información coas distintas accións do xogo (tiros, faltas,
asistencias, ...) e facer visualizacións das mesmas. Estas
aplicacións achegan datos de valor para a toma de decisións nun
partido, xa que inciden en aspectos concretos que poden axudar a unha
mellor organización da táctica deportiva, aspectos como “coñecer
cantos segundos de posesión restan no momento no que sucede cada
acción ou analizar que xogadores funcionan mellor en momentos
importantes do xogo, ou tamén identificar quen posúe un maior
porcentaxe de acerto nos últimos segundos da posesión ou quen
finaliza mellor e en que lugares da pista”, explicou o profesor
David D. Losada.
A
orixe
A
creación desta ferramenta remóntase a 2017 como unha colaboración
entre a Escola Técnica Superior de Enxeñaría (ETSE) da USC, DXC
Technologies e a área de analítica de datos do Obradoiro CAB
orientada ao deseño e desenvolvemento de software de apoio aos
procesos de scouting no baloncesto profesional. Fran Camba,
analista de datos para o Obradoiro CAB, é o principal promotor deste
proxecto colaborativo no que por parte da ETSE participa David E.
Losada, profesor da área de Ciencia da Computación e Intelixencia
Artificial e investigador adscrito ao CiTIUS) e, por parte de DXC
Technology, participa Adolfo Sanz.
A
última achega de Diego Coladas Mato, súmase ás de Manuel González
López, Lucas Souto Rendo e Pablo Martínez Rodríguez, quen
orientaron o seu Traballo Fin de Grao cara esta temática. Entre as
funcionalidades do software proposto atópanse a captura de datos
procedentes de múltiples ligas profesionais, a análise e extracción
de información procedente das secuencias play by play e a
visualización avanzada da carta de tiro (lugares da cancha onde os
xogadores tenden a acertar/fallar os seus lanzamentos).
Esta
liña de colaboración entre ETSE, DXC Technology e Monbus Obradoiro
continuará no próximo curso coa proposta de novas ampliacións.