A Deputación de Pontevedra converte a Rede CPAE 2.0 nun ambicioso proxecto de capacitación TIC: o proxecto SmartPEME
venres, 1 de xullo do 2016
Este 30 de xuño a
Deputación de Pontevedra presentou o novo paso evolutivo dos centros
da rede CPAE 2.0, o Centro Provincial de Asesoramento
Empresarial, iniciativa constituída por seis centros atendidos por
técnicos especializados en novas tecnoloxías e con sedes en Lalín,
Cambados, Vigo, Pontevedra, Ponteareas e Porriño. Segundo fixo saber
a Deputación, Carmela Silva, “o antigo CPAE 2.0 non estaba a obter
os resultados agardados, polo que decidimos reformulalo, dotalo dos
recursos suficientes e convertelo nun proxecto rigoroso denominado
SmartPEME que permitise mellorar a competitividade do tecido
empresarial da provincia”. A presentación da iniciativa SmartPEME
contou tamén coa presenza do deputado delegado de Innovación e
Promoción Económica, Javier Dios. No acto Silva e Dios explicaron
todo o relativo ás implicacións desta viraxe da iniciativa CPAE 2.0
perante alcaldesas e alcaldes e concelleiras e concelleiros da
provincia de Pontevedra. “SmartPEME”, dixo Silva, “estará ao
servizo dos 62 concellos de Pontevedra para que poidan ofertar
asesoramento as súas PEME e autónomos”.
A presidenta da Deputación, ao fío desta evolución
do CPAE (antes) cara a SmartPEME (agora) subliñou que “xa nos
últimos meses previos ao novo lanzamento fomos reorientando o
proxecto previo, existente, para que se asemellase ó novo enfoque
que lle queríamos dar". Os resultados, segundo Silva, “foron
moi positivos” xa que “con esta nova reformulación multiplicamos
a nosa influencia no tecido empresarial, sumando 594 consultas de 444
empresas atendidas, das cales 271 son novas usuarias do servizo, e
organizando 159 eventos de capacitación TIC coa presenza de 1.094
asistentes”.
O novo proxecto, en palabras de Silva, “consiste
nun novo modelo de servizo orientado á mellora competitiva das PEME
e á procura dunha melloría nas vendas e na eficacia e eficiencia
das tarefas, que abre novos eidos de actuación e acada novos grupos
de interese coma os emprendedores, as asociacións empresariais e os
axentes de dinamización en concellos”. Para os ditos
obxetivos, explicou, nas oficinas de SmartPEME no Porriño, Cambados,
Pontevedra, Lalín, Ponteareas e Vigo poranse en marcha itinerarios
de obradoiros temáticos, con diversos niveis de dificultade
adaptados ás necesidades das empresas; eventos de networking
trimestrais coa participación de profesionais de prestixio;
colaboración con asociacións e promoción de alianzas
institucionais; especialización sectorial dos asesores en función
das necesidades da súa área de influencia; kits de asesoramento en
novas tecnoloxías a emprendedores; identificación e difusión das
necesidades TIC aos provedores de solucións para as PEME e impulso
de novas carteiras de servizos de asesoramento.
Buscarase, tamén, que ao abeiro de SmartPEME a
colaboración cos concellos sexa máis estreita. Deste xeito, o
proxecto ofertarase como un servizo propio dos municipios para que
sexan eles os que presten asesoramento e impulsen ás empresas,
persoas autónomas e emprendedoras da súa área de influencia.
No acto, o deputado provincial Javier Dios fixo
balance da situación actual do sector das PEME e autónomos, que
representa o 93,5% do tecido empresarial da provincia, con 73.500
empresas, e fixo fincapé na importancia de potenciar o
desenvolvemento da provincia a través das TIC.