A Comisión Europea amplía as investigacións sobre as prácticas contra a competencia de Amazon

Margrethe Vestager nunha imaxe de Lukasz Kobus para o Servizo Audiovisual da Comisión Europea

Hai un par de anos a comisaria de Competencia, Margrethe Vestager, anunciou en convocatoria de prensa que estaban a vixiar as operacións de Amazon na Unión Europea por posible abuso de posición de dominio cos datos relativos aos produtos que venden outros provedores cos que tamén compiten, e agora sae á palestra para informar a Amazon de que as investigacións realizadas apuntan a que Amazon violou as normas antimonopolio da Unión Europea ao utilizar sistematicamente datos privados dos negocios de vendedores no seu marketplace para competir con eles.
Non só avanza a investigación inicial, senón que a Comisión tamén abriu unha segunda investigación sobre o trato preferente no seu marketplace para os vendedores que fan uso dos servizos de entrega e loxística da propia Amazon, o que tamén sería unha práctica que atentaría á libre competencia.
Vestager declarou que «as condicións de competencia na plataforma de Amazon deben ser xustas. As súas normas non poden favorecer artificialmente as ofertas propias de Amaozn ou favorecer as ofertas que usen os servizos loxístico de Amazon. Co comercio electrónico florecendo, e Amazon sendo unha plataforma de comercio electrónico líder, un acceso xusto e sen distorsións aos consumidores en liña é importante para todos os vendedores».