Moncho Paz xornalista e consultor de xestión de IDOM
Hai uns anos comezábase a falar no mundo empresarial da Xestión do Coñecemento, coa que se daba a coñecer unha corrente encamiñada a implantar no seo das organizacións unha serie de procesos de cambio que se caracterizaban por ser sinxelos e revolucionarios ao mesmo tempo.
O denominado capital intelectual pasaba a considerarse nas empresas coma un activo máis, que tiña como apelidos o coñecemento e a experiencia das persoas. Falouse despóis da xestión por procesos orientada a toda a organización, o que se traducía nun novo xeito de dirixir a empresa para conseguir coa colaboración das persoas a mellora da calidade dos seus servicios, das súas actividades e dos seus obxectivos. Xurdía así a comparación con outros modelos, coma o Modelo Europeo, o Demming ou o Malcom Baldridge, que unificaban criterios e supoñían un recoñecemento público á figura de grandes gurús da disciplina da Calidade.
E hoxe en día, tralos recentes escándalos empresariais que provocaron a urxente necesidade dunha renovación da imaxe corporativa, estamos a vivir na era da Responsabilidade Social, onde o importante é o impacto na sociedade, as comparacións con outras organizacións, a interpretación dos resultados económicos, a transparencia e a honestidade.
Pero todas estas correntes non se poden entender sen a presencia de factores esenciais enfocados directamente á propia persoa, como son a motivación e o compromiso, que coa asunción de responsabilidade e a implicación de todos fan posible a existencia de valores compartidos e favorecen a aparición da cultura da confianza. Agora incídese de xeito moi especial nos elementos físicos e humanos do entorno de traballo, o desenvolvemento de habilidades, a comunicación interna e a importancia das novas tecnoloxías, e tamén na necesidade de medir o impacto de todo isto na conta de resultados das compañías.
Se seguimos avanzando polo camiño que nos leva hacia a consecución do elemento diferenciador que permita acadar o desexado posicionamento competitivo neste mercado global chegamos por fin á Dirección por Valores, coa que as empresas amosan claramente a súa preocupación real pola excelencia individual e o desenvolvemento das carreiras profesionais no marco das propias organizacións, e onde a persoa se prepara para “ser mellor” en tódolos sentidos e “ser capaz” de afrontar novos retos con optimismo, humildade e accesibilidade como principais características da convivencia cotián.
Outros convidados
Moncho Paz Moderador de Xanela Aberta en Código TV
