A Deputación de Pontevedra organiza un hackathon en liña para acelerar a dixitalización do terceiro sector
martes, 26 de xaneiro do 2021
A
Deputación
de Pontevedra organiza os vindeiros 13 e 14 de febreiro o evento
#SocialHack, a primeira edición do Hackathon Online de Innovación
Social para o Terceiro Sector. Segundo informa a entidade
provincial, trátase do segundo reto tecnolóxico deste tipo que
promove a institución, a través do programa SmartPEME, tralo
celebrado en 2019, daquela relacionado co sector turístico. Neste
caso, o Hackathon estará vinculado á dixitalización das entidades
sociais do chamado Terceiro Sector. Buscarase estimular o talento e a
creatividade para acelerar este proceso.
Nesta
nova edición do Hackathon, que repartirá 3.500 euros en premios, o
desafío para os equipos participantes, que estarán formados por
grupos multidisciplinares de entre 3 e 5 persoas, consistirá no
desenvolvemento de solucións innovadoras que axuden “a unha mellor
xestión da colaboración entre a comunidade e as entidades do
Terceiro Sector da provincia, así como a mellora e maior eficiencia
na captación de persoas asociadas e fondos por parte destas
entidades”.
Debido
á pandemia, o evento será integramente online, e comezará o
12 de febreiro cun acto de presentación, que será retransmitido por
streaming, e os días 13 e 14 os equipos traballarán a través
de ferramentas de videochamada no desenvolvemento de solucións
tecnolóxicas.
As
inscricións para #SocialHack poden realizarse na
páxina web de SmartPEME e o reto está aberto a persoas de todo
o territorio nacional, estudantes ou profesionais de áreas como
desenvolvemento de aplicacións móbiles, deseño gráfico, Terceiro
Sector ou área de negocio.
Unha
vez que estea pechada esta convocatoria de inscrición, formaranse os
grupos, que traballarán xuntos online durante a devandita fin
de semana no desenvolvemento das solucións tecnolóxicas.
Os
equipos terán o apoio de persoal experto en tecnoloxía e
desenvolvemento de apps (contarase coa colaboración de Minube
como provedor tecnolóxico), para resolver posíbeis dúbidas durante
os dous días do Hackathon. Todas as propostas terán que ser
inclusivas, vinculadas á provincia de Pontevedra e deberán fomentar
a igualdade.
Despois
de dous días de traballo, o xurado valorará a busca de ideas
creativas, o desenvolvemento e deseño, a orixinalidade, a
dificultade técnica, a usabilidade e a presentación. Haberá un
primeiro premio de 2.000 euros, un segundo de 1.000 e un terceiro
premio de 500 euros. O 18 de febreiro terá lugar en formato online
o acto de clausura desta actividade, xunto coa entrega de premios.