A Deputación da Coruña achega 200.000 euros para o arrinque do centro de coworking de Ames
luns, 8 de abril do 2019
A
semana pasada o centro de coworking de Ames, emprazado no
Polígono de Milladoiro, recibiu un novo e importante pulo á súa
materialización e posta en marcha: a sinatura
dun acordo entre o Concello e a Deputación da Coruña para a
adquisición dun inmóbel, situado na dita área industrial, para
ofrecer servizos de traballo colaborativo. O centro terá como
finalidade impulsar e apoiar o emprendemento e o autoemprego ligados
aos contidos audiovisuais e dixitais. Segundo se recolle no convenio,
a Deputación co-financiará algo máis do 35% dos custes do local,
cunha achega de 200.000 euros.
Este
acordo permitirá que Ames se sume aos concellos de Oleiros,
Carballo, Brión e Boiro, onde a Deputación está a impulsar a
creación dunha Rede Provincial de Espazos de Traballo Colaborativo
de carácter comarcal e sectorial, adaptados ás necesidades
específicas dos sectores profesionais con maior potencial de cada
unha das zonas.
O
centro de Oleiros estará destinado ao sector da arquitectura, o
urbanismo, a enxeñería ou as enerxías renovábeis; o de Carballo a
empresas TIC; o de Boiro ao sector do mar e o de Brión á
transformación de produtos do sector primario, mentres que o de Ames
centrarase no sector audiovisual e a innovación dixital.
Segundo
fixo saber recentemente o presidente da Deputación, Valentín
González, “os centros terán ámbito comarcal e a súa finalidade
será axudar a desenvolver sectores produtivos e profesionais
específicos en cada zona da provincia”. E engadiu: “O noso
obxectivo é acompañar aos emprendedores na posta en marcha das súas
ideas de negocio, prestarlles servizos e permitir que compartan
experiencias, creando sinerxías e transferencias de coñecemento que
impulsen o desenvolvemento dos seus proxectos”.
Coworking
Ames
A
través deste espazo, o Concello de Ames poderá pór a disposición
de emprendedores e empresas da comarca servizos e infraestruturas
físicas de apoio para apoiar o desenvolvemento do proxecto
empresarial na fase preliminar. Será, en palabras da Deputación,
“un espazo de acollida temporal pensado para situar empresas nos
seus primeiros pasos, acompañalas e fornecelas de determinados
servizos adaptados ás necesidades de cada proxecto empresarial”.
O
espazo servirá ademais para que profesionais de diferentes sectores,
compartan o mesmo espazo físico para traballar nos seus propios
proxectos e facilitar o intercambio de ideas, proxectos, coñecementos