A Deputación de Lugo impulsará a transformación tecnolóxica do turismo provincial
xoves, 5 de decembro do 2019
O
pleno da
Corporación da Deputación de Lugo aprobou este xoves os seus
Orzamentos para 2020, que teñen unha contía de 92 millos de euros
e que son, en palabras do Goberno que preside José Tomé, “un
exemplo de boa política demográfica, con servizos para a cidadanía
e con medidas para favorecer o emprego sustentábel”. Asemade, son
uns presupostos con importantes partidas para os ámbitos
tecnolóxicos da provincia. Por exemplo os 1,5 millóns de euros que
se destinan ao Centro de Formación do Servizo de Audiovisuais (a
antiga Fundación TIC), o único que ofrece a titulación devandita
no ámbito lucense. Tamén haberá contías relevantes para impulsar
a cooperación cos Concellos (poñendo o foco na eAdministración) e
a modernización de sectores básicos para economía da provincia: o
agrogandeiro e o turístico.
- Sesión do pleno da Deputación na que foron aprobados os Orzamentos para 2020
Polo
que se refire á cooperación cos Concellos, as accións
desenvolveranse principalmente a través do Plan Único, un dos
instrumentos básicos de traballo conxunto cos 67 municipios da
provincia, que contará cunha dotación de algo máis de 20M€,
entre os recursos previstos nos propios orzamentos (de 11,2M€) e a
previsión de incorporación de remanentes. Porase o foco en mellorar
os servizos e infraestruturas públicas; o Servizo de Axuda no Fogar;
a creación de emprego; as actividades turísticas, culturais e
deportivas; a Administración Electrónica e outros servizos como
Protección Civil.
Respecto
dos sectores produtivos, os presupostos impulsarán sobre todo o
sector primario e o turístico. Neste último eido, contémplanse
2,4M€ para incorporar as tecnoloxías ao sector e atraer a máis
visitantes; manter as rutas fluviais en catamarán e a promoción da
provincia en encontros de proxección nacional e internacional; dar
un novo impulso á candidatura da Ribeira Sacra a Patrimonio da
Humanidade; aproveitar o potencial que representa o turismo vinculado
ao Camiño de Santiago sobre todo de cara ao Xacobeo 2021, e integrar
á provincia na Rede Europea de Itinerarios Culturais para fomentar o
turismo.