A ETSE (Santiago) e a EPSE (Lugo) acollerán en xuño e xullo un campus tecnolóxico para a rapazada

A primeira edición do Campus Tecnolóxico celebrarase na Escola Técnica Superior de Enxeñaría (ETSE) do Campus de Santiago de Compostela e na Escola Politécnica Superior de Enxeñaría (EPSE) do Campus de Lugo durante as semanas do 26 ao 30 de xuño e do 3 ao 7 de xullo. Esta iniciativa pretende “promover o desenvolvemento na cativada de habilidades relacionadas coa linguaxe da programación e as novas tecnoloxías”, en palabras da USC.
Dirixido a nenos/as e mozos/as de entre 6 e 16 anos, contará con obradoiros de drons, domótica, IoT (Internet of Things) con Micro:Bit, obradoiros de robótica con LEGO, Edison e Arduino, de programación de aplicacións móbiles e desenvolvemento de videoxogos ou fabricación dixital con impresoras 3D.
Baixo o lema STEM camp misión a Marte, esta primeira edición formulará unha viaxe ficticia ao planeta vermello. “Todos xuntos descubriremos que a Terra axiña non será habitábel e que o planeta vermello podería ser a nosa salvación. Mergullámonos nesta aventura explorando, inventando, construíndo e descubrindo se a vida é posible neste novo fogar”, explican dende a organización que corre a cargo de Play Code Academy.
“Todos os talleres están especialmente pensados para que o alumnado o pase xenial. Adaptados por idades e niveis, descubrirán como utilizar a tecnoloxía para expresarse, construír, colaborar e compartir. Farán novas amizades e aprenderán a linguaxe do futuro: o da programación”, engaden. O horario das actividades desenvolverase de 9.00 a 14.00 horas, de luns a venres, cun receso a media mañá. A inscrición pode formalizarse a través da páxina web do Campus Tecnolóxico ata que se esgoten as prazas ou ata quince días antes do inicio da actividade.