A Deputación da Coruña e a CEC formarán a 150 persoas nos novos xeitos de traballar e facer comunicación
xoves, 26 de xullo do 2018
A
Deputación da Coruña e a Confederación de Empresarios da Coruña
están a impulsar un programa de formación para adestrarnos nos
principais conceptos, prácticas e metodoloxías dos novos xeitos de
xestionar, traballar e producir. O
programa inclúe oito cursos cun total de 215 horas sobre
contabilidade, nova comunicación, redes sociais, ofimática ou
técnicas de venda. Poderán participar uns 150 profesionais e,
tamén, persoas desempregadas. O investimento incluído é de 30.600
euros, dos que o 80% (24.480 euros) serán achegados pola institución
provincial.
A
iniciativa, froito dun convenio asinado polo deputado de Promoción
Económica e Emprego, José Luis García, e o presidente da patronal
coruñesa, Antonio Fontenla Ramil, desenvolverase nas sedes das
delegacións coruñesa e compostelá da CEC e en diversos concellos
da provincia, que se determinarán en función das solicitudes das
persoas interesadas neste programa.
Os
cursos celebraranse até finais de 2018 e inclúen un total de 215
horas de formación en cuestións como ferramentas de comunicación
(40 horas), habilidades para a xestión e resolución de problemas
(50 horas), introdución á contabilidade (15 horas), Web 2.0 e redes
sociais no entorno de traballo (20 horas), Excel avanzado (15 horas),
novo regulamento de protección de datos (5 horas), técnicas de
venda (35 horas) e habilidades para o traballo en equipo (35 horas).
Segundo
explicou José Luís García, a iniciativa “pretende fomentar a
formación continua dos traballadores en activo e, ao mesmo tempo,
favorecer a inserción laboral dos desempregados, mellorando a súa
cualificación profesional”.