Código Cero - Diario Tecnolóxico de Galicia

O FIFA volve da man de Netflix

Redacción — 2026-06-12T18:30:00Z

Netflix anunciou o lanzamento de FIFA World Cup: Launch Edition, un novo videoxogo oficial do Mundial de Fútbol de 2026 que está dispoñible en exclusiva a través de Netflix Games. A proposta aposta por partidas rápidas e accesibles, permitindo que ata catro persoas xoguen xuntas empregando os seus teléfonos móbiles como mandos mentres a acción se desenvolve no televisor.
O título preséntase como unha experiencia máis sinxela e inmediata ca as simulacións futbolísticas tradicionais. Para comezar unha partida só é preciso iniciar o xogo na televisión, escanear un código QR co móbil e utilizar a pantalla táctil para realizar pases e disparos. O obxectivo é facilitar o acceso tanto a afeccionados habituais dos videoxogos como a persoas sen experiencia previa.
Coincidindo co inicio da Copa do Mundo masculina da FIFA 2026, o xogo permitirá escoller calquera das 48 seleccións participantes no torneo, competir nos 16 estadios oficiais e controlar calquera dos 1.248 futbolistas convocados para a competición. Netflix destaca que a intención é trasladar ao salón da casa a emoción de seguir os partidos en directo e compartir a experiencia con amigos e familiares.
A edición inicial, denominada Launch Edition, concíbese como o punto de partida dun proxecto que irá evolucionando co paso do tempo. Nesta primeira versión priorízase unha xogabilidade directa e centrada na diversión inmediata, aproveitando o ambiente xerado arredor do Mundial.
O videoxogo forma parte da aposta de Netflix polos xogos para televisión. Actualmente esta funcionalidade está dispoñible en vinte países, entre eles España, Estados Unidos, Canadá, Reino Unido, Francia, Alemaña, Italia, México, Australia, Brasil ou Suíza. A plataforma tamén iniciou unha fase limitada de probas en Brasil.
FIFA World Cup: Launch Edition está incluído sen custo adicional para os subscritores de Netflix e pode localizarse na sección de xogos da aplicación para o televisor.
Cómpre salientar que, aínda que este sexa o auténtico videoxogo oficial da FIFA, está tecnicamente moi lonxe das entregas dos FIFA de EA Sports, ata o punto de que esta entrega non estaría nin sequera á altura dos xogos para as primeiras PlayStation, aínda que tampouco parece pretender compararse aos xogos de consola, buscando unha experiencia moito máis ocasional.

Vídeo promocional do FIFA World Cup: Launch Edition

Xbox prepárase para unha grande reestruturación

Redacción — 2026-06-10T20:30:00Z

: Asha Sharma e Matt Booty son os novos máximos responsables de Xbox

Xbox iniciou unha profunda revisión da súa estratexia empresarial tras recoñecer dificultades en áreas clave como a rendibilidade, a fabricación de consolas, a estrutura dos seus estudios e a infraestrutura tecnolóxica da plataforma. Así o recolle unha mensaxe interna asinada polos novos máximos responsables da división, Asha e Matt, e publicada oficialmente por Microsoft.
O documento, titulado Next 100 Days: Xbox Reset, fai balance dos primeiros cen días da nova dirección e presenta os principais retos que deberán afrontar nos vindeiros meses. A mensaxe combina algúns sinais positivos coa admisión de problemas estruturais que afectan ao negocio.
Entre os logros recentes, o equipo directivo destaca a recuperación do servizo Game Pass tras máis de oito meses de descenso, o aumento da actividade dos socios da plataforma e unha maior frecuencia de actualizacións dos sistemas. Tamén reivindica o retorno dunha estratexia centrada nos exclusivos, con lanzamentos previstos como Gears of War: E-Day en 2026 e Clockwork Revolution en 2027.
A pesar destes avances, os responsables de Xbox advirten de que a compañía debe competir nun mercado no que a principal batalla xa non é contra outras plataformas de videoxogos, senón pola atención dos usuarios. Segundo os datos compartidos, máis de mil millóns de persoas xogan cada ano a títulos da marca, acumulando 72.000 millóns de horas de xogo entre consola, PC, móbil e servizos de transmisión.
A situación financeira aparece como unha das principais preocupacións. Xbox prevé pechar o exercicio cunha marxe de beneficio próxima ao 3 %, inferior á rexistrada o ano anterior. Ademais, excluíndo Activision Blizzard King, Microsoft asegura que investiu máis de 20.000 millóns de dólares durante os últimos cinco anos en contidos, plataforma e subvención do hardware, mentres que os ingresos anuais diminuíron en preto de 500 millóns de dólares.
O documento dedica especial atención á crise de compoñentes que afecta á produción de consolas. Os custos do almacenamento empregado nos equipos terían multiplicado o seu prezo desde 2024 e poderían superar por máis de cinco os niveis de hai dous anos de cara á campaña de Nadal de 2027. Os responsables da división admiten que actualmente non son capaces de fabricar tantas consolas como demanda o mercado e avanzan a necesidade de explorar novos modelos de negocio e colaboracións para o proxecto de hardware Helix.
A organización dos estudios de desenvolvemento tamén será revisada. O texto sinala que a expansión realizada para dar resposta ás estratexias de subscrición, transmisión e xogo multidispositivo acabou xerando unha estrutura excesivamente ampla. A dirección considera que algunhas das súas franquías máis importantes non recibiron o nivel de investimento necesario para competir nas mellores condicións, ao tempo que subliña a importancia de manter unha oferta constante de exclusivos e novas propiedades intelectuais.
A infraestrutura tecnolóxica da plataforma constitúe outro dos puntos que se pretenden reformular. Segundo recoñece a propia compañía, a acumulación de centos de dependencias e a dependencia de provedores externos dificultan a capacidade para introducir cambios con rapidez. Entre os obxectivos figura simplificar os sistemas, aumentar a autonomía dos equipos de enxeñaría e acelerar o desenvolvemento de novas funcionalidades.
A mensaxe conclúe cun chamamento a aproveitar os activos que conserva a marca, entre eles a súa base de usuarios, Windows como plataforma de xogos e un dos maiores catálogos de franquías da industria. O obxectivo declarado pola nova dirección é acometer unha reestruturación que permita converter Xbox na principal empresa mundial de videoxogos e entretemento.

Sonic, Final Fantasy e simulación agrícola entre as novas incorporacións de PlayStation Plus

Redacción — 2026-06-10T18:00:00Z

O catálogo de xogos de PlayStation Plus correspondente ao mes de xuño incorporará a partir do día 16 unha nova selección de títulos para os subscritores de Extra e Premium, cunha oferta que combina grandes producións recentes, clásicos recuperados e experiencias de simulación e mundo aberto.
Entre as incorporacións destaca Final Fantasy XVI, a última entrega da saga de rol de Square Enix, que aposta por unha narrativa máis escura situada no mundo de Valisthea. O xogo pon ao xogador na pel de Clive Rosfield nunha historia marcada pola vinganza, as loitas de poder e o uso dos eikons nun sistema de combate de acción.
Tamén chega Sonic X Shadow Generations, dispoñible en PS5 e PS4, centrado no personaxe de Shadow, que afronta o regreso dunha antiga ameaza vinculada ao seu pasado. O título inclúe ademais unha versión remasterizada de Sonic Generations, con niveis en 2D e 3D actualizados e contido adicional.
Outro dos lanzamentos salientables é Kingdom Come: Deliverance, que se incorpora cunha versión mellorada para PS5. O xogo sitúa a experiencia na Bohemia medieval e segue a historia de Henry, fillo dun ferreiro que se ve arrastrado a unha guerra civil tras a destrución da súa aldea, nun RPG de mundo aberto centrado na toma de decisións e o combate realista.
A oferta complétase con Life is Strange: Double Exposure, unha nova entrega da serie que recupera a Max Caulfield como protagonista. A historia xira arredor dun asasinato e da aparición dunha realidade paralela creada ao intentar reverter o tempo, cunha estrutura narrativa baseada nas decisións do xogador.
No catálogo inclúese tamén Farming Simulator 25, que amplía a experiencia agrícola con novos cultivos como o arroz e a espinaca, escenarios en distintas rexións do mundo e un amplo conxunto de maquinaria realista. O xogo aposta por unha simulación detallada tanto en solitario como en modo cooperativo.
Entre as propostas máis singulares figura Blades of Fire, ambientado nun mundo no que o metal se transforma en pedra e no que o protagonista debe forxar as súas propias armas. O sistema de combate céntrase na personalización e no control do armamento, con consecuencias directas no desenvolvemento das partidas.
Tamén se suma Black Desert, o MMORPG de mundo aberto de Pearl Abyss, que ofrece unha ampla variedade de actividades que van desde o combate e o comercio ata a pesca ou a artesanía, nun entorno dinámico que evoluciona co progreso dos xogadores.
Na modalidade Premium incorpórase ademais Gitaroo Man, un clásico de ritmo da PlayStation 2 que regresa a PS4 e PS5. O título propón unha aventura musical na que o protagonista utiliza unha guitarra especial para enfrontarse a distintos desafíos ao ritmo da música.

Ubisoft despedirá preto de 380 empregados

Redacción — 2026-06-10T17:00:00Z

Ubisoft anunciou unha nova vaga de despedimentos que podería afectar a uns 380 empregados, no marco dun proceso orientado a simplificar a súa organización, reducir custos e reforzar a compañía a longo prazo.
Nunha comunicación interna dirixida ao persoal, a empresa explicou que estas decisións responden tamén a axustes derivados da revisión recente do seu catálogo de produtos e da actividade dos seus equipos. O texto sinala que «ao longo dos últimos meses, Ubisoft foi evolucionando a súa organización para simplificar a súa forma de operar, reducir a súa base de custos e fortalecer a empresa a longo prazo».
Entre as medidas xa adoptadas figuran o peche dos estudios de Winnipeg e Belgrado, así como a apertura de consultas para unha posible reestruturación do estudio de Barcelona, que pasaría a concentrar a súa actividade en Rainbow Six, suxeita aos procesos de representación dos traballadores.
Tamén se están a producir cambios na organización global de publicación, co obxectivo de adaptar a estrutura dos equipos e a súa distribución, mantendo ao mesmo tempo unha presenza en mercados clave. Segundo a información difundida, estas modificacións implican que ata 380 empregados poderían verse afectados, aínda que as cifras concretas varían segundo os centros.
No estudio de Winnipeg produciríase o despedimento de 65 persoas e o peche completo das instalacións. En Belgrado a redución alcanzaría aproximadamente 100 empregados, tamén con peche do estudio. En Barcelona rexístranse 51 saídas no marco do proceso de consulta. No equipo de Rainbow Six Siege contemplaríase o reaxuste de arredor de 120 postos. No caso de San Francisco, onde opera parte da organización de publicación global, non se detallou o número exacto de afectados.
A dirección local dos distintos equipos está a manter comunicación directa co persoal para informar sobre o proceso, resolver dúbidas e facilitar medidas de apoio durante a transición. Na mensaxe interna insístese en que estas decisións «non reflicten o talento, o compromiso nin as contribucións das persoas afectadas».

Valve deixará de vender tarxetas agasallo físicas

Redacción — 2026-06-10T11:15:00Z

Valve anunciou que retirará progresivamente do mercado as tarxetas agasallo físicas de Steam debido ao uso fraudulento que fan delas os estafadores. As existencias actuais seguirán vendéndose nas tendas ata esgotarse, pero non serán repostas, polo que a previsión é que desaparezan completamente dos establecementos comerciais antes de que remate 2026.
As tarxetas agasallo de Steam chegaron ás tendas físicas en 2012 e, cinco anos máis tarde, incorporouse a opción de agasallo dixital. Durante os últimos anos adoptáronse numerosas medidas para combater as estafas asociadas a este método de pago, incluíndo a colaboración con vendedores e forzas de seguridade, a incorporación de advertencias visibles nas propias tarxetas, restricións de moeda para o seu cambio e limitacións na súa distribución.
A pesar destas medidas, os ciberdelincuentes continuaron adaptándose ás restricións impostas. Isto levou a Valve a tomar a decisión de finalizar o programa de venda de tarxetas físicas e concentrarse nas alternativas dixitais.
As tarxetas xa adquiridas seguirán sendo válidas e poderán empregarse normalmente en Steam, de acordo coa lexislación aplicable en cada territorio. Mentres tanto, a plataforma continuará ofrecendo tarxetas agasallo dixitais e traballa en melloras para este sistema, como o pago sen necesidade de iniciar sesión, unha funcionalidade incorporada recentemente para facilitar que familiares e amigos poidan facer agasallos a usuarios de Steam.
Valve tamén aproveitou o anuncio para alertar sobre os calotes relacionados con tarxetas agasallo. Os delincuentes adoitan contactar coas vítimas por teléfono ou mensaxes, facéndose pasar por organismos públicos, empresas ou entidades financeiras, e solicitan a compra de tarxetas para supostos pagamentos de impostos, multas, débedas ou premios de sorteos. Unha vez adquiridas, piden os códigos das tarxetas para apropiarse dos fondos.
Lembran que o saldo das tarxetas agasallo de Steam só pode utilizarse dentro da propia plataforma para adquirir videoxogos, software, hardware e outros contidos dixitais, polo que calquera petición de pagamento mediante este tipo de tarxetas debe considerarse sospeitosa. Valve recomenda non compartir nunca os códigos nin entregar tarxetas agasallo a persoas descoñecidas.

The Legend of Zelda: Ocarina of Time chegará a Switch 2

Redacción — 2026-06-09T20:00:00Z

Nintendo celebrou o seu Nintendo Direct de xuño de 2026 cunha das presentacións máis destacadas dos últimos anos, marcada polo anuncio do agardado remake de The Legend of Zelda: Ocarina of Time, a reaparición de Kingdom Hearts IV tras varios anos sen novidades e a confirmación dun novo capítulo da saga Xenoblade.
A compañía pechou o evento coa primeira mostra do remake de The Legend of Zelda: Ocarina of Time, que chegará en exclusiva para Nintendo Switch 2 ao longo de 2026. O adianto foi breve, cunha escena na que Link aparece durmindo na súa casa, pero serviu para confirmar oficialmente un proxecto que levaba meses protagonizando rumores.
Outro dos grandes anuncios foi Kingdom Hearts IV. Square Enix mostrou por primeira vez secuencias de xogo da nova entrega protagonizada por Sora, Donald e Goofy, que viaxarán á misteriosa cidade de Quadratum. O título non ten aínda data de lanzamento, pero publicarase en Nintendo Switch 2, PlayStation 5, Xbox Series X|S e PC.
Square Enix tamén revelou Final Fantasy Resonance, un RPG por quendas con estética HD-2D que chegará o 22 de outubro. A aventura estará protagonizada por Rain, un mozo cabaleiro encargado de salvar os cristais que sustentan o mundo e contará coa aparición de personaxes clásicos da franquía mediante un sistema de invocacións.
Monolith Soft, pola súa banda, confirmou Xenoblade Genesis, unha nova entrega da súa popular serie de rol que está prevista para 2027. Mentres tanto, os tres xogos principais da saga recibirán edicións optimizadas para Nintendo Switch 2. A actualización de Xenoblade Chronicles: Definitive Edition xa está dispoñible, mentres que as versións melloradas de Xenoblade Chronicles 2 e Xenoblade Chronicles 3 chegarán o 30 de xullo e o 3 de decembro, respectivamente.
A presentación tamén serviu para ofrecer novos detalles de Splatoon Raiders, a aventura para un xogador ambientada no universo de Splatoon, que estará dispoñible o 23 de xullo. Nintendo celebrará ademais unha presentación específica dedicada ao xogo o 30 de xuño.
Entre os anuncios exclusivos para Nintendo Switch 2 destacou Nintendo Switch Sports Resort, unha nova entrega da serie deportiva ambientada de novo na illa Wuhu. Incluirá doce disciplinas, tanto novas como clásicas, e chegará o 22 de outubro. Tamén se anunciou unha demostración gratuíta de Star Fox, mentres que o xogo completo estará dispoñible o 25 de xuño.
Capcom confirmou a chegada de Devil May Cry 5 Devil Hunter Edition o 23 de xuño e mostrou un novo tráiler de Onimusha: Way of the Sword, previsto para o 25 de setembro. Ademais, Dragon''s Dogma 2 recibirá a expansión Dark Arisen o 9 de outubro, incorporando unha nova rexión xeada, equipamento inédito e desafíos adicionais.
O catálogo de terceiros reforzarase tamén coa chegada de Warhammer 40,000: Space Marine 2 durante a campaña de Nadal, unha edición específica de Minecraft para Switch 2 con melloras gráficas, Lies of P: Complete Edition o 6 de agosto e Lords of the Fallen 2 durante o outono.
Nintendo confirmou igualmente Dragon Quest Monsters: The Withered World, que chegará o 3 de decembro, e anunciou Fire Emblem: Fortune''s Weave, que se publicará o 17 de setembro. Tamén houbo espazo para Rhythm Paradise Groove, previsto para o 2 de xullo, e para DELTARUNE Chapter 5, que se lanzará como actualización gratuíta o 24 de xuño.
A colaboración entre Nintendo e outras editoras deixou algunhas sorpresas adicionais. Stellar Blade chegará a Switch 2 en 2026, Ubisoft publicará Rayman Legends Retold o 1 de outubro e House House, o estudio responsable de Untitled Goose Game, lanzará a aventura cooperativa Big Walk o 4 de agosto.
A lista de novidades completouse con One Piece: Grand Gourmet, un simulador de xestión de restaurantes ambientado no universo de Eiichiro Oda; Orbitals, unha aventura cooperativa para dous xogadores; o battle royale Jujutsu Kaisen Rumble: Survivaton; novo contido descargable para Donkey Kong Bananza; unha expansión para Pokémon Pokopia; e a chegada da colección Kingdom Hearts Collection [I III] o 8 de outubro.

Vídeo co Nintendo Direct íntegro

Xbox celebra os seus 25 anos cunha chea de novidades

Redacción — 2026-06-08T10:40:18Z

O Xbox Games Showcase 2026 serviu para presentar unha ampla batería de novidades, entre as que destacaron novos xogos, hardware conmemorativo polo 25º aniversario da marca e a confirmación do regreso da estratexia de exclusivas para consola. O evento tamén deixou numerosos anuncios de estudios propios e socios externos, con estreas mundiais, novas datas de lanzamento e as primeiras imaxes de xogabilidade de títulos moi esperados.
A celebración do 25º aniversario de Xbox materializarase coa chegada en novembro dunha edición limitada da consola Xbox Series X25 e do mando Xbox Wireless Controller X25. Ambos os dispositivos recuperan a estética verde translúcida da primeira consola da marca, incorporando referencias visuais á historia da plataforma e á súa comunidade de usuarios.
A Xbox Series X25 Limited Edition mantén as prestacións da Series X actual, incluíndo 1 TB de almacenamento, pero engade unha carcasa translúcida inspirada no deseño orixinal da consola lanzada en 2001. O logotipo iluminado en verde e diversos detalles decorativos rememoran os primeiros anos da marca. O mando X25 Special Edition segue a mesma liña estética, recuperando as cores clásicas dos botóns ABXY e mesmo referencias aos botóns branco e negro do coñecido mando Duke. O conxunto comercializarase en mercados seleccionados, mentres que o mando tamén poderá adquirirse por separado.

Regresan as exclusivas para consola

Un dos anuncios máis destacados do evento foi a confirmación de que Gears of War: E-Day e Clockwork Revolution serán exclusivos das consolas Xbox. A compañía precisou que non se trata de exclusivas temporais, aínda que os títulos xa anunciados previamente como multiplataforma manterán esa condición.
A decisión busca reforzar o atractivo do ecosistema Xbox coincidindo coa celebración do seu aniversario, nun momento no que a marca ampliou notablemente a súa presenza en PC e outras plataformas.

Novidades dos estudios propios

Entre as producións internas destacou a presentación de Senua, unha nova aventura de acción ambientada no universo de Hellblade. O título, previsto para 2027, apostará por unha estrutura máis aberta e unha maior presenza de combate táctico e exploración.
Tamén se anunciou Spyro: A Realm Beyond, o primeiro xogo completamente novo protagonizado polo dragón púrpura en case dúas décadas. Desenvolvido por Toys for Bob, chegará na primavera de 2027 e incorporará voo libre e novas mecánicas de exploración.
Gears of War: E-Day mostrou por primeira vez a súa xogabilidade e confirmou o seu lanzamento para o 6 de outubro. O título relatará os acontecementos do Día da Emerxencia, cando os Locust iniciaron a súa invasión de Sera, e afondará nos primeiros pasos da relación entre Marcus Fenix e Dominic Santiago.
Outro dos protagonistas foi Halo: Campaign Evolved, que chegará o 28 de xullo. A nova campaña incluirá a operación Meteorite, formada por tres misións protagonizadas por Master Chief e o sarxento Johnson.
Minecraft Dungeons II estrearase o 29 de setembro cunha nova aventura ambientada en rexións inéditas do Overworld, mentres que State of Decay 3 confirmou a súa chegada en 2027 e mostrou o seu primeiro tráiler con secuencias de xogabilidade.
A nova expansión de Doom: The Dark Ages, subtitulada Revelations, estará dispoñible a partir do 7 de xullo e introducirá unha nova campaña centrada no Doom Slayer, ademais da arma Chain Spear.
Pola súa banda, Fable fixou o seu lanzamento para o 23 de febreiro de 2027. O novo tráiler presentou a personaxe de Isabel, interpretada pola actriz Hayley Atwell, e anticipou o regreso de Jack of Blades, un dos antagonistas máis emblemáticos da saga.
Clockwork Revolution reapareceu cun novo vídeo centrado na súa narrativa baseada na manipulación temporal. O RPG steampunk de inXile Entertainment continuará previsto para Xbox Series X|S, PC e Game Pass.

Estreas de socios externos

Entre os anuncios realizados por editoras e estudios asociados destacou Persona 6, cuxa existencia foi confirmada oficialmente por Atlus. Tamén se mostrou un novo tráiler de Persona 4 Revival.
Outra das estreas mundiais foi Wo Long 2: Wings of Ember, mentres que Metro 2039 ofreceu as súas primeiras secuencias de xogabilidade.
Resonance: A Plague Tale Legacy confirmou a súa data de lanzamento e Where Winds Meet sorprendeu coa súa publicación inmediata tras a presentación.
Konami, Evil Empire e Motion Twin anunciaron Castlevania: Belmont's Curse, unha nova aventura de acción bidimensional ambientada 23 anos despois de Castlevania: Dracula's Curse. O xogo chegará o 15 de outubro e estará protagonizado por Rose Belmont, filla de Trevor Belmont.
SEGA tamén recuperará unha das súas franquías máis recoñecibles con Crazy Taxi: World Tour, previsto para 2027. A nova entrega incorporará unha campaña narrativa, carreiras multixogador en liña, personalización de vehículos e varias cidades internacionais como escenario.
O Xbox Games Showcase 2026 deixou así unha das presentacións máis completas dos últimos anos para a marca, combinando a recuperación de franquías históricas, novas propiedades intelectuais e unha renovada aposta polas exclusivas coincidindo co seu 25º aniversario.

Tráiler do novo Crazy Taxi

Os xogos de Tomb Raider deixan de dobrarse ao castelán

Redacción — 2026-06-05T10:19:42Z

Crystal Dynamics anunciou que Tomb Raider: Legacy of Atlantis estará dispoñible o vindeiro 12 de febreiro de 2027 para PlayStation 5, Xbox Series X|S e PC. O título recupera a aventura orixinal de Lara Croft de 1996 a través dunha reinterpretación desenvolvida desde cero en colaboración con Flying Wild Hog e empregando Unreal Engine 5.
A proposta busca modernizar o clásico que definiu o xénero das aventuras de acción sen renunciar á súa esencia. Os xogadores volverán percorrer localizacións emblemáticas como o Val Perdido do Perú, as ruínas de Grecia, os desertos de Exipto ou a misteriosa Atlántida, agora recreadas con gráficos de nova xeración, son máis detallados e mecánicas actualizadas para a exploración, os combates e a resolución de crebacabezas.
Un dos cambios máis destacados afecta ao deseño dos escenarios. Os crebacabezas e as áreas de exploración foron redeseñados para ofrecer espazos semiconectados que permiten abordar os desafíos desde distintas perspectivas. Os desenvolvedores explican que cada localización foi concibida como un lugar coherente e vivo, cheo de segredos, obxectos coleccionables e recursos que recompensan a exploración.
A historia mantén a procura das pezas do Scion, un artefacto de poder incalculable, pero amplía a narrativa con novas conexións destinadas a relacionar a primeira aventura de Lara Croft co seu futuro dentro da saga. O percorrido levará á arqueóloga británica por paisaxes perigosas cheas de trampas, criaturas salvaxes, mercenarios e seres mitolóxicos.
A mobilidade tamén recibiu unha importante actualización. Lara poderá aproveitar a súa axilidade, forza física e un gancho para escalar, balancearse e superar obstáculos, mentres que os crebacabezas combinarán elementos clásicos da serie con novas mecánicas baseadas na manipulación da auga, a redirección de feixes de luz, a activación de mecanismos antigos e a interpretación de símbolos.
O combate apostará polas emblemáticas pistolas dobres da protagonista, acompañadas doutras armas desbloqueables. As habilidades acrobáticas terán un papel central nos enfrontamentos contra inimigos humanos, animais e criaturas fantásticas, incluídos os coñecidos dinosauros que apareceron no xogo orixinal.
O título comercializarase en varias edicións. A edición estándar terá un prezo de 59,99 euros e incluirá o xogo completo en formato dixital e o traxe Survivor como incentivo de reserva. A edición Deluxe, por 69,99 euros, engadirá 48 horas de acceso anticipado, o traxe Parisian Fugitive e un contido descargable de historia que chegará despois do lanzamento. Estas versións están xa dispoñible en reserva, mentres que a edición para coleccionistas aínda se fará agardar, e incluirá os contidos da edición Deluxe xunto con varios elementos físicos: unha estatua de Lara Croft enfrontándose a un T-Rex, un minilibro de ilustracións, un chaveiro de talismán do triunvirato, unha insignia de selo Croft e unha caixa metálica.
Pero coa apertura das reservas deste xogo chegou tamén unha mala nova para os usuarios españois, xa que puido constatarse que o xogo non incluirá dobraxe en español de España, o que resulta bastante rechamante se temos en conta que incluso se dobrou ao polaco. Iso levou a que se emprendese unha recollida de sinaturas en liña, que xa xuntou preto de 18 mil, esixindo que o novo xogo conte con voces en castelán, como veñen recibindo os xogos da serie dende o Tomb Raider 3 de 1998.

Último tráiler do xogo

A batería das futuras Switch 2 será doada de substituír

Marcus Fernández — 2026-06-04T14:00:00Z

Cada vez son máis os dispositivos electrónicos que se adaptan á lexislación europea para evitar a proliferación dos refugallos electrónicos facilitando a reparación de produtos, especialmente no que se refire ás súas baterías, e a última compañía en confirmar que adoptará medidas é Nintendo.
O fabricante nipón vén de confirmar a través da súa páxina web a súa cooperación coas entidades comunitarias, apuntando que adoptarán medidas para cumprir o regulamento europeo que obriga a que a partir do 18 de febreiro de 2027 os consumidores poidan substituír de xeito doado e en calquera momento da vida útil aquelas baterías que veñan integradas en determinados dispositivos.
Nintendo explica que os produtos con número de modelo que comeza por BEE (ou sexa, as consolas Nintendo Switch 2) contará con versións que cumpran cos requisitos, que disporán de números de modelos únicos e levarán o código suplementario OSM claramente visible no embalaxe para que se distinga que son acordes coa lexislación europea.
Que a Nintendo Switch 2 vaia contar cunha batería doada de substituír polos usuarios é unha grande nova, e distintas fontes apuntan a que ese tipo de versión da consola, aínda que comece a súa comercialización en Europa, podería rematar sendo o modelo global, xa que a reparabilidade é unha prestación cada vez máis demandada polos usuarios.

Desvelan os primeiros xogos que chegan a Game Pass en xuño

Redacción — 2026-06-03T20:30:00Z

Microsoft anunciou a primeira vaga de incorporacións a Xbox Game Pass para xuño de 2026, cun catálogo que combina regresos destacados, como Persona 5 Royal, con varias estreas dispoñibles desde o seu lanzamento. Entre as novidades tamén figuran Starseeker: Astroneer Expeditions, Solarpunk, Beastro e Junkster.
A programación arrinca o 4 de xuño coa chegada de Herdling e Total Chaos para nube, Xbox Series X|S e PC. O primeiro propón unha aventura atmosférica ambientada nunha expedición alpina acompañada por un rabaño de criaturas, mentres que o segundo é un xogo de terror e supervivencia en primeira persoa creado polo autor de Turbo Overkill.
O 8 de xuño estrearase Solarpunk, dispoñible desde o primeiro día en Game Pass Ultimate e PC Game Pass. Trátase dun xogo de supervivencia ambientado nun mundo de illas flotantes no que os xogadores poden construír bases, cultivar alimentos, fabricar dispositivos e explorar o ceo a bordo dunha aeronave. Na mesma data incorporarase tamén Undisputed, un simulador de boxeo que aposta por recreacións realistas, un amplo elenco de púxiles con licenza oficial e un sistema de control centrado na precisión dentro do cuadrilátero.
O 9 de xuño regresará ao servizo Persona 5 Royal, a versión ampliada do popular RPG de Atlus. O título convida os xogadores a liderar os Phantom Thieves of Hearts nunha aventura que combina exploración de alxubes, combate por quendas, personalización de personaxes e actividades sociais polas rúas de Toquio.
As incorporacións continuarán o 11 de xuño con tres novas propostas. Beastro mestura simulación de vida acolledora e construción de barallas nunha aventura na que a preparación de pratos máxicos determina as capacidades dos heroes en combate. Frog Sqwad aposta polo multixogador cooperativo para ata oito participantes nunha combinación de plataformas, crebacabezas e física cómica protagonizada por ras. Pola súa banda, Starseeker: Astroneer Expeditions chegará desde o primeiro día a Game Pass como unha nova entrega ambientada no universo de Astroneer, centrada na exploración espacial cooperativa e no cumprimento de obxectivos a escala planetaria a través de diferentes sistemas estelares.
A primeira quincena do mes pecharase o 16 de xuño coa estrea de Junkster, tamén dispoñible desde o seu lanzamento. O xogo presenta unha aventura de plataformas en tres dimensións protagonizada polo robot construtor UM-13, que deberá reconstruír a súa nave e recuperar unha valiosa carga perdida nun perigoso planeta convertido nun enorme depósito de chatarra.