Galicia é a comunidade española coa menor penetración das TIC
 A enquisa sobre equipamento e uso de tecnoloxías
da información e a comunicación nos fogares do segundo trimestre de 2004
realizada polo INE amosa que Galicia continúa na cola de España no uso das TIC,
aumentando a fenda de separación con respecto ó ano anterior.
Así, só o 38% das vivendas galegas ten algún tipo de ordenador, en contraste co
48,1% da media estatal. En 2003 as porcentaxe eran do 36,4% e o 43,3%
respectivamente, polo que vemos que o ritmo de penetración da tecnoloxía en
Galicia non está á altura do resto da península. Se miramos o número de fogares con conexión á Rede tamén temos un contraste negativo, cun 19,1% en Galicia fronte a unha media nacional do 30,9%. Ademais, a comunidade autónoma de Estremadura incrementou a penetración da Rede nun 5,6%, adiantando a Galicia (que só medrou un 2,2%) e deixándonos outra vez máis no último posto. A nivel estatal, o número de fogares con acceso á Internet incrementou nun millón.
No uso da Internet durante os 3 meses previos á enquisa os resultado galegos foron igual de negativos, cun 29,4% de internautas, mentres que a media estatal anda polo 37,5%.
|
