Código Cero - Diario Tecnolóxico de Galicia

A cobertura da TDT segue a ser deficiente no Barbanza

Marcus Fernández — 2009-07-03T20:26:05Z

Pese a que durante estes días debería ter chegado o apagamento analóxico á televisión de Carnota, Lousame, Mazaricos, Muros, Noia, Outes e Porto do Son (que reciben o sinal de Santiago de Compostela) por estar incluídos na primeira fase do Plan Nacional de Transición á TDT, a cobertura da Televisión Dixital Terrestre continúa a ser moi deficiente no Barbanza, o que resulta especialmente grave no caso de Mazaricos, concello no que só o 48% dos fogares teñen a posibilidade de acceder ao sinal dixital a día de hoxe.
Estímase que máis de 6.000 veciños do Barbanza (preto do 20% do total) seguen sen contar con cobertura da TDT nos seus fogares, o que indica claramente que non se fixeron os deberes no espallamento da televisión dixital en Galicia, agardándose que en breve o novo Goberno da Xunta de Galicia anuncie o seu propio plan de acendido dixital para solucionar a situación actual, que deixa a moitos fogares afastados das posibilidades que abre a TDT.

- Audiovisual

Actívase a web do Premio A Imaxe de Galicia

Marcus Fernández — 2009-07-03T20:14:12Z

O I Premio A Imaxe de Galicia convocado polo Colexio Profesional de Xornalistas de Galicia coa colaboración e patrocinio da Fundación Caixa Galicia vén de activar a súa páxina web na que é posible consultar as súas bases e descargar o formulario de inscrición.
Este certame pretende recoñecer a labor dos xornalistas gráficos, cada vez máis importante nun mundo no que a memoria está cada vez máis creada de imaxes. Os participantes poderán presentar un total de 3 imaxes, que traten sobre Galicia e fosen publicadas nalgún medio durante 2009 e o xurado elixirá ás 50 mellores (que aparecerán nunha exposición, un catálogo e unha páxina web), entre as que se seleccionará a imaxe gañadora, recibindo o seu autor un único premio en metálico de 9.000 euros.

A industria editorial española comeza a tomar posicións fronte ao libro dixital

Marcus Fernández — 2009-07-03T16:55:58Z


O Papyre é un lector de libros electrónicos de fabricación española

Aínda que o mercado europeo está a pór moitos atrancos á chegada do libro dixital, finalmente comezan a tomar medidas e Planeta, Santillana e Random House Mondadori comezan a traballar cos axentes literarios para negociar e distribuír os dereitos de libros dixitais, chegando xa a acordos (aínda sen asinar), resultando especialmente complexo o cambio de modelo de negocio, onde os soporte físico, a impresión baixo demanda e o formato dixital poderían ter xestións independentes, o que a industria actual quere evitar.
Un dos grandes conflitos que existen nas negociacións entre editores e escritores son as contraprestacións por dereitos de autor, que nos e-books queren ser de entre o 25 e o 40%, cando en papel son de media dun 10%, aínda que iso responden ao feito de que os soportes físicos son máis caros,e o que buscan é que os ingresos por libro para o autor sexa independente do seu formato.
Na actualidade os editores están a traballar na dixitalización das obras (paso previo á súa oferta coma descarga) e incluso pretenden protexer aos libreiros, que poderían vender códigos de descarga, o que non deixa de parecer un parche temporal, xa que de cara ao público resultaría algo ridículo ter que desprazarse a unha libraría tradicional para mercar unha descarga (cando a operación podería realizarse dende a comodidade do fogar), e esta mesma fórmula é a que se rumorea que empregará Sony para convencer ás tendas de videoxogos para que vendan a consola PSPGo (e que parece condenada ao fracaso).
Pero os editores non poden relaxarse, e coma comenta Javier Martín, da axencia literaria Carmen Balcells, «debemos crear unha oferta antes de que haxa demanda porque se non atopan o que queren o piratearán», lección que aprendeu polas malas a Industria discográfica.
Nas últimas semanas son moitos os rumores sobre o lanzamento de plataformas para libros electrónicos en Europa, e dende Planeta, Santillana e Mondadori cren que antes de rematar o ano pode haber novas e sorpresas a este respecto, de xeito que algún centro comercial podería comezar a vender dispositivos de lectura de xeito masivo, replicando o éxito do Kindle de Amazon (que en calquera momento tamén podería desembarcar a esta lado do Atlántico).
Tampouco hai que esquecer que a revolución editorial non podería chegar só á ficción, senón que incluso os libros de texto de primaria e secundaria poderían dixitalizarse a medio prazo, o que podería supor un duro golpe a moitos negocios tradicionais.

AGESTIC comprométese a traballar pola plena vida en liña das persoas con diversidade funcional

Fernando Sarasqueta — 2009-07-03T16:19:40Z

A Asociación Galega de Empresas de Tecnoloxías de Información e Comunicación (AGESTIC) celebrou esta semana en Santiago unha xornada encamiñada a atopar recursos contra a fenda dixital que afecta ás persoas con diversidade funcional ou que pertencen a sectores sociais con risco de exclusión. O encontro, desenvolvido no Centro de Novas Tecnoloxías de Galicia (Consellería de Traballo), serviu tamén para ir máis alá da simple localización do problema: o que se pretendía, en última instancia, é que o problema desapareza e os devanditos colectivos fagan o uso máis pleno das novas ferramentas de todos os usos posibles. Obxectivo: que se sirvan delas para mellorar a súa calidade de vida.
Entre outros participantes, a xornada contou coa colaboración da secretaria xeral de Familia, Susana López, para quen a tecnoloxía non é só información, tamén representa inclusión. Ao seu xuízo, ten que conducir, por forza, cara a unha sociedade máis xusta e integrada que teña máis en conta ás persoas.
Ao longo do encontro, informa AGESTIC, tamén se puído asistir á presentación de Iriscom na nosa terra, un dispositivo desenvolvido pola Fundación Tecnoloxía Social para as persoas con diversidade funcional que non poidan mover ningunha parte do seu corpo máis que os ollos.
A ferramenta permítelles que por medio da acción dos iris, poidan manexar o rato e o computador e poidan chegar a comunicarse plenamente. Segundo sinala a organización da xornada, en Galiza xa hai varios destes dispositivos nos fogares de varias persoas con este tipo concreto de diversidade.
Na xuntanza celebrada en Compostela tamén fixo acto de presenza o propio presidente de AGESTIC, José María López Bourio, quen anunciou que será el mesmo quen dirixa as actividades de afianzamento da FTS no noso país, co obxectivo de incrementar a dispoñibilidade de instrumentos doados de empregar polos devanditos colectivos sociais e contribuír así a incrementar a súa calidade de vida. Por certo que no encontro tamén participou arreo o investigador Enrique Varela, quen aproveitou a ocasión para dar a coñecer o dispositivo Kapten, ferramenta tecnolóxica para guiar ás persoas invidentes a través de GPS e cun sistema que non precisa de pantallas. O aparello, que funciona coa voz, respóndelle ao usuario cando este lle fala (co fin de emprazalo no vieiro axeitado). Segundo se sinalou durante a xornada, FTS Galicia ten a intención de dalo a coñecer polo miúdo poñéndoo en xogo durante o Ano Xacobeo e guiando, a través do sistema, a un nutrido grupo de peregrinos ao longo do Camiño do Santiago.

A UDC edita unha revista con feitura blog para difundir o coñecemento entre a sociedade

Fernando Sarasqueta — 2009-07-03T15:30:28Z

As redes xa non só lle dan fondo ás publicacións tradicionais, é que tamén lle dan feitura. Este foi precisamente o obxectivo dos responsables da revista U+S que vén de editar a Universidade da Coruña a través da Vicerreitoría de Cultura: falar de cuestións vinculadas á innovación e con formato de innovación. A revista, que xorde co obxectivo de servir como ferramenta de achegamento entre a entidade académica e o contorno social e empresarial da Coruña e Ferrol, ten un claro compoñente de divulgación dos logros científicos do noso tecido investigador. Isto, con todas as dificultades que até o de agora obstaculizaban o camiño (certa desconexión e falta de diálogo entre a sociedade en xeral e a comunidade científica), pretenden levalo a cabo os responsables da publicación a través do aproveitamento de canles que xa son de uso popular. Así, non é casualidade que a revista teña aspecto de blog, tanto para facilitar o seu manexo como para facer máis doada a súa lectura.
Segundo informa a UDC, o traballo en cuestión, que se presentou na mañá deste venres 3 de xullo, ofrece un abano do labor que se desenvolve nos campus, nun tempo no que a Universidade non só aposta pola docencia de calidade, senón tamén pola investigación e a transferencia tecnolóxica e de coñecemento, bases do que ben podería ser a solución máis firme para os problemas económicos e produtivos que vive arestora o mundo. Dito doutro xeito: a cabeceira nace con vocación de ser unha ferramenta para incrementar a competitividade das empresas da contorna, sexan do sector que sexan.
Liña moderna e innovadora
Nun eido máis concreto, dicir que U+S é un proxecto posto en marcha en colaboración co Consello Social da Universidade, órgano encargo de visibilizar o contacto coa sociedade. A liña que segue a publicación é, como dixemos, moderna e innovadora, orientándose todos os elementos dispostos a ir alén da comunicación universitaria para abranguer outros ámbitos e espallalos plenamente. Gráfica e conceptualmente, sosteñen os seus responsables, quere sumar campus e sociedade, encaixando perfectamente na visión e nos obxectivos do Consello Social.
Polo que respecta aos contidos, dicir que o abano semella ben variado: ofrécense artigos de opinión, entrevistas e reportaxes sobre aspectos tan diversos como a experiencia profesional de titulados que teñen acadado o éxito profesional nas súas diferentes áreas ou se dedican a algunha actividade especial despois de pasar polas aulas.
Máis polo miúdo, inclúese reportaxes sobre o último Observatorio Ocupacional, entrevistas co presidente do Consello Social (Antonio Abril) e o vicerreitor de Relación Universidade-Empresas (Luís Barral), artigos de opinión dos vicerreitores de Cultura e Comunicación, Luís Caparrós, e de Investigación, Concepción Herrero, ou completos informes sobre proxectos de investigación (o labor da OTRI e do viveiro de empresas da Universidade ou de firmas externas como Begano, “un dos buques insignia no tecido empresarial coruñés que cumpre arestora o seu 50 aniversario”).
A UDC distribuirá 2.000 exemplares en papel ecolóxico entre institucións e empresas da área metropolitana da Coruña e Ferrol e, en forma de newsletter aos membros da comunidade universitaria coruñesa.

Burgos aposta polo Wi-Fi público e sostible

Fernando Sarasqueta — 2009-07-03T15:30:12Z

O Concello de Burgos vén de mover ficha a prol da Internet pública como alternativa aos espazos e situacións onde non hai privada. E faino a través de infraestrutura Wi-Fi para escenarios concretos: os emprazamentos de uso público para o lecer e o esparcemento. A iniciativa, de nome WiFi Bur, está a contar en materia tecnolóxica coa empresa Gowex e o seu desenvolvemento WILOC, plataforma de publicidade e contidos xeolocalizados que permite a posta en marcha “dunha rede municipal sostible e rendible no tempo”, segundo informa a compañía.
Por certo que no emprego desta tecnoloxía en concreto, WiFi Bur é a primeira que lle tira partido no eido público-local, ficando a disposición dos veciños da cidade nas tres piscinas municipais, na biblioteca Gonzalo de Berceo, no centro cultural do Barrio de Cortes e no Teatro Municipal. A previsión é a de ampliar a infraestrutura con cobertura total para despois do verán. Na imaxe, Juan Catalán (GOWEX), cos concelleiros burgaleses Eduardo Villanueva e Bienvenido Nieto.
Máis polo miúdo, WILOC (Wi-Fi Location) ten o obxectivo de xerar ingresos publicitarios a través dunha infraestrutura das devanditas características e facela viable economicamente. A plataforma, sinala Gowex, está deseñada como un modelo de negocio e unha vantaxe competitiva “na explotación dunha rede municipal Wi-Fi, porque, alén de permitir a sostebilidade, actúa acorde coa regulación do sector das telecomunicacións”.
Polo que respecta ás outras dúas características fundamentais que pon en xogo, xeolocalización e contextualización, sinalar que o que se pretende con isto é informar de xeito automático dos servizos e contidos (incluída publicidade) dispoñibles na zona de conexión do usuario, xa que o punto de conexión está localizado e personalizado. En palabras de Gowex, grazas a isto benefícianse os anunciantes (xa que fan medrar a súa presenza a través de campañas de promoción), os promotores e os concellos (rendibilizan os puntos de acceso grazas aos ingresos da publicidade en liña) e os usuarios, que reciben información máis á súa medida e servizos máis completos.

Guilty Gear 2: Overture chegará a Europa en setembro

Marcus Fernández — 2009-07-03T13:17:22Z

O xogo de loita Guilty Gear 2: Overture xa leva tempo nos mercados norteamericano e xaponés, pero finalmente 505 Games anunciou que vai comercializarse en Europa a partires do vindeiro 4 de setembro, cando este título exclusivo para Xbox 360 permitirá retomar a saga de Guilty Gear dun xeito un tanto diferente aos seus predecesores, pois en vez de optar á tradicional loita en dúas dimensións de un contra un, desta volta presenta acción tridimensional e convértese nun beat'em up.
Este xogo mesturaría acción con estratexia en tempo real, e poderemos elixir entre varios personaxes para enfrontarnos aos inimigos coa axuda dunha lexión de leais seguidores. Aparte da campaña para 1 xogador, tamén será posible gozar dun modo multixogador en rede para 4 usuarios ou para 2 en local.

Estabilizador para gravar vídeo co iPhone 3GS

Marcus Fernández — 2009-07-03T13:08:17Z

A posibilidade de gravar vídeo foi unha das novidades do iPhone 3GS, pero aínda que a cámara teña enfoque automático, estabilizar as tomas non é doado, e para os usuarios máis esixentes dende a tenda en liña de Zacuto venden o Zgrip iPhone PRO, un accesorio que equivale a unha steadicam en miniatura, de xeito que permite que os movementos das gravacións co móbil de Apple non sexan moi bruscos, aínda que o seu prezo é bastante elevado, pois está á venda a 295 dólares (210,67 euros), o que resulta un investimento bastante elevado para gravar vídeo a unha resolución de só 640 x 480 píxeles (parecendo máis razoable mercar unha cámara de vídeo antes que intentar mellorar as tomas cun móbil).
De feito, utilizar accesorios para mellorar as gravacións co móbil parece unha práctica ridícula, xa que a vantaxe de utilizar un teléfono para captar vídeo é que o levamos sempre enriba, non a súa calidade, e ter que cargar cun complemento para realizar gravacións sería case tan molesto como transportar unha cámara de vídeo.
De todos os xeitos, o Zgrip iPhone PRO non deixa de ser un invento curioso e bastante efectivo, coma podemos ver no seguinte vídeo:

Preparan unha serie interactiva galega para televisión, teléfono e Internet

Marcus Fernández — 2009-07-03T11:55:54Z

Olalla Sánchez dá a coñecer no seu blog que as irmás Sonia e Miriam Albert Sobrino, gañadoras do primeiro premio de animación da pasada edición do Festival Curtas na Rede pola súa peza Caligarismo, están a traballar en Ignoto, unha serie para Internet, televisión e teléfono que podería estrearse en decembro e que naceu inicialmente coma proxecto de fin de carreira de Comunicación Audiovisual (UDC) pero que agora busca converterse nunha das primeiras producións interactivas e profesionais rodadas en Galicia.
O proxecto busca que o espectador poida elixir o camiño que tomará a protagonista, a moza Susana Sampedro, episodio tras episodio, facendo ao público cómplice da historia, que tamén contará cunha versión tradicional.
Polo momento Ignoto conta xa cun episodio piloto gravado en A Coruña, Culleredo, Arteixo e A Estrada, para o que contaron coa colaboración de actores coma Xavier Estévez, Iván Marcos, Mariana Carballal e Roberto Tonecho Gómez.

O grupo municipal coruñés do BNG estrea web

Marcus Fernández — 2009-07-03T11:37:00Z

O grupo municipal do Bloque Nacionalista Galego da cidade de A Coruña puxo en marcha unha páxina web de seu, na que dan conta dos traballos e proxectos que desenvolven dentro do goberno municipal, que pretende dar unha visión diferenciada á que se publica na web oficial do concello herculino, centrándose nas concellarías do BNG.
O novo espazo inclúe un calendario coas actividades programadas por cada concellaría, as principais novas e anuncios realizados diariamente e mesmo unha sección para contactar co grupo municipal do BNG para realizar propostas e comentarios sobre a cidade e o Concello.

A rede WiMAX para achegar a Internet a 8 concellos do sur de Lugo avanza cara a súa posta en marcha

Marcus Fernández — 2009-07-03T11:16:14Z


Un home utilizando un portátil nun prado da Pobra de Brollón

A finais do ano pasado a Axencia Galega de Desenvolvemento Rural (AGADER) convocou un concurso para a adquisición e implantación dunha rede de telecomunicacións sen fíos de acceso á Internet de banda larga para os concellos do sur de Lugo, así coma o servizo de explotación da rede e a súa conservación, contando cun orzamento de 1 millón de euros e que debería concretarse en conexións WiMAX cunha velocidade mínima de 1 Mbps que se comercializaría a un máximo de 30 euros/mes (aínda que podendo optarse a velocidades maiores a prezos superiores). O proxecto pretende cubrir coma mínimo o 80% dos núcleos rurais de Carballedo, O Saviñao, Chantada, Taboada, Monterroso, Pobra do Brollón, Monforte de Lemos, Sober e Pantón (podendo chegar a espallarse á Peroxa, Nogueira de Ramuín, Palas de Rei e Rodeiro) e segundo publica La Voz de Galicia, a empresa contratada pola Consellería de Medio Rural está a piques de rematar o seu traballo.
De feito, onte mesmo o tenente de alcalde de Chantada, Alfonso Piñeiro, concertou unha entrevista con María del Mar Pereira, responsable da Secretaría Xeral de Modernización e Innovación Tecnolóxica (departamento que continuará o proxecto iniciado por Medio Rural) para discutir sobre a implantación da nova rede, instando a que entre en funcionamento no verán, momento no que acoden moitos visitantes ao concello lugués, polo que sería un momento ideal «para publicitar un servizo que vai ser un atractivo máis e moi importante para captar posibles novos residentes».

Os grupos de novas (newsgroups) avanzan cara a súa desaparición

Marcus Fernández — 2009-07-02T21:05:40Z

Nos comezos da Internet comercial, cando aínda non había nin Facebook nin foros vía web, tiñan moita importancia os newsgroups ou grupos de novas, que funcionan cunha tecnoloxía semellante á do correo electrónico, pero empregando coma destinatarios temáticas de interese en vez de persoas, e que incluso consultábanse dende as mesmas aplicacións informáticas utilizadas para ler o e-mail, pero a aparición de alternativas e a praga do spam provocou un éxodo de usuarios, de aí que hoxe Mercè Molist dedicase un artigo a xeito de obituario anticipado, pos asegura que dos 200 grupos de novas españois que chegaron a existir, só permanecen activos uns 20, e a propia RedIRIS anunciou que en abril de 2010 deixará de ofrecer este servizo «decadente e minoritario» ao que xa deron as costas a meirande parte de provedores de acceso á Internet e que para moitos é só unha canle máis para o intercambio de ficheiros.
Os newsgroups son agora un descoñecido para a meirande parte dos usuarios, e unha tecnoloxía que pese a non quedar obsoleta, non foi capaz de adaptarse ao seu público, que perdeu o interese en consultar uns medios inundados polo lixo. Todo apunta a que a medio prazo o servizo desaparecerá, e ninguén o botará en falta, posto que os foros, os blogs e as redes sociais atenden moito mellor as necesidades dos usuarios que os grupos de novas.

Bing comeza a ter en conta a Twitter nos seus resultados de busca

Marcus Fernández — 2009-07-02T20:46:46Z


Se buscamos "Ashton Kutcher Twitter" en Bing atopamos a conta do actor en Twitter

Leva meses rumoreándose que Google está a traballar nun sistema para tomar o pulso ás conversas que teñen lugar a través de Twitter, como un xeito de seguir a actualidade e así darlle relevancia en certas buscas, pero parece que Microsoft adiantouse, e Bing vén de engadir a Twitter nos seus resultados de busca, aínda que só en buscas específicas e para un número limitado de usuarios, pero xa indica de por si un interesante avance na busca en tempo real que aínda ten moito que evolucionar e podería supor unha compoñente diferencial na guerra dos buscadores que parece querer revivirse (pese a que Google está nunha posición moi forte).


Primeira mensaxe de Microsoft en Twitter

Na actualidade Bing non busca nos tuiteos senón que limítase a localizar persoas en Twitter e permitir visualizar as súas mensaxes de menos de 140 carácteres, pero dende o buscador xa avisan de que iso é só o comezo.
Pero non é o único achegamento que fai Microsoft en Twitter, senón que tamén vén de estrear unha conta de usuario nesta plataforma, cunha mensaxe na que falan da publicación do Kodu Game Lab para a Xbox 360. Polo momento é unha conta con pouca actividade, pero que xa supera os 6.500 seguidores, aínda que non é de agardar que a compañía de Redmond queira dar especial relevancia a este servizo pertencente a unha compañía allea e que incluso podería considerar coma un competidor.
A presenza de Microsoft en Twitter corre a cargo de Lou Gellos, Dominic Carr, Sandra LeDuc e Jeff Running, responsables de comunicación da compañía en distintos ámbitos.

Telefónica unificará as chamadas metropolitanas e provinciais baixo unha mesma tarifa

Marcus Fernández — 2009-07-02T20:02:48Z

A partires do vindeiro 1 de outubro Telefónica unificará as tarifas metropolitanas e provinciais segundo un documento interno da compañía, medida que afectaría a 4 millóns de liñas que non teñen contratado ningún tipo de servizo adicional.
Este esquema tarifario é o utilizado en países coma Alemaña, Francia, Italia ou Portugal, e suporá un cambio de prezos que reducirá o das chamadas provinciais aínda que incrementar o establecemento de chamada a 10 céntimos (fronte os 7,2 das chamadas locais e os 9,2 das provinciais).
Coas novas tarifas as chamadas metropolitanas e provinciais custarán 1,5 céntimos/minuto en horario comercial (de 8:00 a 20:00 horas de luns a venres) e 0,6 céntimos/minuto en horario reducido. Así, teriamos un incremento de prezo do 7% en chamadas locais en horario comercial, mentres que no resto de chamadas reduciríanse o prezo ata un 80%.
O cambio de tarifas non será percibido por preto dos 5 millóns de liñas con ADSL que hai na actualidade, que gozan de tarifa plana, e que na actualidade xeran o 65% do tráfico en telefonía fixa.

GDGT, a plataforma de redes sociais dos gadgets

Marcus Fernández — 2009-07-02T19:27:41Z

Os amantes dos trebellos electrónicos poden gozar a partires desta semana dunha nova plataforma de redes sociais chamada GDGT, obra de Ryan Block, editor xefe do blog tecnolóxico Engadget, e Peter Rojas, anterior profesional no mesmo cargo, polo que entendemos que estamos a falar dunha iniciativa claramente dirixida a un público tecnófilo.
En GDGT podemos crear un perfil persoal, crear unha listaxe de aparellos tecnolóxicos que posuímos, que desexamos ou que tivemos nalgún momento, así como facer amigos, aínda que a chave do sistema estará na base de datos xerada polos usuarios na que podemos atopar todo tipo de gadgets para despois comparalos ou simplemente para poder ver informacións, críticas e comentarios sobre os mesmos de cara a unha futura compra, polo que o éxito ou fracaso deste servizo dependerá en boa medida dos seus usuarios.
Para coñecer o seu funcionamento podemos ver un vídeo explicativo presentado por Veronica Belmont:

Os sintonizadores de TDT con disco duro deberán pagar 12 euros de canon

Marcus Fernández — 2009-07-02T19:04:01Z

Coa entrada en vigor do actual canon dixital anunciárase que os discos duros integrados en receptores de TDT quedarían exentos da taxa durante o primeiro ano de aplicación, de xeito que a partires de agora o receptores de Televisión Dixital Terrestre con capacidade de gravación en disco duro deberán pagar 12 euros para satisfacer os dereitos de propiedade intelectual dos contidos, o que é de agardar que se vexa reflectido en breve cun incremento directo do prezo destes produtos, suba que non será inmediata porque a taxa compensatoria aplícase na canle de distribución, ou sexa, que non afecta aos produtos que actualmente están nas tendas e almacéns.

- Electrónica de consumo / tres

A Xunta de Galicia compromete o seu apoio para crear o dominio .gal

Marcus Fernández — 2009-07-02T17:26:51Z


Representantes da Asociación Puntogal reunidos co actual presidente da Xunta hai uns meses

Esta mañá unha representación da Asociación PuntoGal conformada polo seu presidente, Manuel González, o vicepresidente, Camilo Regueiro, e o secretario, Daría Janeiro, foi recibida por Mar Pereira, secretaria xeral de Modernización e Innovación Tecnolóxica e de Presidencia, e Anxo Lorenzo, secretario xeral de Política Lingüística da Consellería de Educación, quen transmitiron á asociación o apoio da Xunta de Galicia para a creación dun dominio para a lingua e cultura galegas, o .gal.
Dende a Asociación PuntoGal deron conta das xestións que se levaron a cabo a prol da consecución dun dominio galego na Internet, e adiantaron que cara a finais de 2009 agárdase que ICANN publique a guía final na que consten todos os requisitos que deben cumprir as candidaturas para obter o dominio e que esperan poder recibir as primeiras solicitudes no primeiro trimestre do 2010.
A Asociación leva traballando dende 2006 nesta tarefa, e xa conta con numerosos apoios tanto particulares coma de institucións coma colexios profesionais, asociacións culturais, medios de comunicación, universidades, asociacións culturais e empresas.

R ofrécelles aos seus clientes rede de balde no móbil até finais de setembro

Fernando Sarasqueta — 2009-07-02T17:11:55Z

O operador galego R vén de anunciar unha interesante oferta para todos os seus clientes de móbil: a posibilidade de gozar de balde durante todo o verán do servizo de navegación de Internet a través do seu aparello. Amais do feito de ser gratuíto durante estes meses, unha das grandes vantaxes do servizo, informa R, reside no feito de que non sexa preciso consultar as contas do noso correo electrónico perante un computador: con só solicitalo no propio móbil, xa teremos na pantalla achega de correo. Amais, engade a operadora, cómpre engadir que se poñen a disposición dos clientes 50 megas de conexión á Rede a través do terminal, “e co engadido de que unha vez que se acadan os ditos 50 megas”, informa, “non se pagará o tráfico consumido por riba desa mesma capacidade, senón que, simplemente, a velocidade de navegación reducirase até os 64 Kpbs”.
Para quen estea interesado en darlle uso a este servizo, dicirlle que será de balde durante todo o verán para os clientes de móbilR, sen que medie compromiso de permanencia e, polo tanto, achegándose liberdade para a proba. “Finalizado este período de promoción, o 20 de setembro, o servizo custará 6 euros ao mes”, engade a operadora. Sexa como sexa, o custe do programa amplíase até os 12 euros ao mes se o que queremos non é unicamente consultar o correo e navegar de xeito esporádico, senón facer un emprego máis amplo da Rede pola vía do móbil. Neste caso concreto, a tarifa inclúe 250 megas. Por 19 euros, a capacidade de navegación sube a 1 xigabyte.

Mancomún salienta o papel da nosa comunidade de software libre na adaptación ao galego do Firefox 3.5

Fernando Sarasqueta — 2009-07-02T16:55:00Z

O Centro de Referencia e Servizos de Software Libre de Galiza, Mancomún, vén de manifestar a súa satisfacción polo papel despregado pola comunidade galega de deseñadores e usuarios de software libre (comunidade que coordina o dito Centro) na posta ao día da tradución á nosa lingua de todos os aplicativos máis populares da suite Mozilla, que, por certo, están dispoñibles para a súa descarga oficial co seu respectivo lanzamento. Entre as ferramentas e programas, prosegue Mancomún, amais do navegador Firefox 3.5 (éxito de descargas dende o intre mesmo en que se poñía a libre disposición da comunidade internauta, o martes 30 de xuño), o xestor de correo electrónico, Thunderbird; o administrador de axenda Sunbird e o contorno que os integra a todos nunha única interface, o Seamonkey. Por certo que para o Centro galego tamén ten especial importancia o feito de que se teña integrado para esta ocasión a tradución do aplicativo para o seu emprego en dispositivos móbiles, Fennec.
Para rematar, e facendo especial referencia aos atrancos postos hai un ano polo propio presidente da Fundación Mozilla (que chegou a dubidar en público da capacidade dos programadores libres galegos á hora de realizar a tradución do Firefox), Mancomún aproveita a oportunidade para salientar o bo facer do equipo que coordina no traballo de adaptación á nosa lingua desta nova achega do navegador e o seu contorno. Neste senso, engade o Centro, nos óptimos resultados dos traballos despregados tivo a súa ración de responsabilidade o feito de que se tratase dunha colaboración aberta, de aí que o proceso de esforzo colectivo siga aberto na páxina de tradución do web.
Sinalar que os aplicativos de Mozilla en galego están a ser empregados arestora por multitude de persoas, tanto no eido persoal coma no empresarial e na Administración pública.

As pezas gañadoras en convocatorias previas de Curtas na Rede, de ruta

Fernando Sarasqueta — 2009-07-02T16:16:35Z

O concurso Curtas na Rede está a afianzar a súa vertente móbil: non só se trata de que poidamos ver as pezas presentadas a través de Internet, é que nos saen tamén ao paso se visitamos os Telecentros de Comunicación que a Secretaría de Medios, organizadora do certame, ten espallados pola nosa xeografía. Malia non estar pechado ao cen por cen o programa de todo o verán, si que podemos ir adiantado certas localizacións onde haberá cine miúdo e, a pesar de non ser profesional, sobradamente estimulante. Por certo que o que se vai poder ver son as obras gañadoras nas tres últimas convocatorias de Curtas na Rede. Así, os xoves 2 e 9 de xullo, A tarde máis curta (así se chama esta iniciativa móbil previa á resolución da convocatoria 2009) chegará aos Telecentros de Verín, Betanzos e Chantada. Os días 16, 23 e 30, a iniciativa recalará nos espazos de acceso de Sarria, O Barco, Catoira e Vedra. Nas xornadas do 16, o 23 e o 28, farao en Oroso.
O horario, nun principio (pode haber variacións por celebrase outras actividades ou por dar acubillo á maior cantidade de público posible), é o seguinte: ás 20 horas darán comezo as proxeccións en todos os Telecentros devanditos e nas xornadas sinaladas.
A Tarde máis curta é unha iniciativa inserida dentro da campaña Comunícate, dirixida pola Secretaría Xeral cara a unha máis ampla promoción da dita rede de accesos. Por certo que as persoas interesadas en participar nesta edición en curso de Curtas na Rede, 2009, disporán de todo tipo de facilidades no tecido de Telecentros, non só nos intres dedicados ás proxeccións.
Polo que respecta á natureza mesma destes enclaves de conexión á Rede, dicir que se trata de espazos que dispoñen de material informática, equipo de videoconferencia, material audiovisual, pantallas de proxección e de plasma, así como outros sistemas de control que permiten recrear diferentes escenarios (actividades formativas, encontros, videoconferencias, presentacións audiovisuais) dependendo das necesidades técnicas do evento que se queira levar a cabo.

Firefox 3.5: máis de cinco millóns de descargas e subindo

Fernando Sarasqueta — 2009-07-02T16:10:00Z

O Firefox 3.5, dispoñible en galego dende o seu lanzamento mesmo (o martes 30 de xuño), vai cara a adiante coma un tren sen freos. Segundo se apunta na Rede dous días despois do intre en que se poñía a disposición da comunidade internauta mundial, o novo navegador de Mozilla xa foi alén dos 5 millóns e medio de descargas, e cunha cota de uso en vivo de arredor do 2,5% (e medrando). Este máis que salientable respaldo á nova achega da ferramenta aberta, que inclúe melloras importantes no seu motor e no tratamento da memoria (emprega menos capacidade do computador) vén dado en boa medida pola alta valoración que os usuarios da Rede lle dan ao seu sistema de plugins e extensións e á alta rendibilidade que incorpora en materia de rapidez.
A tenor de datos extraídos da web habilitada por Mozilla para amosarlle ao mundo en tempo real a cifra de descargas, downloadstats.mozilla.com, todo apunta a que ao longo da xornada do xoves 2 de xullo a devandita porcentaxe irá alén dos 6 millóns. Por certo que da cifra contabilizada até o de agora, máis de 5 millóns, uns 150.000 clicks foron efectuados dentro do territorio estatal.

Móbil para facer videochamadas na escuridade

Marcus Fernández — 2009-07-02T14:27:00Z

Samsung vén de introducir no mercado surcoreano o seu novo terminal de telefonía móbil Samsung SCH-W760, que inclúe unha pantalla AMOLED de 2,8 polgadas con resolución WQVGA, conectividade HSDPA de ata 7,2 Mbps e Bluetoth, lector de tarxetas microSD (inclúe unha de 8 Gb), sintonizador de televisión dixital S-DMB (só dispoñible en Corea), unha cámara de 3 Mpíxeles con flash e a posibilidade de captar vídeo con infravermellos, ou sexa, que funciona como cámara de visión nocturna, prestación moi habitual nas cámaras de vídeo domésticas, pero que sorprende ao incorporarse á cámara frontal dun móbil para facer videochamadas na escuridade.
O terminal mide 109 x 51.9 x 13.9 milímetros, pesa 114 gramos e está á venda por 580.000 wons coreanos (322,65 euros).

The Punisher: No Mercy sae á venda a través da PSN

Marcus Fernández — 2009-07-02T13:55:56Z

O personaxe de cómic creado por Gerry Conway, John Romita, Sr. e Ross Andru, The Punisher (El Castigador en España) xa saltou de medio en varias ocasións contando con 3 películas de pouco éxito e 2 videoxogos (un clásico para recreativas e un menos representativo título que saíu hai uns 4 anos para móbil, PC, Xbox e PS2) e hoxe chega tamén á PlayStation 3 a través do xogo descargable The Punisher: No Mercy, do que tamén pode descargarse unha demo de balde.


Ilustración de M. Deodato para o xogo co personaxe de Silver Sable

Este título elaborado por Zen Studios é exclusivo para a consola de Sony e está á venda por 7,99 euros, o que dá a entender que non estamos ante unha obra que pasará á historia, limitándose a ser un xogo de acción en primeira persoa que fai uso do motor gráfico Unreal Engine 3 e que foi desenvolvido pensando no público multi-xogador (con 6 modos distintos de ata 8 xogadores).
Para contentar aos seguidores de Frank Castle na súa loita vingativa contra o crime, The Punisher: No Mercy contará coa aparición de personaxes coñecidos coma Puzzle (Jigsaw), Buschwacker, Jenny Cesare, Microchip, Finn Cooley, o carismático Barracuda e incluso a atractiva Silver Sable, presentes no modo historia fóra de liña, no que tamén poderemos ver ilustracións exclusivas de Mike Deodato.


Os usuarios poderán personalizar aos personaxes do xogo de cara a enfrontamentos multi-xogador

Trailer de The Punisher: No Mercy

Reloxo que conta os largos que facemos na piscina

Marcus Fernández — 2009-07-02T13:24:00Z

Os acelerómetros están moi de moda grazas ao seu uso en dispositivos coma o iPhone ou o Wiimote, que utilizan esta tecnoloxía para detectar movementos para xogos ou para detectar a posición na que se emprega un trebello, pero os seus usos poden ser máis variados, e a británica Swimovate integrou un no seu reloxo de pulso somerxible Pool-Mate para permitir contar o número de largos que un nadador fai durante os seus adestramentos (sempre que a piscina mida máis de 10 metros), de xeito que así permite consultar información estatística coma o tempo transcorrido, o número de brazadas por volta, a velocidade, a distancia e as calorías queimadas.
O reloxo Pool-Mate sairá á venda en xullo por 69,99 libras esterlinas (81,58 euros), e destaca fronte a outros trebellos semellantes polo feito de que o usuario non ten que premer un botón en cada volta, xa que o acelerómetro detecta este xiro sen importar o estilo de natación que empreguemos.

Explicación do funcionamento do Pool-Mate

Monitor USB rotatorio de 7 polgadas

Marcus Fernández — 2009-07-02T13:11:54Z

Os monitores secundarios por USB poden resultar prácticos para reservar un espazo no escritorio para aplicacións de mensaxería instantánea, reprodutores multimedia, monitores de estado e diversidade de widgets, resultando interesante entre ente tipo de trebellos o Mimo Mini USB Monitor, que funciona tanto en Windows coma en Mac OS X (en equipos con procesador Intel) conectándose a un porto USB 2.0 (non precisando de alimentación externa) e presentando unha imaxe de 800 x 480 píxeles na súa pantalla de 7 polgadas rotativa, de xeito que opera tanto en vertical coma en apaisado, de xeito que pode adaptarse a multitude de contidos.
Desafortunadamente o seu prezo é un tanto elevado, e en Think Geek o teñen á venda por 129,99 dólares (92,36 euros).


O Mimo Mini USB Monitor non precisa de alimentación adicional

Os profesionais do audiovisual galego poderán solicitar bolsas para formarse fóra

Raquel Noya — 2009-07-02T12:37:41Z

O Consorcio Audiovisual de Galicia, no marco do seu Plan de Promoción e axudas aos profesionais galegos, vén de convocar a sétima edición das súas bolsas para a ampliación e perfeccionamento de estudos no eido audiovisual, que distribuirá 30.000 euros entre os profesionais do sector para que accedan a cursos especializados impartidos en centros de formación de recoñecido prestixio.
Estas axudas, segundo veñen de anunciar os seus responsables, “son esenciais para o Consorcio Audiovisual de Galicia xa que o obxectivo é fomentar a formación, co fin de favorecer o desenvolvemento e a consolidación dos profesionais do sector audiovisual galego”. A isto hai que sumarlle o grande interese e as numerosas solicitudes que orixinaron as anteriores convocatorias e os positivos resultados obtidos polos beneficiarios, que levou a que a entidade incrementase a contía das bolsas, de 18.000 euros (o importe doado no 2003) aos 30.000 actuais, que permiten cubrir, ademais do importe da matrícula, outros gastos relacionados co desprazamento e a estancia dos bolseiros nas cidades onde se realizan as actividades polas que lle foron concedidas as bolsas.
As actividades formativas, que se poden realizar en centros do resto de España ou estranxeiros, deberán ter lugar entre setembro de 2008 e xuño de 2010 (ambos meses incluídos) e non poderán tratarse de cursos en liña.
Tampouco se poden beneficiar destas axudas aquelas persoas que realizan cursos destinados á obtención dunha licenciatura, diplomatura ou título de doutoramento nin os que teñan intención de realizalos en Galicia.
A selección dos beneficiarios realízase, segundo vén de anunciar o Consorcio, a través dunha Comisión “que presta especial interese a aquelas actividades que pola súa novidade ou interese estratéxico repercuten máis positivamente no conxunto do audiovisual galego”. A Comisión valora, asemade, a traxectoria académica e/ou profesional do solicitante, o recoñecemento tanto no Estado como no estranxeiro do centro de estudos e a memoria na que cada solicitante xustifica a súa solicitude indicando os obxectivos previstos coa realización do curso ou actividade formativa.
O anuncio da resolución pola que se convocan estas axudas publicarase este mes no Diario Oficial de Galicia.
Ata a presente convocatoria, as actividades máis beneficiadas nas anteriores edicións foron as de interpretación, xestión, cámara, fotografía, produción e dirección, edición, documental, guión, dirección escénica e son.
Grazas a estas axudas, os profesionais do audiovisual beneficiarios puideron formarse en destinos tan diversos como Alemaña, Cuba, Inglaterra, Madrid, Francia, Arxentina, India, Barcelona ou Estados Unidos, entre outros, onde se atopan centros de recoñecido prestixio tales como a New York Film Academy, o Estudio Internacional do Actor Juan Carlos Corazza, a Fundación TVI Actors Studio, a London Film School, a Escola Internacional de Cine e Tv de San Antonio de los Baños (Cuba), a Universidade Pompeu Fabra, a Escola de Guión e Creatividade GuionArte en Bos Aires, o Instituto Nacional do Audiovisual en Francia, a Media Business School, a ESCAC, a Asian Academy of Film & Television ou International Center of Photography de Nova Iorque.

Traballo e a CEG potenciarán o portal SALT

Marcus Fernández — 2009-07-02T12:20:02Z


A conselleira de Traballo e Benestar, Beatriz Mato, asinou co presidente da Confederación de Empresarios de Galicia, Antonio Fontenla, un convenio de colaboración para a ampliación e o mantemento do portal SALT, que recolle información para licitacións internacionais

A conselleira de Traballo, Beatriz Mato, asinou un convenio de colaboración para 2009 e 2010 co presidente da Confederación de Empresarios de Galicia (CEG), Antonio Fontenla, coa finalidade de manter e ampliar os servizos prestados dende o Servizo de Licitacións Internacionais da CEG a través do portal SALT. Este servizo ten coma obxectivo ofrecer oportunidades de negocio á empresa galega no mercado dos organismos multilaterais de desenvolvemento e mellorar a presenza das PEME galegas no mercado internacional.
Segundo o convenio asinado, a Consellería de Traballo subvencionará parte das accións incluídas na plataforma web, coma un servizo de alertas que avisa en tempo real ás empresas adheridas sobre os proxectos e licitacións que se publican. Dada a complexidade destes procesos internacionais, levarase a cabo tamén un plan de formación dirixido a empresarios, como directivos, técnicos especializados e bolseiros. Tamén financiaranse estudos de investigación que faciliten o coñecemento deste mercado, un plan de promoción institucional para fomentar o servizo e un programa de contratación de especialistas neste ámbito.

Skype estrea versións para Windows e iPhone

Marcus Fernández — 2009-07-02T11:56:09Z

Tras o lanzamento do Skype 3.0 para Windows Mobile chegan agora tamén as versións da aplicación de mensaxería instantánea e VoIP para o iPhone e para Windows. A aplicación de escritorio do Skype chega así á súa versión 4.1, e aparte de certas depuracións deste programa para Windows, incorpora melloras de calidade na transmisión de audio e vídeo, recordatorios de aniversarios e compartición de pantalla (característica idea para amosar novas creacións ou a realización de presentacións remotas).
O Skype 1.1 para o iPhone e iPod Touch engadiu o soporte de idiomas adicionais (entre os que está o español e o portugués nas súas variedades portuguesa e brasileira), acceso á caixa de voz de Skype, o envío de SMS a nivel internacional (con prezos de 13,3 céntimos/mensaxe en España, 10,3 céntimos/mensaxe a EE.UU. ou 9 céntimos/mensaxe en Venezuela, Uruguai, Paraguai, Panamá, Honduras e Marrocos). Para a súa instalación é preciso contar co iPhone OS 2.2 ou superior.

AETIC leva ata Compostela o seu manifesto, A solución é TIC

Raquel Noya — 2009-07-02T11:55:16Z


Rafael Valcarce Baiget, presidente do Consello Territorial de AETIC en Galicia e vicepresidente de Ineo

O Consello Territorial de AETIC, a Asociación de Empresas de Electrónica, Tecnoloxías da Información e Telecomunicacións de España, vén de anunciar que o vindeiro martes, día 7 de xullo, vai celebrar o acto de presentación do manifesto A solución é dixital, ao que están convidados, entre outros, o presidente de AETIC, Jesús Banegas Núñez e o presidente do Consello Territorial de AETIC en Galicia e vicepresidente de Ineo, Rafael Valcarce Baiget.
Á xornada, que terá lugar no Centro de Novas Tecnoloxías de Galicia, en Santiago de Compostela, tamén asistirá a directora xeral de Formación e Colocación da Xunta de Galicia, Ana María Díaz López así como o director xeral de I+D+i, Ricardo Capilla Pueyo e a secretaria xeral de Modernización e Innovación Tecnolóxica, Mª del Mar Pereira Álvarez.
O acto dará comezo ás 12 horas, coa intervención da directora xeral de Formación e Colocación da Xunta de Galicia, Ana María Díaz López, quen lle dará a benvida aos asistentes.
Posteriormente, e logo das intervencións de Rafael Valcarce, Jesús Banegas e Ricardo Capilla, a secretaria xeral de Modernización e Innovación Tecnolóxica, Mª del Mar Pereira, en representación do presidente da Xunta, desenvolverá o relatorio, Medidas adoptadas na Xunta de Galicia para o impulso e desenvolvemento do sector eTIC.
A finalización do acto está prevista para as 13:15 horas.

Gmail optimiza o seu sistema de etiquetas

Marcus Fernández — 2009-07-02T11:41:07Z


Ao acceder a Gmail aparece unha mensaxe advertindo dos cambios no sistema de etiquetas

Os usuarios que hoxe accederon a Gmail atopáronse cun importante cambio no servizo de correo electrónico de Google, que mellorou considerablemente o seu sistema de etiquetas, que adoptan unha nova ubicación (xusto debaixo dos cartafoles do servizo, tomando unha aparencia semellante aos mesmos), poden agocharse (nun principio a web amosará só as etiquetas máis utilizadas, deixando o resto ocultas, aínda que é posible personalizar este comportamento) e permiten a cualificación de mensaxes con etiquetas cunha mera operación de arrastrar e soltar.
Con estes cambios entendemos que as etiquetas compórtanse cada vez máis coma cartafoles, deixando de estar aloxadas nun recadro moi diferenciado, o que achega unha estética máis limpa e cómoda.

A Rede de Dinamización ten programados preto de 200 obradoiros para desenvolver este mes

Raquel Noya — 2009-07-02T10:49:39Z

Pese a que son moitas as persoas que no mes de xullo aproveitan para coller vacacións e desconectarse totalmente de Internet e de todo o que require estar en contacto coas novas tecnoloxías, tamén hai outro sector da poboación galega que tira proveito do seu tempo libre para familiarizarse máis con este tipo de ferramentas e poñerse ao día en todo o relacionado coas TIC.
Os dinamizadores e dinamizadoras do noso país, sabedores de que o seu labor é fundamental para a inclusión na Sociedade da Información dos galegos e galegas con menos facilidades para facelo por sí mesmos, teñen proxectados para este mes de xullo, un total de 185 novos obradoiros, algúns dos cales xa están en marcha e outros moitos irán dando comezo nesta e nas vindeiras semanas.
A variedade temática é a principal característica da programación que se vai desenvolver nesta tempada de verán en tódolos Centros de Dinamización da xeografía galega; temática tan variada, se cabe, como o tipo de público que se achegará a cada un dos locais da Rede para formarse nalgunha materia concreta das TIC, que soen ser dende nenos e nenas de entre 5 e 12 anos, ata persoas maiores de máis de 65 anos, pasando por persoas adultas con variopintas ocupacións e adolescentes que buscan nas ferramentas tecnolóxicas unha utilidade axeitada aos seus quefaceres diarios.
Da morea de cursos e obradoiros que a Rede de Dinamización tén programados para desenvolver ao longo deste mes de xullo, cabe destacar algunha actividade como Manexo do móbil, que se desenvolverá en Allariz, Videoxogos, en Vilar de Santos, Trámites coa administración pública, no Centro Comarcal Terra de Lemos, Álbum de fotos en Internet: Flickr, Picasa..., en Teo, Debuxo por ordenador, en Vilasantar, Telefonía por Internet, en Valga, Iniciación á Informática: Linux, en Moaña, Manexo básico da cámara dixital, na Asociación de Empresarias da Coruña ou Mecanografía en Poio.
Asemade, as charlas e coloquios que os/as dinamizadores galegos programaron para desenvolver nestes meses de verán, son do máis diverso e actual polo que resultarán de interese para calquera persoa cun mínimo de curiosidade por adentrarse na Sociedade da Información. Así, no Concello de Allariz, os alumnos e alumnas que se acheguen ao seu Centro de Dinamización, terán a oportunidade de adentrarse no que son as redes sociais en Internet, un tema moi de moda, que non deixará impasibles aos asistentes.
Por outra banda, en Castrelo de Miño falarase da seguridade na Rede, mentres que en Riotorto informarase sobre o manexo do SIXPAC.
Os veciños e veciñas do Vicedo aprenderán a usar a banca electrónica, mentres que os de Lugo, verán como instalar Galinux. En Cerceda, os e as asistentes que non decidan pasar o día no parque acuático, poderán achegarse ata o seu Centro de Dinamización e adquirir información sobre como solicitar unha cita médita por Internet, e en Mondoñedo e Sada, os relatores aconsellarán ás persoas asistentes para a adquisición dun ordenador persoal axeitado.

Os usuarios franceses de Canal+ terán vídeo baixo demanda na Xbox 360

Marcus Fernández — 2009-07-01T21:54:11Z

As consolas de videoxogos de nova xeración de alta definición levan tempo traballando para converterse en auténticas plataformas multimedia, e os nosos veciños franceses van poder facer un uso realmente especial da súa Xbox 360, xa que de estaren abonados a Canal+ poderán acceder dende a consola a un catálogo de máis de 3.000 películas e series de televisión baixo demanda, así como a algúns partidos de fútbol en pago por visión, podendo chegar no futuro a espallarse este revolucionario servizo a outros produtos do Canal+ francés ou a outras plataformas de Microsoft.
Este tipo de prestación podería animar a moitos usuarios a adquirir unha Xbox 360, pois é de agardar que permita ver en alta definición boa parte dos contidos, o que é altamente atractivo, así como tamén permite ter unha pantalla máis para acceder aos contidos de pago da plataforma de televisión por satélite.
En Reino Unido Microsoft tamén chegou a un acordo semellante coa canle BSkyB, mentres que en España seguimos sen saber se teremos algún servizo semellante (aínda tampouco nos podemos queixar, pois somos un dos primeiros países en incorporar o Bazar de vídeo de Xbox LIVE).

González-Sinde confirma ao videoxogo coma arte

Marcus Fernández — 2009-07-01T21:47:00Z

A ministra de Cultura, Ángeles González-Sinde, foi a encargada de inaugurar a V Feira Internacional do Lecer Interactivo Gamelab 2009 que terá lugar en Xixón ata o día 3, momento que aproveitou para dar a súa opinión sobre o estado actual do sector dos videoxogos, que é unha das apostas do ministerio, posto que hai pouco foi recoñecido polo Goberno coma pertencente á cultura (algo que era evidente, especialmente tras superar á música e ao cine en volume de negocio). González-Sinde asegurou que «o videoxogo é unha das artes», destacando que o sector ten «grandes posibilidades de desenvolvemento se atopan as ferramentas axeitadas para poder competir».
A loita contra a piratería, a conxuntura actual da Internet e o lecer dixital ou o canon dixital tamén foron temas tratados pola ministra, destacando que o polémico canon volverá a abordarse en 2010, cando procurará achegar as posturas de empresas, fabricantes, internautas e asociacións de consumidores.
Deixando a un lado a intervención de González-Sinde, hai que recoñecer que o evento chega nun momento decisivo para o sector, no que puidemos ver coma o estudo español Digital Legends foi seleccionado por Apple para dar a coñecer as prestacións para o xogo do iPhone 3G a través do título de acción Kroll, Novarama destacou no E3 cos seus revolucionarios Invizimals, MercurySteam está a traballar nunha nova entrega de Castlevania e incluso os estudos GRIN teñen oficinas en Barcelona.


Desafortunadamente o Gamelab 2009 está a ter unha nefasta política de comunicación

Por desgraza, o Gamelab 2009 non parece que vaia ser relevante para dar a coñecer todo este fenómeno, e a súa política de comunicación é nefasta, pois parece ser que o seu medio oficial é estranxeiro (e non está a publicar nada neste momento sobre o evento nin na súa web principal), a súa páxina web oficial non foi actualizada durante a xornada de hoxe, supostamente fixeron unha aposta polas redes sociais pero na práctica a súa conta de Flickr carece de imaxes (de feito, non atopamos imaxes sobre a presente edición do Gamelab en Flickr, nin sequera fotografías publicadas polos asistentes), o seu grupo de Facebook carece de actividade, a súa canle de vídeo en YouTube está totalmente baleira e a súa conta de Twitter leva dúas semanas sen actualizar. Agardemos que en vindeiras edicións aprendan destes erros, e procuren facer algunha cousa ben en vez de moitas mal.

As imaxes en Flickr xa poden tuitearse automaticamente

Marcus Fernández — 2009-07-01T21:41:02Z

Os usuarios de Flickr levan tempo podendo configurar nas súas contas os distintos blogs que administran para poder publicar as súas imaxes nos mesmos dun xeito rápido e doado, e agora tamén poden facer o mesmo con Twitter grazas á chegada da característica oficial chamada Flickr2Twitter, que despois de que o usuario autorice a Flickr a acceder á súa conta de Twitter, contará coa opción de publicar as súas imaxes na plataforma de microblogging coma se fose un blog máis.
Esta prestación pódese utilizar tanto nas imaxes propias como as que se atopen en Twitter e que pertenzan a outros usuarios, o que fará que en breve nos afagamos a ver ligazóns a imaxes dende o dominio flic.kr (que é o que emprega Flickr para atallar as súas imaxes, de xeito que o enderezo http://www.flickr.com/photos/399421... aparecería coma http://flic.kr/p/6AZig4).

Kodu Game Lab facilita a creación de xogos sinxelos para Xbox 360

Marcus Fernández — 2009-07-01T20:14:00Z

Facer videoxogos non ten por qué quedar restrinxido a grandes grupos de traballo, con altos coñecementos técnicos e moita dedicación, senón que case calquera usuario da Xbox 360 pode facer o seu propio xogo afeccionado grazas a Kodu Game Lab, unha aplicación que pode adquirirse a través do Bazar de Xbox LIVE por só 500 puntos (4,8 euros) e que combinando preto de 200 ferramentas de programación diferentes facilita a creación de xogos de plataformas, carreiras ou acción.
Coa aplicación créase un terreo e os seus accidentes xeográficos, incorpóranselle personaxes de todo tipo con certa vida e incluso pode incorporarse un modo cooperativo para un máximo de 4 xogadores (cun total de 20 personaxes predeterminados con distintas habilidades).
As creacións elaboradas con Kodu non serán moi avanzadas, pero incluso poden compartirse cos amigos a través de Xbox LIVE, aínda que a ferramenta pode entenderse coma un xogo en si mesmo, resultando incluso máis divertido crear un xogo que gozar do mesmo.

Impresións sobre Kodu durante a celebración do CES 2009

More Kodu Info

Exemplo de xogo de plataformas creado co Kodu Game Lab

Google lembra que os dominios .yu desaparecerán o 30 de setembro

Marcus Fernández — 2009-07-01T18:16:03Z

Os dominios de Internet non son algo eterno, e así moitos servizos dos que utilizabamos hai anos foron pasando á historia, o que fai que deixen de funcionar as ligazóns aos mesmos e os seus enderezos de correo electrónico o que ocasiona non poucos problemas, e para que a xente vaia tomando medidas, dende Google lembran aos administradores de páxinas web que o dominio que correspondía a Iugoslavia, o .yu, deixará de operar o vindeiro 30 de setembro, polo que todos os dominios de segundo nivel con tal terminación quedarán inoperativos, de xeito que os seus administradores deberán planificar migracións a dominios alternativos, recomendando dende Google que se realice a operación o antes posible, para que se poidan marcar nas páxinas actuais coma redireccións ao espazo novo, para non perder así a súa relevancia nos buscadores.
O certo é que non existen moitos precedentes de peches dun dominio de primeiro nivel, pero a experiencia será moi útil de cara ao futuro, xa que é moi posible que a historia se remita con dominios esponsorizados ou incluso con algún ccTLD coma os .tv, que poderían desaparecer ante a fraxilidade da illa á que corresponde tal sufixo de Internet (que podería desaparecer nos vindeiros anos).

O Goberno indica que a normalidade é a tónica dos primeiros apagamentos analóxicos

Fernando Sarasqueta — 2009-07-01T18:00:44Z


Mapa da primeira fase de actuación do apagamento

O Ministerio de Industria vén de dar a coñecer o primeiro parte de incidencias sobre a evolución do proceso de apagamento analóxico que se está a dar en determinadas áreas xeográficas do territorio estatal. A xuízo do Goberno, os primeiros ceses de emisións da Fase I do Plan Nacional de Transición á TDT están a desenvolverse con normalidade. Cómpre lembrar que o apagamento comezou o pasado 27 de xuño, cando se oficializou o cese de emisións en analóxico para 14 concellos do leste de Cantabria, proseguíndose cos traballos o día de onte, co peche da anterior tecnoloxía (o sinal da televisión que todos coñecemos) noutras 17 áreas de 13 comunidades autonómas e das cidades autónomas de Ceuta e Melilla.
Deste xeito, engade o Ministerio, o paso definitivo e sen volta atrás cara á TDT chegou e chegará á súa fin os vindeiros días nas primeiras 18 contornas xeográficas, abranguendo a máis de 3.000.000 millóns de cidadáns.
En 13 das devanditas, prosegue, os traballos xa foron completados, o que atinxe a máis de 1.500.000 cidadáns. Fican polo tanto aínda co sinal analóxico 5 áreas da Fase I (Cuenca, Madrid Norte, Mataró, el Ripollés e Zaragoza) por mor do que o Ministerio cualifica de razóns estritamente técnicas.
A idea é culminar esta primeira etapa antes do vindeiro 15 de xullo. Por certo que o 22 deste mes, entrarán no proceso catro zonas máis do territorio estatal, pertencentes a Andalucía e Canarias. Para resolver calquera dúbida que lles poida xurdir aos cidadáns, Industria recomenda acceder á web www.televisiondigital.es ou ben chamar ao teléfono 901 2010 04.

King of Fighters e Worms rexurden na Xbox 360

Marcus Fernández — 2009-07-01T16:50:37Z

KOF '98: Ultimate Match é unha adaptación do xogo de loita que saira para PS2" title="KOF '98: Ultimate Match é unha adaptación do xogo de loita que saira para PS2" style='height:281px;width:500px;' />Os usuarios da Xbox 360 poden adquirir dende hoxe por 800 puntos (9,6 euros) o clásico xogo de loita King of Fighters '98 Ultimate Match, que hai pouco máis de 10 anos trunfara en máquinas recreativas e agora volve con poucos cambios (ou sexa, sen mellorar os seus gráficos para adaptarse á alta definición) como a semana pasada fixo Garou: Mark of the Wolves, aínda que baseándose na versión para PlayStation 2, en vez de a orixinal de NeoGeo, o que se traduce en contar co dobre de xogadores, así como dun modo de xogo en liña.
Worms 2 presenta gráficos adaptados á alta definición" title="Worms 2 presenta gráficos adaptados á alta definición" style='height:281px;width:500px;' />Pero para moitos este lanzamento no Bazar de Xbox LIVE é insignificante se o comparamos á outra estrea do día, Worms 2: Armageddon, un agardado título que continúa unha saga moi querida no PC á que se engade modo multixogador en liña e fóra de liña para 4 xogadores, compatibilidade con ordes de voz, multitude de armas, novos modos de xogo e uns gráficos que neste caso si están adaptados á alta definición.
O prezo deste xogo tamén é de 800 puntos (9,6 euros), e agora tócalle ao público decidir se os 10 anos que tardou en saír esta secuela pagou a pena.
De ambos títulos hai versión de demostración descargable de balde, aínda que do segundo xogo tamén podemos facernos unha idea co seguinte vídeo:

O SERGAS optou pola virtualización na súa renovación de servidores

Marcus Fernández — 2009-07-01T16:29:59Z

O Servizo Galego de Saúde (SERGAS) desenvolveu durante 2008 un proceso de consolidación de servidores apiado na liña de produtos VMware, Infrastructure Enterprise, o que renovou a súa infraestrutura tecnolóxica, de xeito que valéndose da virtualización o SERGAS fíxose cunha plataforma de Tecnoloxías da Información estable, de ampla escalabilidade e rápido despregue.
Esta renovación de infraestrutura levou á substitución de 129 servidores físicos por servidores virtuais, reducíndose o tempo necesario para dotar de servidores a novos servizos, maior dispoñibilidade de sistemas, aforro de consumo enerxético (de 150 KW) e redución do espazo físico para o aloxamento do centro de datos.

As librarías británicas Borders venderán un lector de libros electrónicos por 189 libras

Marcus Fernández — 2009-07-01T16:15:50Z

Os lectores de libros electrónicos poderían comezar este ano a ter algunha repercusión en Europa, e á espera de que Amazon achegue o seu Kindle ao Vello Continente, a cadea británica de librarías Borders vén de estrear un espazo para a venda de e-books na súa páxina web (con 45.000 títulos no seu catálogo) e anuncia que vai vender un dispositivo de lectura de Elonex (fabricante do que xa venden equipos informáticos) con 512 Mb de memoria interna con 100 libros clásicos precargados, pesa 180 gramos e inclúe unha tarxeta SD de 4 Gb e unha funda de pel por 189 libras esterlinas (221 euros) o que pensan que é un prezo atractivo (aínda que habería que lembrar que o Sony Reader pode adquirirse no Reino Unido por 179 libras esterlinas).
O director comercial de Borders, Peter Newbould, declarou que «a venda de libros dixitais aínda está na súa infancia», pero ven este sector coma un mercado de futuro, que podería axudarlles a captar novos clientes. O novo produto lanzárono por entender que vender outros dispositivos coma o iLiad a 40 libras non era viable, e así diríxense a un rango de prezos máis popular, aínda que haberá que agardar unhas semanas para ver o novo lector nas tendas.

O grupo TIC da Universidade de Vigo lidera a mesma en materia de colaboración coa empresa

Fernando Sarasqueta — 2009-07-01T16:00:00Z

As novas tecnoloxías da información poden levármonos á crise, pero tamén son, precisamente, as ferramentas que nos poden sacar dela. Como? Empregándoas de soporte, fondo e feitura para múltiples proxectos innovadores baseados no coñecemento. A fin de contas, pensar en Rede social ou Sociedade do Coñecemento é pensar arestora no futuro. O contrario que ocorre cun bo número de outros sectores produtivos. Proba desta vitalidade é o importante papel que están a xogar os equipos de innovación que na nosa terra traballan para impulsar o tecido económico, sexa dende o público, o privado ou o académico. Para a Universidade de Vigo, a situación está máis que clara: un dos departamentos que máis coñecemento e recursos lle achega á nosa maquinaria produtiva é sen dúbida o grupo de investigación de Tecnoloxías da Información. O equipo, sen ir máis lonxe, foi o que acadou as mellores cifras de facturación de toda a Universidade en contratos de I+D ao longo de 2008.
Integrado por 20 investigadores que desenvolven o seu labor dende a Escola Técnica Superior de Enxeñeiros de Telecomunicacións, áchase neste intre en estreita colaboración co sector empresarial, a través da área de enxeñería telemática, liderando dentro da institución académica a transferencia de innovación ao sector privado.
Á súa fronte atópase o catedrático Francisco Javier González Castaño, e baixo a súa batuta conseguiu ser un dos primeiros grupos do sistema universitario galego en acadar a máxima cualificación na convocatoria de consolidación e estruturación de grupos da Xunta de Galicia e, neste ano en curso, foi elixido como un dos dous departamentos da Universidade de Vigo que participan nas Unidades de Investigación Intensiva, iniciativa promovida pola Consellería de Innovación que xirará arredor da divulgación e máxima rendibilidade dos resultados da investigación dos grupos dos centros públicos galegos.
Segundo engade a Universidade de Vigo nunha extensa reportaxe sobre as accións e as liñas de traballo do devandito equipo, entre os espazos temáticos de traballo atópanse os seguintes: redes e servizos telemáticos como infraestruturas sen fíos, servizos móbiles, redes de altas prestacións ou hardware para comunicacións e/ou intelixencia artificial. Por certo que nos seus logros ten repercutido, amais do traballo constante e unha idea firme dos camiños a seguir, o feito de que os seus integrantes sexan profesores con intereses afíns que comparten, tamén, unha completa experiencia no eido da empresa.
Este factor favorece o emprego dunha linguaxe común e, en consecuencia, séntanse as bases do seu principal éxito: a transferencia de investigación cara ao tecido produtivo.
A día de hoxe, a súa actividade céntrase en colaborar co CESGA e máis a Universidade de Santiago no proxecto integrado BeinGrid, unha iniciativa vinculada ao cálculo de tratamentos de radioterapia en computadores remotos de alta rendibilidade.

A Rede de Dinamización supera as 40.000 persoas inscritas

Raquel Noya — 2009-07-01T13:50:20Z

A Rede de Dinamización da Sociedade da Información vén de dar conta dos usuarios e usuarias que, dende a súa creación en xaneiro de 2007, pasaron polos seus Centros de toda Galicia, e a cifra rexistrada a finais do pasado mes de xuño non puido ser máis satisfactoria: o total de persoas inscritas neste tempo foi de 40.670.
Xa nas últimas catro semanas, a Rede rexistrou 11.303 usos diarios das instalacións da Rede, nas que se impartiron 183 obradoiros e aos que asistiron máis de 1.000 usuarios.
Asemade, no mes de xuño, cubríronse preto de 1.700 horas con cursos, así como coa posta en marcha, en numerosos Centros de Dinamización, da Memoria dos Oficios, que segue executándose actualmente en moitos deles.
En resumidas contas, a actividade da Rede de Dinamización, lonxe de descender co paso do tempo, non fixo máis que subir como a escuma e os datos así o reflicten: dende a súa posta en funcionamento, os obradoiros levados a cabo foron 4.908, nos que se formou a 31.865 persoas durante 40.670 horas formativas. Asemade, o número de iniciativas foi igualmente moi elevado, ao rexistrarse máis de 350, todas elas cun alto grao de participación que elevou a cifra total a 14.352 persoas.

Avilés, cualificada na Rede como modelo a seguir en cuestión de Wi-Fi público

Fernando Sarasqueta — 2009-07-01T13:50:16Z

En cuestión de Wi-Fi, todo semella acabado de saír dunha fase de probas. Non podía ser doutro xeito: trátase dunha tecnoloxía de acceso á Internet, sen fíos, nova, en proceso de melloras e de regulamento. Con todo, na súa implantación ao longo e ancho do territorio estatal estanse a localizar, a xuízo dos especialistas, algúns exemplos a seguir. Ou sexa, puntos fixos para elementos que se moven: a innovación e a distancia que nos separa do coñecemento. Para webs como ADSLZone ou Lavidawifi, entre estes modelos atópase a vila asturiana de Avilés, espazo urbano onde se vén de poñer en marcha un proxecto de 7 millóns de euros de investimento para achegar Wi-Fi de balde en zonas públicas como o casco histórico, o paseo marítimo, os campus e as bibliotecas. A iniciativa, presentada ao detalle polo Concello no Encontro sobre Telecomunicacións, ten unha característica que en certa maneira a diferenza doutras propostas do mesmo pau: é de balde e permite velocidades de entre 10 e 20 megas, cunha capacidade de rede que posibilita a conexión de até 400 usuarias e usuarios de maneira simultánea.
A infraestrutura, que inclúe 66 antenas e 13 quilómetros de fibra óptica, non é nova. En realidade, está xa habilitada dende abril de 2007, sendo a media de emprego de máis de 3.000 conexións ao mes. O que si que é novo é o pulo que se lle está a dar no Concello, incrementando a súa capacidade e favorecendo a participación.
Polo que respecta aos posibles problemas de competencia desleal que se poidan desprender do feito de que un goberno local ofreza un servizo de balde en substitución dunha iniciativa privada que xere negocio, o Concello xa saíu ao paso en constantes ocasións: o seu obxectivo, di, non é competir cos operadores senón achegar acceso de balde aos cidadáns que permita conexións á Rede de alta velocidade e levar a cabo trámites coas administracións pola vía do dixital. Dito doutro xeito: sinalan os responsables que non supón un atranco para que ningún operador de telecomunicacións. De feito, engaden, tendo en conta que o 98% da poboación da cidade xa ten banda larga no seu fogar, non semella que se poida falar dunha gran cantidade de veciños que estean a dar de baixa os servizos privados en beneficio da opción pública.
Por certo que segundo explica Lavidawifi, o modelo de Avilés respecta a legalidade establecida polo miúdo pola CMT (Comisión do Mercado das Telecomunicacións), xa que é unha empresa a que actúa como cliente e pagadora da terminal, sendo a través de patrocinios e publicidade como se favorece que a rede sexa sostible.

Mans libres sen fíos con base para distintos tipos de telefonía

Marcus Fernández — 2009-07-01T13:31:43Z


O Jabra GO 6400 é ideal para utilizar no escritorio

Os sistemas de mans libres sen fíos non están só ao alcance dos terminais de telefonía móbil, senón que tamén poden aplicarse á telefonía fixa, e Jabra atende esta demanda con dous novos sistemas de auriculares con micrófono: o Jabra GO 6400 que emprega tecnoloxía Bluetooth e o Jabra PRO 9400 que emprega tecnoloxía DECT (conseguindo unha maior cobertura). Ambos sistemas funcionan a través dunha base que integra unha pantalla táctil capacitiva (por contacto) de 2,4 polgadas para axustar o volume, remarcar números e incluso conmutar entre tipos de chamada (cada base pode manexar liñas fixas, móbiles e incluso chamadas de VoIP).
Estes sistemas de mans libres incorporan dous micrófonos para poder aplicar así tecnoloxía de redución de ruído, e recárganse conectándoos á súa base correspondente coma se dun teléfono sen fíos se tratase.
Haberá que agardar a setembro para ver estes novos dispositivos á venda.


O Jabra PRO 9400 opta pola tecnoloxía DECT para dar unha ampla cobertura

Listarobinson.es permite inscribirnos para non recibir publicidade non desexada

Marcus Fernández — 2009-07-01T13:07:09Z

A Axencia Española de Protección de Datos (AEPD) presentou un servizo de Lista Robinson por Internet desenvolvido pola Federación de Comercio Electrónico e Marketing Directo (FECEMD) que permite aos consumidores inscribirse para non recibir comunicacións comerciais non desexadas por correo postal, correo electrónico, teléfono fixo e móbil (incluso por SMS).
Esta listaxe pretende converterse nun ficheiro de referencia e apóiase no regulamento aprobado en decembro de 2007 que obriga ás empresas, institucións e organizacións a consultar os ficheiros de exclusión antes de lanzar unha campaña publicitaria que utilicen datos persoais que figuren en fontes públicas (coma directorios telefónicos ou censos). O servizo será de balde para os consumidores, mentres que as empresas que desexen consultalo deberán pagar entre 150 e 550 euros.
Hai que destacar que a efectividade do ficheiro non se percibirá ata 3 meses despois da inscrición (xa que as compañías non consultan as listaxes de exclusión en tempo real), e non suporá unha blindaxe absoluta fronte á publicidade que recibimos hoxe en día (especialmente a través da Internet, onde non hai fronteiras) e incluso existe o temor de que os datos do servizo rematen empregándose de xeito perverso.

As empresas e comercios de Celanova, a disposición dos internautas nunha soa web

Raquel Noya — 2009-07-01T10:49:07Z

O Concello de Celanova, na súa teima por facer posible que todas as empresas e establecementos da comarca conten coa súa propia páxina web e se dean a coñecer por Internet (algo impensable ata hai só uns anos), vén de presentar a plataforma Compraencelanova.com, un proxecto cofinanciado entre a Consellaría de Traballo e Benestar e o propio Concello, que reúne nunha única web aos empresarios e comerciantes do lugar que participan na iniciativa.
Cada sitio, segundo afirman os seus responsables, “é dinámico e administrable de maneira individual”, polo que nel, os propios empresarios poden publicar todo tipo de información de interese relacionada coa súa actividade, dende os datos de localización ata os servizos ofrecidos, pasando por formularios de contacto ou novas relacionadas coa empresa.
Trátase dunha iniciativa global levada a cabo dende o devandito concello ourensán que permite que cada negocio ou empresa xestione a súa páxina como se fose unha web independente, ao tempo que se beneficia das vantaxes de aparecer nunha listaxe conxunta onde o cliente pode dar con ela facilmente.
Esta iniciativa, segundo veñen de anunciar os responsables da mesma, “é pioneira a nivel municipal xa que pretende integrar todos os negocios que desenvolven a súa actividade dentro da área xeográfica de Celanova”.
Tanto se os empresarios contan xa con páxina web propia como se non dispoñen dela, o verdadeiro atractivo desta plataforma, afirman, “radica na oferta de conxunto, pois ao conseguir que practicamente toda a rede comercial de Celanova se presente baixo un único rexistro, fai que o efecto divulgador se vexa multiplicado dun xeito exponencial”.
A ferramenta contén, ademais da listaxe de empresas adheridas ao proxecto ordeadas alfabeticamente por actividade con cadansúa ligazón, unha sección de novas, información do Mercado de Celanova, vídeos relacionados coa actividade comercial e ata un calendario coas datas do mercado, que pese a que está en construcción, os responsables aseguran que “estará dispoñible en breve”.
Na actualidade, a aplicación conta con 185 negocios adheridos, os cales teñen a súa propia web particular, á que se pode acceder directamente a golpe de rato.

Arranca con éxito o proxecto multimedia de formación, Comunícate

Raquel Noya — 2009-07-01T10:11:51Z

O Centro Multimedia de Galicia de Santiago de Compostela foi o escenario escollido onte pola Rede de Telecentros de Comunicación de Galicia (RTC) para desenvolver a primeira xornada da campaña Comunícate, consistente nunha serie de titoriais interactivos para facilitarlle aos usuarios e usuarias o uso e coñecemento das novas tecnoloxías no ámbito da comunicación.
A xornada, tal e como anunciamos onte, deu comezo ás 17:00 horas, e contou coa participación do xornalista e blogueiro Nacho Mirás Fole e coa xefa do Servizo de Programación Multimedia da Secretaría Xeral de Medios, Felicitas Rodríguez.
No marco desta campaña, que a Secretaría Xeral de Medios desenvolve para poñer a cidadanía en contacto coas ferramentas virtuais de comunicación, a Rede de Telecentros de Comunicación de Galicia (RTC) vai presentar un total de doce titoriais interactivos, o primeiro dos cales se deu a coñecer onte con éxito.
Foi o xornalista e blogueiro galego Nacho Mirás o encargado de introducir e presentar este titorial desde o Centro Multimedia de Galicia, mostrándolles aos asistentes cómo se poden subir vídeos e imaxes á Rede de xeito doado, para poñelos a disposición de outros internautas. A xornada púidose seguir a través de videoconferencia nos Telecentros de Comunicación de Oroso, Catoira, Abegondo, Lugo, Verín e O Barco de Valdeorras, onde os interesados poderán traballar co titorial, que queda así accesible, a partir de hoxe, nos distintos TC da Rede de Telecentros de Comunicación para o seu uso.
Na súa charla, Nacho Mirás realizou, asemade, un percorrido pola situación actual da blogosfera galega, desde a súa dobre vertente de xornalista e blogueiro. Mirás situou o ano 2005 como punto da verdadeira explosión da blogosfera galega, un ano no que “o que tiña sido un avance discreto racha completamente a súa tendencia e se estende ata o punto de poder analizarse coma un fenómeno de masas, cunha forte penetración”, apuntou.
Mirás analizou, entre outros aspectos, o paralelismo entre os medios de comunicación e os blogs ou bitácoras na Rede, facendo fincapé en que “os segundos non só suporán, como se cría nun principio, a desaparición dos primeiros, senón que ambos se poden complementar”.
No tocante á campaña desenvolvida pola RTC, segundo explicou a xefa de Servizo de Programación Multimedia da Secretaría Xeral de Medios, Felicitas Rodríguez, os titoriais, desenvolvidos en Flash, “están pensados para un público con escasos coñecementos informáticos e tratarán sobre distintos temas relacionados co mundo das novas tecnoloxías no ámbito da comunicación e cos distintos servizos e oportunidades que a rede ofrece na actividade diaria da cidadanía: o acceso á banca electrónica, a administración electrónica, a formación on-line, as redes sociais…”

YouTube estrea un centro de vídeos para reporteiros

Marcus Fernández — 2009-06-30T20:45:00Z

Os estudantes de xornalismo e os aspirantes a periodistas cidadáns que queiran saber un pouco máis de cómo realizar axeitadamente a labor de informar poden acudir ao Reporters'Center que vén de crear YouTube, no que se recolle vídeos no que participan xornalistas norteamericanos coma Bob Woodward (famoso polo caso Watergate), Ariana Huffington (editora do The Huffington Post), Katie Couric (presentadora de CBS News) e moitos outros, que dan consellos sobre temas diversos como o xeito de facer unha boa entrevista, cómo comezar a facer xornalismo cidadán ou trucos para video-xornalistas.
Sen dúbida agradecerán estes consellos os que queiran adentrarse no mundo do periodismo nalgún dos seus moitos ámbitos, respectando principios amplamente aceptados, á vez que coñecendo algúns trucos prácticos da man de profesionais de peso.

Mostra de contidos do Reporters'Center