ComputerWorld premia o labor da Consellería de Educación a prol das novas tecnoloxías
 As vías profesionais do futuro pasan todas pola mesma peaxe: a de ter coñecementos sobre as novas tecnoloxías da información. É por iso que na educación dos máis pequenos é cada vez máis frecuente o uso do computador e ferramentas similares. Nesta liña en concreto, un dos centros máis avanzados de Galicia é o de Educación Infantil e Primaria (CEIP) Eugenio López de Cee, onde se levou a cabo un proxecto piloto de modernización que foi recoñecido este xoves co premio da revista ComputerWorld á innovación tecnolóxica. O galardón, que se entregou en Santiago durante o transcurso dun foro organizado pola devandita revista no Hostal dos Reis Católicos, recolleuno o secretario xeral da Consellería de Educación, Néstor Valcárcel, de mans do Conselleiro de Innovación, Juan Rodríguez Yuste (na imaxe). Segundo a revista ComputerWorld, valorouse moi positivamente o compromiso de Educación coa tecnoloxía á hora de conceder o premio. En concreto, a iniciativa de Cee consistiu en incorporar novas ferramentas para mellorar a aprendizaxe, pero tamén a ensinanza, habilitando deste xeito “un vehículo de comunicación para todos os usuarios en igualdade de condicións”. Esta iniciativa sitúase no Proxecto Siega, un plan para conseguir que en Galicia o sistema educativo vaia á mesma velocidade e polos mesmos camiños cá Sociedade da Información.
|
