España conta xa con seis millóns de usuarios de Wi Fi
 Cada vez é máis habitual nas cidades galegas a seguinte escena: mozo ou moza entra nun café, senta, pide unha consumición e abre un computador portátil. Ofrecer Internet sen fíos, para moitos hostaleiros e clientes, cumpre unha función semellante ós xornais do día postos nun revisteiro. Ou incluso cá tapa ou ración coa que se acompaña unha bebida. E as cifras de usuarios da Rede sen fíos van polo tanto medrando, aínda que a un ritmo máis baixo do que medran noutros países do norte de Europa. Segundo un estudo da empresa IWE-X (visto en Baquia.com), España conta xa cuns seis millóns de internautas que entran no ciberespazo a través de Wi Fi. A “culpa” disto está na meirande oferta de puntos de acceso nas grandes cidades. Como é de agardar, as porcentaxes de usuarios discorren de xeito paralelo ó volume de poboación. Así, Madrid e Barcelona son as que meirande número de usuarios teñen: 805.556 e 708.333, respectivamente, seguidas de Valencia con 319.344, Sevilla con 250.000 e Bilbao con 152.778. Porén, Barcelona é a cidade que conta con máis puntos de conexión (20.610), dos que a gran maioría son privados. Nas cinco cidades devanditas, a taxa de espazos comerciais de conexión que corresponde ós locais da hostalería (bares, hoteis e pubs) sitúase no 52%. O 19% son hot spots do sector servizos, o 17% son espazos ó aire libre e o 12% atópanse nos colexios, institutos e universidades. As porcentaxes das empresas provedoras de servizos tamén son interesantes. Telefónica gaña a partida en Madrid, Sevilla e Valencia. Kubi, pola súa parte, está a deixar fonda pegada en Barcelona. Polo que respecta a Bilbao, os principais operadores son AirBites e Euskatel.
|
