A Deputación da Coruña apoia o proxecto carnotán Galicia Remota para captar nómades dixitais

A Deputación da Coruña aprobou unha subvención para o financiamento do proxecto piloto Galicia Remota, en colaboración co Concello de Carnota. Con esta iniciativa búscase” crear un novo modelo de turismo, innovación e sustentabilidade para facer do rural un polo de atracción de persoas que poidan desenvolver o seu labor profesional en teletraballo desde calquera lugar do mundo”, explicou a entidade provincial, engadindo que a contribución da institución coruñesa contribuirá ao financiamento da actividade cunha achega de 24.000 euros, o 80 % do orzamento total, que ascende a 30.000 euros.
Máis polo miúdo, Galicia Remota pretende ser “un novo modelo de turismo no que as persoas traballadoras en liña vexan unha oportunidade na que vivir experiencias únicas de crecemento persoal e profesional e descubran novos lugares ao mesmo tempo que desenvolven o seu traballo en liña”.
Nun plano aínda máis específico, o obxectivo da iniciativa é “contribuír a frear o despoboamento do rural” e “convertelo nun lugar de emprendemento, amosando que é posíbel traballar en remoto desde lonxe das cidades cunha maior calidade de vida e sen o trafego cotián das grandes urbes", explicou o presidente, Valentín González Formoso, que subliñou que a creación de actividade e emprego no rural e a loita contra o despoboamento é un dos eixos estratéxicos da acción política do goberno provincial coruñés.
Unha ducia de nómades
Un grupo de 12 nómades dixitais internacionais poderán vivir durante tres semanas, do 8 ao 30 de outubro, no rural do municipio e axudar a motivar o tecido emprendedor local. A idea é abordar distintos problemas locais como por exemplo “a escasa iniciativa empresarial, a presenza de negocios con pouco valor engadido e o turismo estacional e de baixa calidade”.
Durante a súa estadía, as persoas participantes desta primeira experiencia realizarán distintas actividades como: obradoiros con artesáns, visitas guiadas de aprendizaxe, visitas culturais, coloquios específicos sobre emprendemento, etc.
Co apoio a este proxecto do Concello de Carnota, a Deputación mostra o “seu compromiso coa loita contra o despoboamento do rural e co impulso do desenvolvemento económico e social da provincia”.
Novo alumeado para o campo de fútbol de Lombáns
O pleno aprobou tamén, por unanimidade, o convenio entre a Deputación e o Concello de Carnota para financiar con 115.000 euros as obras de mellora de eficiencia enerxética do campo de fútbol de Lombáns. A Deputación achegará o 80% do investimento (92.000 euros). O proxecto inclúe a renovación das luminarias existentes, substituíndo a tecnoloxía actual por equipos LED para mellorar a eficiencia enerxética da instalación, localizada no lugar de Capelán, na parroquia de San Mamede.
En concreto, na actuación enmárcase a substitución dos proxectores que iluminan o terreo de xogo; o tendido de novas redes de terra para acompañar a liña subterránea de alimentación aos proxectores; a adecuación da instalación de iluminación e forza interior e a realización de novos cadros de mando.
Con estes traballos búscase mellorar as condicións enerxéticas do lugar, acadando unha maior visibilidade á vez que se consegue unha maior eficiencia.