Estes días (hoxe e mañá) estase a celebrar na sede de Afundación en Vigo (Abanca) a cuarta edición do Congreso Espacial New Space España, organizado pola firma local de enxeñaría aeroespacial e novas ferramentas Alén Space, baixo o lema Autonomía estratéxica dende o Espazo.

O congreso está a xuntar máis de 280 asistentes, 130 empresas e uns 40 relatores durante o transcurso das dúas xornadas de traballo. Porase o foco en como fortalecer o potencial de España, España e Europea en materia aeroespacial.

Estanse a tocar temas como a soberanía tecnolóxica, a seguridade ou a colaboración público-privada. Interveñen (entre outras personalidades do sector) Cecilia Hernández, directora de programas da Axencia Espacial Española (AEE) ou Íñigo Mascaraque, responsable de Operacións de Celeste, da Axencia Espacial Europea.

A soberanía estratéxica e a autonomía tecnolóxica protagonizaron boa parte da primeira xornada, na que representantes de empresas, institucións e organismos públicos analizaron as capacidades coas que contan España e Europa para fortalecer a súa industria espacial, desenvolver tecnoloxías propias, atraer talento e competir nun mercado global. O desenvolvemento de novas infraestruturas e servizos espaciais e a colaboración entre o sector público e privado foron outros dos principais eixes do debate.

A apertura institucional contou coa participación de David Regades, delegado especial do Estado no Consorcio da Zona Franca de Vigo; Teresa Riesgo, secretaria xeral de Innovación do Ministerio de Ciencia, Innovación e Universidades; Román Rodríguez, conselleiro de Educación, Ciencia, Universidades e Formación Profesional da Xunta de Galicia; e Abel Caballero, alcalde de Vigo.

Os representantes institucionais coincidiron en “destacar a evolución experimentada polo sector espacial español e as oportunidades para reforzar a súa posición en Europa”.

David Regades puxo o foco no desenvolvemento de capacidades propias e no talento como un dos principais activos da industria.

Teresa Riesgo incidiu “no rápido avance do sector durante os últimos anos e na oportunidade de consolidar a España como un actor relevante a escala europea e internacional”.

O alcalde de Vigo, Abel Caballero, reivindicou o sector espacial como “un dos ámbitos chamados a desempeñar un papel relevante no futuro económico e tecnolóxico da cidade” e destacou “o alcance dun congreso que reúne tecnoloxía, economía, ciencia e investigación”.

Tamén interveu como dixemos o conselleiro de Educación e Ciencia, Román Rodríguez, que acudiu acompañado da directora da Axencia Galega de Innovación (GAIN), Carmen Cotelo.

Rodríguez resaltou que o sector espacial en Galicia deu un salto cualitativo con empresas referentes no ámbito internacional. “Son compañías capaces de estar na primeira liña do mundo, integradas en grandes redes empresariales a escala mundial“, expresou Román Rodríguez ao tempo que salientou “o importante potencial de Galicia no ámbito espacial, eido fundamental para a I+G+i”.

Ao seu xuízo, o sector espacial xa forma parte da nova economía galega, “con máis de 1.700 empregos e unha alta capacidade para xerar emprego cualificado, investimento e novas oportunidades empresariais“.

Lembrou que a Xunta de Galicia brinda o seu apoio a empresas como Alen Space, con ampla experiencia “e exemplo de conexión entre universidade e empresa”. “É unha demostración de como un coñecemento desenvolvido durante anos no ámbito académico pode acabar convertido nunha compañía tecnolóxica punteira”, segundo o titular de Ciencia.

Rodríguez e Cotelo tamén salientaron o apoio directo á transferencia de coñecemento, coma no caso das firmas galegas Uarx Space e Kreios Space, que, segundo sinalaron, “representan esa conexión entre investigación, transferencia e innovación, proxectando a marca Galicia Calidade tamén no ámbito espacial”. E engadiron: “Trátase de startups galegas con proxección internacional que están conseguindo situar a tecnoloxía desenvolvida en Galicia en proxectos de referencia mundial”.

Pola súa banda, o director xeneral de Alén Space e organizador do evento, Guillermo Lamelas, foi o encargado de dar a benvida aos asistentes, cunha intervención centrada nos retos actuais da industria espacial e na necesidade de transformar o investimento e as capacidades existentes en Europa nunha maior competitividade. Lamelas puxo sobre a mesa as diferenzas na dimensión dos fondos públicos destinados ao sector espacial, con ao redor de 13.500 millóns de euros en Europa fronte aos 80.000 millóns de EEUU, e sinalou a necesidade de que a industria europea sexa quen de aproveitar ao máximo os recursos dispoñibles. Así mesmo, incidiu no talento como un dos piares para seguir fortalecendo o sector: “Hai que apostar por programas de formación, en atraer talento, en facer carreira espacial”.

Comunicacións cuánticas

O conselleiro Román Rodríguez lembrou que no ámbito das comunicacións cuánticas “Galicia xa puxo en marcha a liña de comunicación cuántica máis longa de España, entre Santiago e Vigo, que agora se prolongará ata Valença e posteriormente ata Lisboa”. Ademais, dixo, “contamos coa estación óptica terrestre Antonia Ferrín, en Vigo, que permitirá ofrecer conexión satelital con misións europeas”.

Esta infraestrutura estará interconectada con outras estacións en Barcelona, Madrid e Lisboa e serán chave para a conexión co satélite Eagle-1, o primeiro sistema europeo de distribución de claves cuánticas baseado no espazo. O obxectivo é mellorar a seguridade das comunicacións en Europa mediante tecnoloxías cuánticas, abrindo novas posibilidades para a protección das comunicacións críticas.

Soberanía e autonomía para reforzar as capacidades europeas

A primeira mesa redonda da xornada, Soberanía e autonomía: a visión da industria, reuniu a representantes de Indra Space, Airbus, GMV, DHV Technology, Satlantis e o Ministerio de Ciencia Innovación e Universidades, para abordar as capacidades que necesita Europa para incrementar a súa autonomía e reforzar a competitividade da súa industria.

O debate puxo o foco no desenvolvemento europeo de tecnoloxías esenciais e na conveniencia de avanzar cara a sistemas cada vez máis distribuídos. Neste contexto, os expertos destacaron a interoperabilidade como unha das vías que poden favorecer unha industria europea máis colaborativa, capaz de integrar as capacidades tecnolóxicas desenvolvidas por diferentes países e compañías.

Misión Celeste, cara a unha futura constelación europea

A mañá continuou coa conferencia Misión Celeste: cara a unha futura constelación europea LEO-PNT, impartida por Íñigo Mascaraque, responsable de Operacións e Segmento Terreo de Celeste na Axencia Espacial Europea (ESA).

Durante a súa intervención, Mascaraque abordou o crecente interese internacional por incorporar sistemas de satélites en órbita baixa ás infraestruturas de posicionamento, navegación e sincronización, unha liña na que xa traballan diferentes iniciativas en Europa e outros mercados internacionais.

Mascaraque presentou os avances conseguidos por Celeste durante a súa primeira fase de demostración e destacou os resultados obtidos na xeración de sinais e prestacións de navegación. A folla de roteiro do proxecto contempla unha primeira fase con 22 satélites Pathfinder A e unha posterior con oito satélites Pathfinder B. O programa continuará desenvolvendo novas demostracións durante os próximos anos co obxectivo de avanzar cara a un futuro sistema europeo de navegación baseado tamén en satélites de órbita baixa para complementar as capacidades existentes.

OfiPro Solucións, S.L., compañía coruñesa especializada en software de xestión empresarial baixo un modelo SaaS, vén de ser adquirida por SoftNext, a división de software do grupo familiar francés de investimento a longo prazo Dellen.

OfiPro desenvolve e comercializa o ERP OfiPro, unha solución que integra facturación, xestión comercial, contabilidade, punto de venda e inventario nunha única plataforma dirixida a pemes e despachos profesionais.

A compañía ten a súa sede na Coruña e clientes en todo o territorio nacional, e construíu a súa posición apostando pola automatización e a simplicidade de uso fronte a solucións máis complexas do mercado.

Segundo informaron dende SoftNext, con esta operación, OfiPro incorpórase á dita empresa tecnolóxica “preservando a súa identidade, a súa marca e o seu equipo, e beneficiándose do respaldo de xestión, financeiro e tecnolóxico do grupo”.

O plan de SoftNext contempla acompañar o crecemento de OfiPro tanto no seu mercado actual como en novas liñas de produto, en liña coa estratexia da división, que combina crecemento orgánico coa incorporación de novas compañías de software en distintos sectores.

José Luis Rocha, socio fundador de OfiPro, declarou: “Esta operación abre unha nova etapa para OfiPro, que se incorpora a un grupo coa visión e os recursos necesarios para acompañar o seu crecemento, mantendo o proxecto e o equipo que o fixeron realidade”.

Pola súa banda, Álvaro Gella, responsable de Dellen en España, sinalou: “OfiPro encaixa perfectamente coa nosa filosofía de medrar xunto aos equipos que construíron cada proxecto, respectando a súa identidade e a súa forma de traballar”.

A operación desenvolveuse integramente con asesores galegos. Working Capital Corporate Finance, firma galega membro da alianza Iber Corporate Finance, actuou como banco de investimento e asesor financeiro dos vendedores, acompañando o proceso desde a súa fase inicial ata o peche, mentres que Ontax, con oficinas en Vigo, A Coruña e Madrid, actuou como asesor legal da operación.

O CITIC da Universidade da Coruña confirmou hoxe que xa está aberto o prazo de solicitude para participar na VII edición do programa educativo Talentos Inclusivos, unha iniciativa impulsada polo centro coruñés que combina tecnoloxía, innovación e inclusión e que está dirixida a centros educativos sostidos con fondos públicos dependentes da Consellería de Educación e Ciencia.

O programa do CITIC da Universidade da Coruña ten como principal obxectivo “achegar o alumnado ao ámbito da ciencia e da tecnoloxía mediante a súa participación en proxectos destinados a dar resposta a necesidades reais de persoas con discapacidade”.

En concreto, Talentos Inclusivos procura que a mocidade poida adquirir novas competencias tecnolóxicas ao tempo que traballa valores como a cooperación, a inclusión, a accesibilidade e a igualdade de oportunidades.

Os centros interesados en participar deberán presentar a súa solicitude por correo electrónico a asesoria.igualdade@edu.xunta.gal, indicando no asunto “Solicitude Talentos Inclusivos 2026-2027” e achegando o correspondente documento de solicitude.

O prazo permanecerá aberto durante 15 días naturais desde a publicación da convocatoria no portal educativo da Xunta de Galicia, contados desde o pasado 22 de setembro.

Alumnado de ESO, Bacharelato e Formación Profesional

A convocatoria está dirixida ao alumnado de Educación Secundaria Obrigatoria (ESO), Bacharelato e ciclos formativos de Formación Profesional.

Os estudantes participarán en equipos de traballo colaborativos xunto co profesorado dos seus centros, persoal investigador do CITIC da UDC, profesionais das entidades colaboradoras e persoas con discapacidade.

Cada equipo traballará sobre un reto tecnolóxico que será definido durante os vindeiros meses do proxecto a partir das necesidades e propostas das persoas usuarias dos centros colaboradores.

Cada reto poderá contar cun máximo de 10 alumnos e alumnas, mentres que cada centro educativo poderá participar en varios retos, cun máximo de 40 estudantes por centro.

Solucións tecnolóxicas para necesidades reais

O CITIC explica que “os proxectos desenvolvidos polo alumnado teñen unha aplicación práctica, debendo os equipos buscar solucións mediante a tecnoloxía que poidan contribuír a mellorar a autonomía e a calidade de vida das persoas con discapacidade”.

Entre as diferentes tecnoloxías que poderán empregarse atópanse os sistemas aumentativos e alternativos de comunicación, a realidade aumentada mediante Scratch, a robótica, a domótica de baixo custo, Arduino, Home Assistant, a impresión 3D e diferentes dispositivos destinados a facilitar o acceso ao ordenador.

Tamén se poderán desenvolver actividades de lecer accesibles mediante gamificación, utilizando ferramentas como Micro:bit, Playground ou Leap Motion.

“Deste xeito, o programa permite ao alumnado aplicar os coñecementos adquiridos na aula á resolución de problemas concretos e traballar en proxectos tecnolóxicos cunha finalidade social”, salienta o CITIC.

O alumnado, protagonista dos proxectos

Os centros participantes deberán favorecer o diálogo e a cooperación coas entidades de atención a persoas con discapacidade que colaboren no programa. Os estudantes terán que coñecer as necesidades das persoas usuarias e manter unha comunicación periódica con elas para avanzar no desenvolvemento dos retos.

O profesorado terá a función de coordinar e acompañar o alumnado, facilitando o desenvolvemento dos proxectos, mentres que o persoal investigador do CITIC proporcionará apoio técnico cando sexa necesario.

Ademais do traballo tecnolóxico, os centros participantes deberán organizar unha sesión de sensibilización sobre a discapacidade dirixida ao alumnado do centro, non unicamente a quen participe directamente en Talentos Inclusivos. A actividade pretende ampliar o coñecemento sobre a discapacidade e fomentar unha cultura educativa baseada na inclusión e na eliminación de barreiras.

Durante o curso celebraranse tamén reunións periódicas de seguimento. Está prevista, como mínimo, unha reunión mensual en liña por cada centro educativo, destinada a analizar a evolución dos retos e resolver as cuestións que poidan xurdir.

Apoio do CITIC

Unha vez asignados os retos, os equipos deberán elaborar unha listaxe cos materiais necesarios para desenvolver os seus proxectos. Esta relación deberá presentarse no prazo dun mes desde a asignación do reto. O CITIC encargarase de xestionar a adquisición dos materiais para os centros educativos participantes e ofrecer o apoio do persoal investigador do centro cando o alumnado atope dificultades que poidan impedir o avance dos proxectos.

As actividades do programa comezarán despois da publicación da resolución definitiva e desenvolveranse durante o curso académico 2026-2027.

Os centros deberán participar activamente nas diferentes actividades, cumprir os prazos establecidos e presentar os resultados dos retos desenvolvidos.

Ao finalizar o proxecto, cada equipo deberá entregar dúas copias da solución desenvolvida: unha para a correspondente entidade de atención a persoas con discapacidade e outra para o CITIC. Os centros educativos poderán utilizar posteriormente estes resultados con fins educativos.

O programa concluirá cun acto de clausura previsto para o 11 de xuño de 2027, no que o alumnado e o profesorado participantes presentarán os traballos realizados xunto co resto dos integrantes dos grupos colaborativos.

Sobre Talentos Inclusivos

Talentos Inclusivos é un proxecto desenvolvido polo CITIC (Centro de Investigación en Tecnoloxías da Información e as Comunicacións) da UDC (Universidade da Coruña) e ASPACE Coruña, e que conta co apoio do Consello Social da UDC, o Concello da Coruña, a Xunta de Galicia e a FECYT (Fundación Española para la Ciencia y la Tecnología) do Ministerio de Ciencia, Innovación e Universidades.

O seu obxectivo é espertar vocacións STEM (siglas de Science, Technology, Engineering and Mathematics) entre a mocidade e dar a coñecer a realidade da discapacidade a través de equipos colaborativos de traballo que desenvolven solucións tecnolóxicas a retos formulados por persoas con parálise cerebral.

A través deste proxecto, estudantes de secundaria, bacharelato e formación profesional de diversos institutos de Galicia deben procurar solucións tecnolóxicas a unha serie de retos propostos por persoas usuarias das entidades ASPACE Coruña, Amencer-ASPACE, APAMP e Cruz Vermella A Coruña.

Talentos Inclusivos conta tamén co apoio de persoas voluntarias de Inditex, que ofrecen asesoramento no desenvolvemento dos retos.

Nikon presentou a Nikon Z5IIC, unha nova cámara sen espello de formato completo (FX) con montura Z que combina un sensor full-frame con funcións automatizadas destinadas a facilitar o seu uso a quen se inicia na fotografía que chegará ao mercado o 15 de outubro a un prezo recomendado de 1.549 euros.

A cámara incorpora no dial de modos as escenas predefinidas, unha novidade entre as cámaras full-frame sen espello de Nikon. Permite escoller entre 15 situacións, incluíndo retratos, mascotas, comida, paisaxes nocturnas ou escenas de amencer e solpor. A partir da escena seleccionada, a Z5IIC axusta automaticamente máis de seis parámetros de captura, entre eles o balance de brancos e o Picture Control.

Tamén dispón dun botón específico para acceder ás receitas de imaxes, preaxustes creados por Nikon e por distintos creadores que permiten aplicar directamente determinados estilos de imaxe sen necesidade de realizar posteriormente a edición. O sistema de enfoque automático baseado en intelixencia artificial emprega tecnoloxías de aprendizaxe profunda para detectar os suxeitos e, no modo automático, pode analizar a escena e axustar parámetros como a apertura, a velocidade de obturación, a sensibilidade ISO e o enfoque.

A estabilización VR integrada ofrece ata 7,5 pasos de corrección no centro da imaxe (6 pasos nas zonas periféricas), mentres que a cámara pode realizar series de ata 14 fotogramas por segundo. O modo High-Speed Frame Capture + permite chegar aos 30 fps e, coa función Pre-Release Capture, gardar ata un segundo de imaxes tomadas antes de premer completamente o disparador.

O sensor CMOS retroiluminado traballa xunto co procesador EXPEED 7, o mesmo que emprega o modelo insignia da gama de Nikon. A combinación coa óptica NIKKOR Z está orientada a ofrecer unha maior calidade de imaxe ca a dun smartphone, con especial atención á reprodución das gradacións, o desenfoque do fondo e as escenas con pouca luz. Tamén incorpora a función Film Grain, presente na Nikon Zf, para aplicar un aspecto inspirado na película fotográfica.

O deseño busca facilitar o transporte e o uso cotián, cunha empuñadura ergonómica e un corpo con aliaxe de magnesio en zonas estruturais, ademais de protección fronte ao po e ás pingas. A pantalla táctil articulada de 3,2 polgadas permite disparar desde diferentes posicións e admite xestos como tocar dúas veces, ampliar ou reducir con dous dedos e deslizar. A Z5IIC estará dispoñible en negro e prata.

Inclúe gravación de vídeo 4K UHD a 60 fps (cun recorte ao formato DX) e Full HD a 120 fps, así como modos de cámara lenta a 4x e 5x. Unha luz REC e un indicador vermello arredor da pantalla permiten comprobar visualmente cando está en curso unha gravación. O modo Product Review facilita os vídeos nos que se achegan obxectos á cámara ao desprazar automaticamente o foco cara ao produto.

A Z5IIC tamén pode empregarse como webcam mediante USB grazas á compatibilidade con UVC/UAC e admite gravación H.265 de 10 bits e N-Log. Entre as opcións para creación audiovisual inclúese igualmente a gravación N-RAW de 12 bits nunha tarxeta SD.

A detección de suxeitos incorpora por primeira vez en Nikon a opción específica para peixes. A cámara pode transferir automaticamente fotografías a un smartphone mediante SnapBridge, aplicación que tamén engade unha función de simulación da cámara e contidos de aprendizaxe sobre fotografía. O equipamento é compatible, ademais, con Nikon Imaging Cloud para a xestión dos datos posteriores á captura.

O conselleiro de Emprego, Comercio e Emigración, José González, visitou esta mañá a Oficina de Emprego de Ourense Centro para poñer en valor a incorporación ao Servizo Público de Emprego de Galicia (SPEG) de novos simuladores de entrevistas de traballo baseados en intelixencia artificial.

Segundo explicou, esta nova ferramenta está actualmente en fase piloto e “permite ás persoas demandantes de emprego practicar entrevistas nunha contorna segura e similar á dun proceso real, a través dun avatar que formula preguntas e facilita o adestramento de competencias como a comunicación, a argumentación da experiencia profesional ou a presentación do perfil profesional”. Indicou tamén que ao remate da simulación, o sistema xera un informe coas fortalezas identificadas e os aspectos susceptibles de mellora que son traballados coa orientadora ou o orientador laboral.

Respecto do factor humano e o papel que xogará en consonancia con esta novidade tecnolóxica, o conselleiro apuntou que “a ferramenta non substitúe en ningún caso o labor dos profesionais, senón que se integra no itinerario personalizado de inserción laboral deseñado para as persoas que buscan emprego”. De feito, dixo, “é o persoal orientador quen determina cando resulta conveniente usala, adapta a simulación ás necesidades de cada perfil e acompaña o proceso posterior para garantir que esta práctica resulte realmente eficaz”. Os simuladores están xa dispoñibles en 17 das 54 oficinas de emprego de Galicia e a previsión é que este ano se beneficien deles arredor de 600 persoas.

A actuación enmárcase na modernización do SPEG, que conta este ano cun orzamento de 8 millóns de euros e no que se están incorporando novas ferramentas para ofrecer unha atención máis áxil, personalizada e eficaz.

A XGN Intermax World Champions Edition xa superou os rexistros da pasada edición a dúas semanas da súa celebración. A cita tecnolóxica, que se desenvolverá do 9 ao 11 de outubro na Feira Internacional de Galicia Abanca, en Silleda, conta xa con 877 inscritos, fronte aos 867 participantes que acadara en 2025.

A cifra aínda poderá medrar nas vindeiras semanas, xa que o prazo de inscrición permanecerá aberto tanto antes do comezo do evento como durante a propia LAN party. Esta 26ª edición chega baixo o nome de World Champions Edition, unha referencia á vitoria da selección española de fútbol no Mundial.

A XGN Intermax volverá reunir profesionais e afeccionados á tecnoloxía, a informática e o lecer electrónico a través das súas dúas grandes áreas. A Intranet estará reservada aos participantes rexistrados, que disporán dun posto con conexión de altas prestacións, aloxamento en acampada e acceso a actividades exclusivas.

A Extranet ofrecerá un programa aberto tanto aos participantes como aos visitantes, con acceso gratuíto os días 9 e 10 de outubro entre as 10.00 e as 20.00 horas. Pola súa banda, os inscritos poderán acceder ao recinto desde as 16.00 horas do 8 de outubro, durante a preparty, e permanecer na Intranet ata o día 11.

O programa combinará formación e entretemento con competicións, obradoiros, actividades deportivas, xogos analóxicos e conferencias arredor das novas tecnoloxías, a intelixencia artificial e o gaming. A edición especial World Champions Edition incorporará tamén propostas vinculadas á temática escollida para este ano.

A XGN Intermax conta novamente co apoio da Xunta de Galicia, a través da Consellería de Cultura, Lingua e Xuventude, e co patrocinio de Intermax Technology.

Logitech G presentou o Yeti 2, a nova xeración do seu coñecido micrófono USB para creadores de contido, podcasters e streamers. Mantén o enfoque multipatrón e plug and play da familia Yeti, pero incorpora un sensor de proximidade intelixente capaz de adaptar automaticamente a captación á posición do usuario.

O sensor tridimensional detecta a posición do locutor e axusta en tempo real parámetros como a ganancia, a ecualización e os patróns de captación. A intención é manter unha voz consistente sen que o usuario teña que modificar manualmente a configuración cando se afasta ou achega ao micrófono.

O Yeti 2 incorpora tamén un sistema de redución de ruído baseado en intelixencia artificial deseñado para separar a voz dos sons ambientais. Esta función compleméntase con Blue VO!CE e co control a través de G HUB, desde onde se poden configurar os parámetros de audio e acceder a perfís creados pola comunidade.

Unha pantalla LED en cor integrada no propio micrófono permite visualizar información sobre a configuración e inclúe unha guía baseada no personaxe de Yeti. O sistema admite ademais a personalización mediante avatares.

O micrófono ofrece gravación a 48 kHz e 24 bits, cunha resposta de frecuencia de 20 Hz a 20 kHz, unha relación sinal/ruído superior a 77 dB e un nivel máximo de presión sonora de 129 dB SPL ao 10 % de distorsión harmónica total. Dispón de conexión USB-C e inclúe un soporte de sobremesa integrado.

O Yeti 2 ten unhas dimensións de 288,97 x 110 x 125,26 milímetros e un peso de 995 gramos. O prezo é de 159,99 euros.

Microsoft presentou dúas novas versións dos seus equipos Surface con procesadores Snapdragon X2 Plus. O Surface Pro de 12 polgadas e o Surface Laptop de 13 polgadas manteñen os formatos lixeiros e sen ventilador das xeracións anteriores, pero incorporan melloras de rendemento, autonomía e procesamento local de intelixencia artificial.

Segundo as probas realizadas por Microsoft, o novo procesador permite obter ata un 17 % máis de rendemento en tarefas de produtividade de Office, máis dun 60 % de incremento no rendemento gráfico e ata un 95 % máis de capacidade para executar modelos de IA localmente mediante a NPU. A eficiencia da batería tamén mellora ata un 18 % respecto das xeracións anteriores con Snapdragon X Plus.

O Surface Pro de 12 polgadas mantén o deseño convertible entre tableta e portátil, cunha pantalla táctil PixelSense de 500 nits que é un 25 % máis brillante. A nova versión incorpora tamén unha carcasa de cor negra e utiliza un 86 % de contido reciclado segundo a metodoloxía indicada por Microsoft. A autonomía en navegación web aumenta nunha hora nas condicións de proba da compañía.

A principal novidade de software é Microsoft Ink Canvas, unha ferramenta orientada ao uso do Surface Slim Pen que combina escritura e debuxo coa IA para realizar tarefas como xerar imaxes, resumir textos ou facer anotacións directamente sobre o lenzo. A aplicación virá instalada no novo Surface Pro e poderá descargarse desde Microsoft Store para outros dispositivos Surface e equipos Windows compatibles a partir do 13 de outubro. As funcións de IA requiren unha subscrición compatible a Microsoft 365.

O Surface Laptop de 13 polgadas conserva o teclado retroiluminado de tamaño completo, o panel táctil de precisión e a pantalla táctil cunha proporción 3:2. O panel alcanza tamén os 500 nits, mentres que a autonomía anunciada chega ás 22,5 horas en reprodución de vídeo local. O equipo estará dispoñible igualmente en negro.

Os dous ordenadores chegarán o 13 de outubro. O Surface Pro de 12 polgadas parte dos 1.259 euros e o Surface Laptop de 13 polgadas dos 1.319 euros.

A presentación inclúe tamén o novo Surface Mouse, que incorpora retroalimentación háptica para proporcionar unha resposta física en accións como facer clic ou colocar elementos na interface. Dispón dun deseño ambidestro, un botón configurable para Copilot e outros accesos directos e conectividade Bluetooth 6.0 para emparellarse con varios dispositivos. O rato estará dispoñible en negro e platino desde o 13 de outubro, cun prezo anunciado de 89,99 euros.

MasMovil estrea Mi WiFi Auxiliar, un servizo de balde que permite manter conectados os dispositivos do fogar cando se produce unha interrupción na conexión fixa. A solución activa en remoto un punto de acceso Wi-Fi no teléfono móbil do cliente e replica nel a rede doméstica, de maneira que televisores, consolas, tabletas ou dispositivos de domótica poden continuar conectados sen necesidade de introducir de novo as credenciais.

O servizo foi desenvolvido por Orange España e conta cunha patente concedida pola Oficina Europea de Patentes. A súa estrea prodúcese inicialmente entre os clientes converxentes de MasMovil que empreguen teléfonos con Android 16 ou posterior, aínda que a previsión é ampliar progresivamente a base de usuarios compatible.

O funcionamento está pensado para automatizar a transición entre a conexión de fibra e a rede móbil. Cando se detecta unha incidencia no servizo fixo, por exemplo por danos na fibra provocados por obras na vía pública ou por fenómenos meteorolóxicos, MasMovil envía un SMS ao cliente para informalo e ofrecerlle a activación de Mi WiFi Auxiliar.

Cunha única acción, o teléfono activa o hotspot utilizando as credenciais do router doméstico e os dispositivos que xa estaban conectados á rede poden conectarse automaticamente ao novo punto de acceso. Deste xeito, non é necesario configurar individualmente cada equipo nin modificar as súas conexións.

A solución tamén contempla a recuperación da conexión fixa. Unha vez restablecido o servizo de fibra, o sistema informa o cliente para que poida volver á configuración habitual.

Rafael Palmar, director de Calidade de Orange España, explica que o obxectivo é ofrecer «unha WiFi alternativa exactamente igual que a que se lle cortou, usando o seu móbil como punto de acceso», mentres que Angélica Sánchez, directora de Oferta Comercial, destaca que a activación automática busca evitar que o cliente teña que intervir durante unha incidencia.

Este sábado 26 de setembro, ás 12:00, A Industriosa (centro de tecnoloxías participativas e maker de Vigo) acollerá a charla Vehículos submarinos: robótica para explorar os océanos.

Durante a sesión as persoas asistentes poderán coñecer o papel dos vehículos acuáticos na monitoraxe mariña e como estas tecnoloxías permiten recoller datos en contornas complexas ou de difícil acceso.

Ademais, contarase cunha demostración en directo dun BlueROV2 a través da cal poderanse ver os seus principais compoñentes de hardware, a arquitectura de software e os sistemas de comunicación e control embarcados.

Tamén se falará do desenvolvemento e das probas virtuais destes vehículos mediante ferramentas de simulación en ROS.

A charla está pensada para profesionais, estudantes e persoas interesadas na robótica, a electrónica, o software, a investigación mariña ou o desenvolvemento de tecnoloxía submarina.

A actividade celebrarase na Asociación Tecnolóxica A Industriosa, na rúa Gregorio Espino 38, entresollado 3, Vigo. A participación é gratuíta. Conta co patrocinio da Xunta de Galicia e da AMTEGA.