Microsoft permite visitar Vigo, Lugo, Pontevedra e Ourense a vista de paxaro

Microsoft anunciou oficialmente a incorporación dunha nova funcionalidade ó seu servizo de mapas en liña, os mapas tridimensionais fotorrealistas, que permiten ver cidades coma New York, Boston, ou Miami en 3D, o que permite pasear voando entre os edificios, o que permite achegar ó usuario un sistema innovador de visitar as cidades, e que en breve tamén contará cun equivalente no servizo de mapas de Google.
Este novo xeito de ver as cidades precisa de ordenadores potentes e boa conexión á Rede para poder tirarlle proveito, pero o que si está ó alcance da meirande parte de usuarios é o percorrido de cidades a vista de paxaro, grazas a fotografías aéreas das mesmas que, aínda que non conte cunha oferta de localidades exhaustiva, está a incrementarse enormemente incluíndo non só poboacións dos EE.UU. senón que tamén cidades españolas e mesmo galegas.
Así, dende os pasados días podemos empregar o Microsoft Live Search Maps para ver as cidades de Vigo, Lugo, Pontevedra e Ourense dende o aire, dando unha imaxe de extraordinario detalle e calidade que mesmo nos deixa ver os monumentos máis representativos destas vilas.
A vista aérea fotorrealista é un primeiro paso para as cidades galegas, que é de agardar que no futuro se complete tamén cos mapas tridimensionais que nos permitan voar entre os edificios máis elevados das nosas cidades.