A Catedral de Santiago lanza nova audioguía interactiva para iOS e Android
luns, 2 de decembro do 2019
A
Catedral de Santiago presentou hoxe unha nova ferramenta que pon o
templo compostelán na vangarda da comunicación dixital.
Trátase, máis en detalle, dunha nova audioguía interactiva para
iOS e Android cuxa principal novidade é que vai alén das
posibilidades (amplas, pero tamén limitadas) dos dispositivos
tradicionais de audio a disposición que se empregan en lugares de
interese turístico. Desta volta, trátase dun mapa interactivo do
conxunto catedralicio que inclúe narracións, vídeos, imaxes
históricas e fotografías en alta calidade, todos estes recursos,
segundo se fixo saber hoxe, co nexo común de enriquecer a visita ao
templo e ao Museo Catedral de Santiago.
A
ferramenta foi dada a coñecer polo director da Fundación Catedral,
Daniel Lorenzo, e o responsábel do proxecto, Jaime Solano, da
empresa GVAM. En palabras de Solano trátase dunha audioguía
“sinxela, accesíbel, sustentábel e sensíbel”.
A
nova app posibilita aos usuarios facer un percorrido polos puntos
máis destacados da Catedral “de maneira autónoma”. Ofrécese
polo de agora en catro linguas (español, galego, inglés e francés)
e con todas as locucións subtituladas. En total, a aplicación
contén máis de 200 imaxes e ao redor de 40 narracións traducidas a
4 idiomas e subtituladas na súa totalidade. Segundo fixeron saber
Lorenzo e Solano, “para evitar posíbeis limitacións de
conectividade dentro do monumento, a app propón a descarga
dos contidos no propio terminal do usuario”. Deste xeito,
explicaron, “os visitantes da Catedral só requirirán estar
conectados a Internet durante o proceso inicial de configuración da
visita”.
Na
presentación de hoxe tamén se explicou que a través dun xestor de
contidos online, a Catedral poderá ir dotando a
ferramenta-audioguía de novos contidos, idiomas e recursos
accesíbeis. Para iso contará co apoio de GVAM, a compañía que
levou a cabo do desenvolvemento desta nova audioguía, especializada
en ofertar este tipo de servizo en varios dos monumentos máis
representativos de España.