A Deputación de Lugo facilita co servizo de Licitación Electrónica a actividade das empresas
venres, 9 de novembro do 2018
A
Deputación de Lugo
segue a apostar pola modernización e transformación dixital dos
procedementos administrativos, levando a cabo importantes iniciativas
que neste caso van relacionadas cos expedientes de contratación
pública. Nesta liña sitúase o sistema de Licitación Electrónica
da entidade provincial que preside Darío Campos, que permite a
presentación de propostas e ofertas por medios enteiramente
electrónicos, ampliando desta maneira a transparencia e fomentando a
participación de todo tipo de empresas aos procesos de contratación.
Amais, con este servizo derrúbanse as barreiras que actualmente
poidan supor a distancia ou a dispoñibilidade horaria.
Segundo
explica a entidade provincial, coa posta en marcha da Licitación
Electrónica, calquera empresa que cumpra coas condicións requiridas
e que queira presentarse a un proceso de licitación, poderá achegar
a súa oferta á Deputación de Lugo a través de medios
electrónicos, sen necesidade de presentarse fisicamente á sede da
administración lucense e as 24 horas do día mentres se atope en
prazo de presentación.
A
plataforma de Licitación Electrónica ofrece outras garantías, como
por exemplo as que citamos deseguido:
·
Meirande transparencia no proceso de contratación pública. Toda a
información relativa a un proceso de contratación está publicada
na plataforma e é accesíbel para a súa consulta pública.
·
Maior seguridade. A plataforma de licitación encárgase de custodiar
as propostas e de velar pola súa integridade. Desta maneira, non se
poderá acceder ás ofertas presentadas até que non se constitúa a
mesa de valoración de ofertas. O sistema, ademais, garantirá que
non se modifica o contido da proposta presentada a través da
sinatura electrónica por parte do licitador.
·
Máis dispoñibilidade e acceso, mellorando a concorrencia. O sistema
está aberto a todas as empresas que queiran concorrer a Deputación,
só precisan dispor dun certificado dixital en vigor e de acceso a
Internet para rexistrarse na plataforma e presentar as súas
propostas dentro do prazo que marque cada proceso de licitación. O
sistema estará dispoñíbel as 24 horas do día ata o momento que se
cerre a presentación de propostas.
Un
regulamento a prol do dixital
A
Lei 9/2017, do 8 de novembro, de Contratos do Sector Público
establece a obriga de que a presentación das propostas por parte dos
licitadores nos procedementos de contratación pública se fagan por
medios electrónicos, así como o resto de comunicacións entre a
Administración e o licitador. Segundo fai saber a Deputación de
Lugo, esta Lei reafirma e reforza o que xa se indica na Lei 39/2015
do Procedemento Administrativo Común, regulamento que impulsaba e
establecía os mecanismos para a comunicación e tramitación de
expedientes por medios electrónicos. “Polo tanto coa implantación
do sistema de Licitación Electrónica, non só estamos a modernizar
e mellorar o sistema de contratación da Deputación, senón que
estamos a cumprir coa norma legal vixente en materia de
contratación”, engaden fontes da entidade provincial.
Previamente
á entrada en vigor desta obrigación a Deputación de Lugo xa
realizou importantes medidas encamiñadas á posta en marcha de este
sistema de Licitación Electrónica, entre as que cómpre salientar
as seguintes:
·
No ano 2017 renováronse, actualizáronse e modernizáronse os
sistemas de Administración Electrónica axeitándoos ao novo marco
legal, desta maneira e só no que vai de ano 2018, a través da sede
electrónica da Deputación de Lugo presentáronse máis de 1.525
solicitudes e asináronse dixitalmente máis de 6.500 documentos.
·
No que respecta á transparencia dos expedientes de contratación, en
setembro do ano 2016 a Deputación de Lugo vén a utilizar como
perfil de contratante á Plataforma de Contratos do Sector Público
(https://contrataciondelestado.es).
Esta plataforma é ofrecida pola Administración Xeral do Estado e
compártese co resto de Administracións Públicas, tanto estatais
como a nivel local, onde cada entidade ten un espazo propio que é
autoxestionado pola propia entidade. Ao tratarse dunha aplicación
estatal que engloba información de expedientes de contratación de
moitas e diversas entidades, tamén dá unha maior proxección a
nivel local, estatal e incluso internacional dos procedementos de
contratación que se publican na mesma. Actualmente a Deputación de
Lugo segue a utilizar esta plataforma para poñer toda a información
relativa aos procesos de contratación, incluíndo a información
histórica de procesos xa rematados que fica a disposición do
público para a súa consulta.
A
Plataforma de Contratos do Sector Público anteriormente indicada,
publicou e puxo a disposición das entidades locais durante o ano
2018 os servizos de licitación electrónica que posibilitan a
recepción e custodia das ofertas en formato dixital, previa
solicitude por parte das entidades interesadas. A Deputación de Lugo
realizou todos os tramites precisos para a utilización de estes
servizos e o 28 de agosto deste mesmo ano 2018, publicou e tramitou
na plataforma o primeiro expediente de contratación no que se
limitaba a presentación de propostas exclusivamente a través de
medios electrónicos a través dos servizos que ofrece a Plataforma
de Contratos do Sector Público: EXP0028SE18-SIM. Contratación da
hosting e mantemento do servizo de correo electrónico, os
dominios corporativos e webs externas.
Este
primeiro expediente de contratación serviu para poñer a proba a
plataforma de Licitación Electrónica e asentou os alicerces para os
seguintes. O expediente de licitación resolveuse en dous meses dende
a súa publicación na plataforma cun importe de adxudicación de
15.980,00 euros fronte a orzamento estimado de 18.000 e concorreron
dous licitadores.
En
vista do éxito desta primeira Licitación Electrónica, a Deputación
de Lugo elevou unha instrución na pasada xunta de Goberno do 26 de
outubro de 2018 pola que se aprobou a extensión do devandito sistema
para todos os expedientes de contratación. Desta maneira, dende a
entidade provincial desenvolveranse xornadas de difusión e
información dirixidas ás empresas nas que se explique a como
utilizar os novos medios electrónicos para a presentación de
ofertas, e ademais, incluiranse en todos os novos expedientes de
contratación unha nova cláusula nos pregos onde se obrigue ao uso
dos servizos de licitación electrónica da Plataforma de Contratos
do Sector Publico para a presentación das súas propostas.