Código Cero - Diario Tecnolóxico de Galicia

Tecnoloxía galega rumbo á Feira Magic Internacional de Barcelona

Fernando Sarasqueta — 2008-11-20T19:05:00Z

Actividade de presentacións nunha das anteriores edicións do salón catalán

Eganet, a asociación TIC galega, vai ter presenza na nova edición da Feira Magic Internacional, que se vai celebrar no Palacio de Congresos de Barcelona entre os días 28 e 30 de novembro. Máis concretamente, a pegada galega no devandito encontro (destinado a informar da actualidade internacional en materia de paraciencia e terapias alternativas) virá da man de ElMuelle, empresa que contará con stand propio especialmente habilitado para esta xuntanza. A achega da devandita firma en Catalunya, que dispón para esta actividade do respaldo do IGAPE e máis da Consellería e Economía, materializarase principalmente en dar a coñecer as súas solucións en novas tecnoloxías de liñas 806 e servizos sobre liñas 902 e tpv virtual. Asemade, informa a propia empresa galega, estás previstas no dito stand unha serie sesións de proba da plataforma de servizos de cobros con tarxetas de crédito a través de tpv virtual: www.etpv.es.
Trátase este dun espazo-servizo en liña desenvolvido de xeito íntegro por ElMuelle e que, entre outras moitas cousas, achega a posibilidade de facer efectivo o cobro de calquera servizo cunha tarxeta de crédito, “de xeito que se deixa marxe para as operacións en tempo real sen necesidade de dispoñer de contas bancarias ou de ter contratado un tpv cunha entidade financeira”, sinala a firma da Pobra, ao que engade que o único requisito esixido para tirar rendemento deste recurso é o de ter un acceso á Rede.
A ferramenta, que ten tras de si un ano de traballo intensivo de construción e desenvolvemento, está arestora en proceso de posta a punto, de aí que até o de agora non fose obxectivo de ningunha presentación oficial. “No mundo globalizado de Internet”, comentan os responsables de ElMuelle ao respecto do carácter innovador da solución que agora dan a coñecer, “os pagos en liña e a facilidade de poñer estes medios ao alcance da man de calquera profesional que precise cobrar con tarxetas de crédito os seus servizos, tanto para as súas webs como para vendas de comercios físicos, constitúe ao noso xuízo unha moi importante vantaxe”.
Sobre Magic Internacional
Segundo informa Eganet nun comunicado en liña, o gran obxectivo do salón Magic Internacional é dar a coñecer a existencia do sector espiritual e alternativo á sociedade actual e activalo cultural e economicamente mediante a divulgación e promoción de empresas e profesionais. Arestora, engade a asociación TIC, constitúe o evento máis grande deste tipo que se celebra en Europa.

MSI presenta os seus ordenadores todo-en-un para 2009

Marcus Fernández — 2008-11-20T17:44:00Z

Cando Asustek introduciu no mercado os seus populares ultraportátiles Eee PC emerxeu o MSI Wind para facerlle a competencia (e parece que no mercado español está a imporse este tipo de equipos nas súas versións clónicas de Medion, Advent e Ahtec), e agora que lanzan o equipo de sobremesa Eee Top dende MSI responden co Neton, que é un equipo todo-en-un que se venderá en 3 tamaños distintos que van dende as 15,6 ata ás 22 polgadas. Están baseados en procesadores Intel Atom, podéndose elixir entre 1 ou 2 núcleos na súa configuración (segundo se configure con Windows XP ou Vista). Tamén contará coa opción de pantalla táctil.

O MSI Wind Neton M16 ten unha pantalla de 15,6 polgadas cunha resolución de 1.366 x 768 píxeles, que non sería realmente un equipo integrado (xa que inclúe unha caixa que se coloca baixo o monitor e na que se inclúen os distintos portos e a gravadora de DVD) e se venderá a partir de febreiro por uns 400 dólares.
Un mes antes chegará ao mercado o MSI Wind Neton M19, que se venderá a uns 500 dólares e contará cunha pantalla de 18,5 polgadas tamén cunha resolución de 1.366 x 768 dólares, gozando xa da integración na propia pantalla de portos de expansión e gravadora de DVD, no que sería un interesante equipo completo para o usuario medio, polo seu prezo competitivo e atractivo deseño.
Pero o máis rechamante desta nova gama de produtos sería o MSI Wind Neton M22, que inclúe unha pantalla de 22 polgadas cunha resolución de 1.920 x 1.080 píxeles (FullHD) que mesmo conta coa opción de incorporar un lector de discos Blu-ray, sintonizadora de televisión ou mando a distancia e que terá un prezo base de 800 dólares a partir do mes de marzo. Estariamos claramente ante un equipo pensado para a reprodutor multimedia que podería unha interesante porta de entrada no vídeo de alta definición.

O MSI Wind Neton M16 non está totalmente integrado na súa pantalla

A revista PC Magazine abandona o papel

Marcus Fernández — 2008-11-20T16:59:00Z

A mediados de 1982 a editorial Ziff Davis comezou a publicar a revista PC Magazine nos EE.UU., resultando moi coñecida en España porque a súa marca foi a que utilizou a publicación PC Actual nos seus primeiros anos de vida. Pero esta histórica revista ten xa os seus días contados nos quioscos, xa que esta cabeceira de sona mundial chegará á rúa por última vez en xaneiro de 2009, centrando a súa actividade na súa edición en liña como reacción á caída dos ingresos publicitarios e da súa circulación.
A publicación chegou a ser a terceira de máis difusión nos EE.UU. (tras Time e Newsweek) pero segundo o seu director executivo, Jason Young, «dende o ano 2000 a Rede é o principal lugar onde os compradores de electrónica obteñen información e ao que os publicistas do sector dirixen os seus cartos», o que parece confirmar que na actualidade o 70% dos ingresos da revista proveñan da súa edición electrónica.
No mercado editorial español podemos ver nos últimos días unha operación semellante, pois o xornal Segunda Mano tamén deixa o papel para centrar a súa actividade na web.

Segunda Mano tamén deixa de editarse en papel

Gmail permitirá modificar a súa aparencia mediante temas

Marcus Fernández — 2008-11-20T13:46:00Z

Algúns dos temas que podemos elixir como aparencia de Gmail

O servizo de correo electrónico a través de web de Google goza de moito éxito, pero a súa aparencia era bastante sobria, polo que moitos usuarios optaban por acceder á web usando engadidos para o seu navegador que permitían personalizar a súa estética, e atendendo a tal demanda o Gmail incorpora hoxe 30 temas seleccionables que non se limitan a cambiar as cores da interface, senón que tamén presentan gráficos para facer máis atractiva a presentación desta web e mesmo contan cunha versión na que se emula ás vellas pantallas de fósforo verde.
Agardan que estas posibilidades de personalización (que deberían estar accesibles nas vindeiras horas) deberían agradar a moitos tipos de usuario, xa que son moi variadas: deseños para cativos, grafiteiros, artistas, aventureiros, romáticos…

Wheelman sairá á venda o 20 de febreiro

Marcus Fernández — 2008-11-20T13:13:18Z

O polémico xogo que presenta a Vin Diesel conducindo coches a toda velocidade e pegando tiros polas rúas de Barcelona, Wheelman, xa ten data de lanzamento, e Midway anunciou que chegará ás tendas europeas o 20 de febreiro (4 días despois que en EE.UU.) nas súas versións de Xbox 360, PlayStation 3 e PC.
Pese a que haxa políticos que non gusten que a súa cidade sexa escenario dun videoxogo violento (non escoitamos nada semellante co mundo do cine) este produto promete ter unha grande calidade, e está deseñado «como unha superprodución de Hollywood» en palabras do propio Vin Diesel, que se involucrou bastante no desenvolvemento deste título. Tamén asegurou que «xogar a este título será como tomar o control das meirandes persecucións de coches cinematográfica, excepto que desta volta ti estás no asento do condutor».
O xogo chegará soportado por unha campaña publicitaria multimillonaria, agardando un volume de vendas importante.

A CEF acolle este luns a presentación de varias ferramentas dixitais para a mellora da xestión

Fernando Sarasqueta — 2008-11-20T13:05:00Z

O Centro de Negocios CEF de Ferrol vai dar acollida este luns 24 á presentación dunha ferramenta tecnolóxica especialmente indicada para a actividade empresarial e o manexo do que probablemente sexa o principal ben das compañías: a información. Falamos da ferramenta BOFeed, da empresa Finantial Contents. A cita, que dará comezo ás 19.30, vai dirixida principalmente a profesionais e empresarios das bisbarras de Ferrol, Eume e Ortegal, aos que se lles porá a tanto nos usos e vantaxes do dito software, indicado para xestionar e orientar a actividade no mercado cara ao cliente á vez que achega coñecemento de oportunidades de negocio. A presentación de BOFeed, que conta co respaldo do Plan Avanza, completarase coa posta en longo do programa formativo Impulsa, encamiñado a achegar melloras na dirección das empresas. Máis polo miúdo, esta presentación correrá a cargo da firma responsable do recurso, Improvia, compañía especializada nos eidos da consultoría, formación e adestramento.
O programa Impulsa divídese en tres fases principais: formación ao directivo, fase de titorías personalizadas e preparación para estar ao mando dun equipo de traballo. Por certo que o programa Impulsa conta co financiamento do Instituto Galego de Promoción Económica, o IGAPE.

Auriculares con cancelación de ruído para o iPod

Marcus Fernández — 2008-11-20T12:26:16Z

Hitachi Maxell lanzará en decembro ao mercado xaponés os seus auriculares HP-NC20.IP para reprodutores multimedia iPod que incorporan tecnoloxía de cancelación de ruído e non precisan baterías extra (xa que se alimentan polo propio conector do iPod, o que afectará á autonomía, que a reduciría unha terceira parte). Pesan 22 gramos e o seu cable é de 95 centímetros.
Estes auriculares prometen ser capaces de neutralizar ruído ambiental de ata 20 dB e teñen unha frecuencia de resposta de entre 20 Hz e 20 kHz. Tamén inclúen control de volume deslizante e son compatibles con reprodutores iPod de 4ª xeración e iPod Touch, non operando co iPhone.

Mancomún publica unha imaxe do CD co OpenOffice.org 3.0.0 en galego

Marcus Fernández — 2008-11-20T12:20:00Z

Para facilitar a distribución do novo OpenOffice.org 3.0.0 en galego dende Mancomún publican unha imaxe do CD coas versións do paquete ofimático para distintos sistemas operativos, xunto co corrector ortográfico en galego.
O ficheiro descargable serve para gravar un CD autoexecutable que inclúe o OpenOffice.org 3.0.0 para Windows (versión completa co paquete de idioma), GNU/Linux (en formato DEB e RPM) e Mac OS X (a versión para a plataforma Intel). O resto de versión continúan estando accesibles dende a web de Mancomún.
Recomendan gravar a imaxe do CD con aplicacións coma Gnomebaker ou K3b (para GNU/Linux) ou InfraRecorder (para Windows).

Os polígonos industriais de Noia, Curtis, Boiro, Arzúa e Narón terán acceso á Rede de banda larga

Marcus Fernández — 2008-11-20T12:17:33Z

A Consellaría de Innovación e Industria dotará de redes de telecomunicacións sen fíos de acceso á Internet de banda larga aos polígonos industriais de Agualevada (Noia), Teixeiro (Curtis), Espiñeira (Boiro), Arzúa e Río do Pozo (Narón) a través de convenios de colaboración que se asinaron con alcaldes e tenentes de alcalde dos concellos correspondentes o pasado mércores.
O departamento de Fernando Blanco investirá un total de 1.029.421 euros para instalar redes WiMAX que leven a banda larga aos polígonos industrias mencionados antes do 15 de xuño de 2009, para o que a Consellaría xa adxudicou a subministración e montaxe dos equipamentos necesarios.
Con estas novas 5 incorporacións se acada xa a cantidade de 32 parques empresariais aos que Innovación e Industria achegará infraestruturas de banda larga sen fíos cun investimento total de 4,6 millóns de euros.

A Politécnica de Ferrol acolle hoxe obradoiros intensivos de informática

Fernando Sarasqueta — 2008-11-20T11:34:55Z

As novas tecnoloxías da información son un mundo por explorar e, como todos os territorios que nos son novos, requiren o uso de guía. Neste senso, o que podemos atopar semella interesante de abondo: participación social, comunicación en 360º, concorrencia na construción mesma da Rede dende os seus alicerces, posibilidades de dar a coñecer calquera cousa na que esteamos a traballar e intercambiar coñecemento, etc. Dar a coñecer polo miúdo todo aquilo que as canles dixitais poden facer nós (e todo o que podemos facer nós por elas) é un dos grandes obxectivos de Un guiño ás TIC, sesión de cursos enmarcados na Semana da Ciencia 2008 e previstos para hoxe na Escola Politécnica de Ferrol. Os encontros, organizados pola dita escola, comezan a partir das 10.00 horas e finalizan ás 20, a desenvolver en dúas quendas: unha de mañá e outra de tarde.
Como dixemos, a idea que sostén estes obradoiros vinculados á informática é unha idea orientativa e divulgativa: unha introdución real e virtual ás posibilidades de participación en liña.
En última instancia, o que se pretende é incrementar na medida do posible o rendemento que tiramos das novas tecnoloxías da información a través de melloras internas e (tamén) externas. Os obradoiros, que serán sobre todo de tipo práctico, xirarán arredor de traballos como a práctica da ensamblaxe dun computador ou a instalación dunha antena, ámbolos procesos co gallo de mellorar as prestacións da rede de datos sen fíos que poidamos ter na casa.