A Deputación de Lugo e a UNED apostan de cheo pola nova comunicación coa revista Lugo Cultura Dixital
xoves, 14 de febreiro do 2019
A
Deputación de Lugo deu hoxe un novo e importante paso en materia de
comunicación e transmisión do coñecemento a través das novas
canles tecnolóxicas. Estamos a falar do lanzamento da Revista LCD Lugo Cultura Dixital,
unha nova publicación encamiñada a promover e mostrar o relevante
labor das asociacións provinciais. E faise a través dunha páxina
web (www.lugoculturadixital.es/),
nas redes sociais e, por suposto, coa devandita revista multimedia,
segundo se fixo saber na presentación “totalmente interactiva”.
Na estrea participaron o voceiro do Goberno, Álvaro Santos Ramos, e
a directora da UNED en Lugo, Ana Traseira Pena.
Santos
Ramos explicou que Cultura Dixital
é un proxecto no que as 80 asociacións culturais que participan
dispoñen de ferramentas de comunicación tecnolóxicas para que os
seus eventos teñan “meirande difusión e visibilidade”. Estas
ferramentas son: unha plataforma web con redes sociais onde difundir
as súas actividades, un servizo de emisión por streaming e
gravación a través da plataforma da UNED e máis unha liña de
asesoramento e cursos de formación con profesionais en novas
tecnoloxías e comunicación.
O
deputado tamén lembrou que o terceiro número da Revista LCD Lugo
Cultura Dixital abrangue distintos aspectos da cultura da
provincia (asociacións, territorio, cine ou música). Isto polo que
se refire á temática, porque no formato adopta unha innovadora
feitura dixital, multimedia e de interactividade integral coas
lectoras e lectores, que poden acceder aos contidos mediante clics
para ver vídeos e galerías fotográficas, escoitar música ou
acceder a través de ligazóns a outros contidos culturais.
Santos
tamén fixo saber que a través desta colaboración coa UNED “dáse
máis visibilidade ás programacións e actividades organizadas por
todas as asociacións e colectivos culturais existentes da provincia
de Lugo sumadas a este proxecto”. A idea é que Deputación, UNED e
asociacións culturais xunten forzas para “crear un capital
cultural e territorial dixitalizado, dispoñíbel para os cidadáns a
través dos medios de comunicación 2.0”, sinalou, engadindo que o
proxecto “é unha oportunidade única pois ampliase o público
potencial ao ámbito universitario, o que permite chegar a máis
xente”.
Na
presentación Álvaro Santos e Ana Traseira tamén explicaron que a
iniciativa Lugo Cultura Dixital tamén ofrece soporte formativo con
cursos impartidos por profesionais coa finalidade de que as
asociacións culturais da provincia melloren as súas destrezas no
eido das redes sociais, a mercadotecnia dixital, a imaxe de marca ou
o manexo de cámaras. No curso deste ano, impartido por profesionais
do CEMAV da UNED (os mesmos que realizan os vídeos da programación
da UNED que se emite na canle de La2 de RTVE), foron 50 as persoas
que recibiron formación destes especialistas en comunicación.
76
entidades asociadas
Cultura
Dixital é unha iniciativa que conta cun total de 76 entidades
culturais asociadas que, a través da páxina
www.lugoculturadixital.es;
así como das redes sociais Twitter @LugoCultura_Dix
e Facebook @lugoculturadixital,
se promove a súa actividades, a través de publicacións de difusión
da súa actividade cultural, a recompilación dos seus datos
principais e a promoción de informacións de índole cultural que
teñan un interese xeral para a poboación. Pódese consultar a lista
de entidades asociados no seguinte enlace:
http://www.lugoculturadixital.es/directorio/page/2/?lang=es.