Yoigo, a operadora móbil con menos reclamacións a nivel estatal
mércores, 20 de maio do 2015
A Oficina de Atención ao
Usuario de Telecomunicacións (Ministerio de Industria) publicou o
seu informe relativo a 2014 (dispoñíbel
en formato pdf) sobre as operadoras que desenvolven a súa
actividade en España, un informe no que se confirma que de entre
todas as compañías móbiles con presenza no mercado estatal, Yoigo
é a que menos reclamación amoreou. Máis polo miúdo, 1,35 por cada
10.000 abonados. Ademais, Yoigo mellorou o servizo con respecto a
2013, cando o número de reclamacións foi minimamente maior.
Por outra banda e segundo
reflicte a propia compañía a raíz do devandito estudo, a operadora
resultou ser a que fornece o mellor servizo en todas as categorías
nas que se artella o parámetro xenérico da telefonía móbil. Por
exemplo, en acceso a Internet móbil foi obxecto de 0,094
reclamacións por cada 10.000 abonados, en paquetes de voz e datos
móbil obtivo unha taxa de 0,06/10.000 abonados, e en servizos de
atención ao cliente a taxa foi de 0,04.
Segundo fontes da
compañía, a clave deste bo comportamento da mesma a nivel de
atención ao usuario reside, precisamente, en situar “ao cliente
como o factor máis importante para todos os seus departamentos”.
Por iso, explican fontes da empresa, “creamos produtos sinxelos que
se adapten ás necesidades dos usuarios, tentamos comunicalos ben,
sen trampas, despregamos e mantemos unha rede de voz e datos que
cumpra as expectativas dos usuarios, facturamos dunha maneira clara e
sinxela e temos un servizo de atención ao cliente que tenta resolver
con eficacia os problemas dos clientes”.