Windows Live SkyDrive ofrece 5 Xb de espazo en liña para os seus usuarios

Coa finalidade de mellorar a navegabilidade dos usuarios de Windows Live, Microsoft vén de anunciar o lanzamento de Windows Live SkyDrive, un disco duro en liña que lle vai permitir aos internautas dispoñer de 5 Xb de espazo de almacenamento de balde na Rede.
Este servizo de Microsoft non ten límite algún no tráfico de datos mensual e coa integración do resto de servizos de Windows Live permítelles ós seus usuarios dispor de tódalas ferramentas precisas para mellorar a navegabilidade na Rede, ó incluír correo electrónico, mensaxería instantánea... nun mesmo sitio.
Sky Drive foi creado para dar resposta á demanda dos usuarios que pretendían compartir a súa información de xeito seguro con amigos, familiares e compañeiros de traballo e con esta ferramenta os intenautas poden almacenar e compartir datos sen ter que cargar con memorias USB e sen medo a perder a información almacenada nas mesmas.
Windows Live SkyDrive ofrécelle ós seus usuarios ata tres xeitos distintos de almacenar e compartir os seus documentos de xeito doado e cun tamaño máximo de 50 Mb por documento:
- Mediante cartafoles persoais: protexidas mediante contrasinal ás que só pode acceder o propietario da conta.
- Mediante cartafoles compartidos: para compartir os documentos só con aqueles contactos que o usuario desexe.
- Mediante cartafoles públicos: con libre acceso a calquera persoa.