Televés exporá as súas achegas tecnolóxicas na Broadcast Asia de Singapur
martes, 12 de xuño do 2012
A firma
galega de telecomunicacións Televés, vén de anunciar que estará presente na edición
deste ano da feira Broadcast Asia, a
celebrar en Singapur do vindeiro 19 ao 22 de xuño.
Trátase
dunha cita que, en palabras da xente de Televés, “representa unha plataforma privilexiada para traballar importantes
mercados deste continente”, e xa que logo, a firma galega acode a este
evento coa vista posta en Malasia, Tailandia, Filipinas, Corea, Hong Kong,
Indonesia e no propio Singapur, países nos que a compañía conta cunha
importante presenza dende hai 18 anos, e onde quere manter a súa cota de
mercado.
Televés aposta
forte pola rexión do Sudeste Asiático, onde di colaborar con tódolos
operadores, tanto de televisión por satélite como terrestre, e onde asegura “xogar un papel activo na transición da
tecnoloxía analóxica á dixital”.
Este evento
internacional servirá, entre outras cousas, para que a firma galega expoña os
seus produtos máis estratéxicos nun stand “ben
acubillado” no pavillón de empresas de España.
Entre os
produtos que exporá nesta cita, Televés dedicaralle especial atención ás
cabeceiras T.0X, con software desenvolvido en FPGAs “que garante unha maior flexibilidade para implementar futuras
tecnoloxías”, afirman, así como á gama completa de centrais e
amplificadores de distribución.
Tamén terán especial
protagonismo as solucións para operadores de radiofrecuencia cos últimos
avances en transmisores e gapfillers.