A Administración autonómica migrará a software libre preto de 1.000 computadores
mércores, 30 de abril do 2014
- AMTEGA e os axentes galegos da divulgación do software libre acordaron organizar múltiples actividades de impulso á programación aberta
O espírito da
programación aberta semella que se vai fortalecendo entre as
administracións. Así o vén de certificar o Goberno galego, que
anunciou este mércores que migrará a software libre ofimático
aberto preto de 1.000 computadores. Este proceso, a desenvolver
no último trimestre deste ano, foi dado a coñecer pola directora da
Axencia para a Modernización Tecnolóxica de Galicia, Mar Pereira,
logo de formalizar diversos convenios de colaboración cos axentes
galegos da nosa comunidade open source. Pereira compartiu con
eles as liñas de acción do Plan de Software Libre 2014, no que
participan con 34 das 80 actividades previstas.
Estas actividades, polo
tanto, serán en si mesmas unha adaptación do propio espírito do
código aberto: virán da man de moitas plataformas e colectivos
traballando ombro con ombro. Deste xeito, AMTEGA informou que
colaborará unha vez máis co Consorcio para o desenvolvemento de
aplicacións Informáticas de Xestión Universitaria de Galicia
(CIXUG), integrado polas tres universidades galegas; coa Asociación
Galega de Empresas de Software Libre (AGASOL); e con cinco
Asociacións de Usuarios de Software Libre de Galicia (AGUSL) para
impulsar a promoción e fomento do uso de software libre entre a
cidadanía.
As AGUSL que participan
neste programa divulgativo e formativo son GALPon, Ghandalf, GPUL,
Melisa e Asociación Cultural Proxecto Trasno. Os acordos asinados
este mércores, cunha dotación conxunta de 140.000 euros, permitirán
“a realización de actuacións que inclúen dende a elaboración de
documentación, a tradución de software libre á lingua galega, a
organización de xornadas, cursos, obradoiros, o fomento de programas
abertos en proxectos de cooperación ou solidariedade social e a
implantación de ferramentas open
source nas Universidades”, informa a Axencia que dirixe
Mar Pereira. Por certo que a estas alianzas cómpre engadir as
asinadas hai pouco por AMTEGA e o CPEIG
e o CPETIG,
que tamén basean o seu miolo na divulgación de código aberto.
Segundo informou a
Axencia, o Plan de Acción en Software Libre 2014 recolle as 80
actuacións que durante este ano poranse en marcha para incrementar o
uso e coñecemento do software libre por parte da sociedade, o sector
empresarial e na propia administración.
Volvendo ao proceso
devandito de migración a software libre de 1.000 postos de traballo
de empregados públicos, engadir que tamén está programado acometer
un proceso análogo no sistema de xestión da rede de bibliotecas
públicas, que adoptará a solución libre Koha ILS. Tamén
actualizarase a rede de portais da área de cultura e bibliotecas,
empregando solucións de fontes abertas como Drupal ou Liferay. “O
software libre”, engade AMTEGA, “será tamén peza clave para a
implantación de solucións corporativas de intelixencia nos negocios
e de xestión documental e na implantación dun repositorio
institucional para a produción científica do SERGAS”. No eido
educativo, informou tamén a Axencia, o proxecto Abalar “chegará
este curso a 2.295 aulas de 531 centros educativos, beneficiando a
preto de 50.000 alumnos que desenvolven a súa aprendizaxe con
software libre”.
Pola súa parte, a Escola
Galega de Administración Pública ofertará este ano un total de
1.050 prazas de formación con ferramentas de código aberto.
Segundo lembrou AMTEGA, ao devandito hai que engadir que os
empregados públicos poderán obter a Certificación galega de
competencias dixitais en ofimática grazas ás 3.500 prazas ofertadas
nas quendas libres de avaliación do Plan formativo ofimático de
Galicia.
35.000 horas de
formación
Segundo fixeron saber
AMTEGA e os axentes colaboradores nas actividades programadas ao
abeiro do Plan de Software Libre 2014, durante este ano está
previsto impartir 35.000 horas de formación a través das 98 aulas
da rede de CeMIT (aulas que segundo salientou a Axencia empregan o
sistema operativo libre GNU/Linux). Ademais, en colaboración coas
Asociacións Galegas de Usuarios de Software Libre e as Universidades
celebraranse xornadas, cursos e obradoiros e elaboraranse materiais
didácticos que se publicarán no Repositorio Documental de Software
Libre. A Oficina de Software Libre do Sistema Universitario Galego,
ademais, avaliará a viabilidade de integrar a metodoloxía e modelo
de xestión integrada das aulas da rede CeMIT no equipamento
informático das universidades coa intención de “reutilizar a
experiencia do despregue das aulas da Xunta de Galicia cun 100%
software libre”, informouse, ao tempo que se destacou que este
proceso permitiría darlle unha segunda vida aos avances nos
desenvolvementos de CeMIT nas Universidades e viceversa.