YouTube retransmitirá os XX OO para 77 países
martes, 5 de agosto do 2008
A web de vídeos máis popular da Rede, YouTube, vén de asinar un convenio co Comité
Olímpico Internacional (COI) mediante o cal se compromete a realizar tres horas
diarias de retransmisións en directo dende Pequín para aqueles países nos que a
televisión pública non cubrirá o evento deportivo.
Tales países como son a India, Corea do Sur ou
Nixeria supoñen unha audiencia potencial duns 200 millóns de persoas, que
poderán comezar a gozar destas retransmisións a partires do vindeiro 6 de
agosto a través da ligazón, youtube.com/beijing2008.
Con este acordo, os xogos de Pequín
convértense nos primeiros da historia en ter unha cobertura global a través de
Internet, para satisfacción do COI, que asegura que a súa prioridade agora é “facer que o máximo número de xente
experimente a maxia dos Xogos Olímpicos”.
Nembargantes, o contrato asinado con YouTube
non asegura que outros países (onde as televisións pagaron grandes sumas de
diñeiro por ter os dereitos de retransmisión) poidan gozar destes contidos a
través de Internet pois estarán bloqueados.
O obxectivo é pois, que YouTube cubra os Xogos
naqueles países onde os dereitos dixitais non foran vendidos ou onde as
televisións non negociaran a exclusividade das imaxes.
O COI, pola súa banda, espera que con esta
iniciativa se eviten as retransmisións piratas das Olimpíadas e asemade, agarda
poder chegar a un público moito máis novo que o que tradicionalmente soe ver os
XX OO, xa que a audiencia dos de Atenas 2004 foi superior aos 40 anos.