Os pais dunha nena discapacitada describen o seu tratamento nun blog
venres, 5 de xaneiro do 2007
Ashley, esta nena
de nove anos do estado de Washington, naceu cunha estraña condición cerebral
recoñecida como encefalopatía estática, que a deixou de xeito permanente co
estado mental dun bebé de tres meses. Dende hai dous anos, para facerlle máis doada
a doenza, os pais tomaron a decisión de aprobar un tratamento médico para deter
o seu crecemento e que o seu corpo fora o dunha cativa polo resto da súa vida.
Así o aseguran no seu
sitio web, onde se defenden das acusacións de distintos grupos colectivos
(médicos, relixiosos, organización de discapacitados...) de actuar sen ética e
onde describen, ademais, as vantaxes de someter á nena a este tratamento e os
motivos que os levaron a tomar a decisión. Ashley non pode manterse de pé, e
nin tan sequera pode erguer a cabeza, soster un boneco ou camiñar, e moito
menos falar.
Amais, precisa da axuda dos pais para absolutamente todo, polo que sen a axuda
do tratamento, “non sería posible que
puidese saír tan a cotío nin facer máis cousas alén de ver a televisión ou
mirar para o teito todo o día, porque non poderían cargar con ela”. Na web
tamén se describe paso a paso o tratamento que recibe cada día, as
características da doenza, as polémicas que van xurdindo a medida que se vai
coñecendo a decisión tomada polos proxenitores e incluso fotografías da
evolución da doenza. Mentres uns se poñen en contra e outros a favor, Ashley,
allea a todo isto, pode seguir a desfrutar dos agarimos dos pais, que agora
teñen unha maior capacidade para coidar dela e aínda lles sobra tempo para
facer o seu propio blog.