xaKobeo.com: o lugar de encontro virtual dos peregrinos 2.0

O Camiño de Santiago tamén se traza na Rede, dunha banda a outra da mesma, cada treito achegado por un internauta ou por un colectivo de internautas. Nesta liña de facer que o itinerario santo no virtual sexa o máis completo posible é onde se insiren os tres novos empresarios galegos que veñen de poñer en marcha a páxina xaKobeo.com, unha web centrada de xeito específico nas pegadas que Compostela deixa no mundo. O sitio, referenciado este domingo polo suplemento Innova Galicia de La Voz nunha completa reportaxe, xorde principalmente coa finalidade de converterse en rede social e punto de encontro 2.0 para peregrinos.
A idea é, polo tanto, seguir o ronsel de Facebook ou MySpace, onde hai centos de millóns de persoas en liña compartindo intereses e coñecemento, pero desta volta arredor dunha cuestión ben concreta: o itinerario compostelán. Deste xeito, favorécese dende a web o fluxo de información (recursos sobre onde aloxarse, onde comer, cando dar comezo ao itinerario, que visitar) e o contacto directo (amizade e comunicación sobre o Camiño dende calquera recanto do mundo).
Detrás desta proposta atópanse tres empresarios novos, moi vinculados á Rede e con base de operacións en Ourense: Juanjo Amorín (responsable de Kedin.es, entre outros proxectos en liña), Xosé Ramón Novoa (creador de webs como HELLOgalicia.es) e José Manuel Regueiro (responsable da firma Modera Media). Como rede social que é, a páxina xaKobeo.com ten a súa razón de ser en crear colectivo. De feito, o reto dos seus responsables é acadar antes de que remate 2010 a cifra nada desprezable de 150.000 usuarias e usuarios. A páxina, entre outros apoios, contará coa experiencia de Kedin.es, unha web xa plenamente evolucionada que, polo menos nun principio, actuará como subministro de participantes.