Pilar Rojo Noguera
Conselleira de Familia, Xuventude, Deporte e Voluntariado
|
O dereito á información
Recentemente púxose
en marcha desde a Dirección Xeral de Xuventude un sistema de envío de
información a través de mensaxes SMS sobre as últimas novidades ou programas
ideados pola Xunta de Galicia en relación coa mocidade.
Non temos outro remedio. Un foro como Xuventude Galicia Net, que en
escasos 33 segundos logra enchar un aforo limitado a 1.500 persoas, supón unha
proba incuestionable da necesidade de adaptación das administracións públicas
aos novos tempos se non queren camiñar por un mundo absolutamente desligado
dunha gran parte da sociedade, a xuventude.
A miúdo achácase aos gobernos a súa impermeabilidade, como se tiveran
interese en pechar todas as súas portas para, cando menos, frear calquera
crítica ao seu traballo ou minimizar a repercusión das actuacións desacertadas.
Sen embargo, o descoñecemento que o público ten das accións gubernativas non
responde por regra xeral a unha intencionada xestión silenciosa, senón que a
Administración amósase en moitos casos incapaz de facer chegar á poboación a
súa realidade. É imposible que unha persoa se interese por un programa ou
proxecto se nunca escoita falar del.
Da distorsión derivada do dereito que ten un administrado a recibir
información e as dificultades que atopamos os responsables de cumprir coa
obriga de facérsela chegar, obviamente non ten responsabilidade o principal
perxudicado, que é o cidadán. Son os gobernos os que deben dotar de accesibilidade
a súa maquinaria para que o público poida coñecer e analizar o seu
funcionamento.
E neste sentido, as novas tecnoloxías, ademais de terse convertido nun
instrumento de enorme calado entre a xuventude, permiten atender esa obriga dun
xeito moito máis directo e universal que cos métodos ata hoxe habituais, como
son os medios de comunicación tradicionais ou a moitas veces incómoda xanela,
aínda que obviamente estes canales vaian continuar sendo imprescindibles.
Desde a Dirección Xeral de Xuventude, en certo modo coa exitosa
experiencia de Xuventude Galicia Net como acicate, estanse a dar pasos,
modestos pero firmes, para que mozos e mozas poidan exercer con todas as
garantías ese dereito a estar permanentemente informados. A constante
actualización da páxina web da Rede de Información Xuvenil (www.rix.org) , o
sistema de alertas por correo electrónico que permiten obter ampla
documentación sobre as nosas actividades e esa nova iniciativa de envío de
mensaxes SMS responden a esta filosofía, como ocurrirá tamén co futuro Inxove,
un organismo que crearemos para que a xuventude dispoña dunha clara referencia
institucional na que verse reflectida.
Todas estas ideas están a ter, ou esperamos que así sexa no caso de
Inxove, unha notable aceptación entre a mocidade. Despois de todo, o acerto de
Xuventude Galicia Net sinalounos un camiño que nós debemos aproveitar e que as
novas xeracións están empeñadas en facer medrar.
|
