A ESRB critica os contidos do SingStar Latino

luns, 7 de setembro do 2009 Marcus Fernández

O establecemento de organismos dedicados a cualificar os videoxogos segundo a súa idade recomendada deu lugar a moitas polémicas no pasado, principalmente polos contidos violentos, pero a ESRB (panel encargado desta labor nos EE.UU. e en Canadá) sorprendeu cos seus comentarios sobre o SingStar Latino que chegarán pronto á PlayStation 3 (a versión de PS3 leva un par de anos no mercado español).
¿Qué é o que a ESRB critica do xogo de karaoke para a PS3? Pois detalla que algúns vídeos musicais aparecen mulleres con «pantalóns axustados, tops de bikini, tops tipo suxeitador, camisas e vestidos que amosan moito escote» e realizando movementos provocativos («tocándose os peitos e a entreperna, xirando e meando as cadeiras»), ou sexa, algo totalmente normalizado no mundo da música (polo que resulta bastante curioso que se censure nos videoxogos) e incluso advirten que nun dos videoclips aparece unha parella aparentemente espida, bicándose debaixo dunhas sabas.
Pero a cousa non remata aí, senón que a emprenden concretamente contra a letra dun par de cancións, que non son outras que Mi agüita amarilla de Los Toreros Muertos (citando a frase «mi agüita amarilla… moja las calles… y la empiezo a mear») e o Cuando tú vas de Chenoa (dando a entender que incita a manter sexo sen protección ao dicir «y no me hables de sexo seguro»).
En vista destes criterio parece claro que a sensibilidade do público norteamericano é moi diferente ao europeo, pois aquí o lanzamento do SingStar Latino provocou ningún tipo de polémica, e ninguén sentiuse ameazado por cancións moi populares incluso entre os máis cativos da casa (lembremos que Los Toreros Muertos fixéranse famosos no programa de televisión La Bola de Cristal).

PUBLICIDADE