Telefónica achegará en streaming o seu evento compostelán arredor das redes sociais

Telefónica retransmitirá vía streaming o seu encontro empresarial programado para o vindeiro martes, 7 de febreiro a partir das 12.00 horas, no Hostal dos Reis Católicos, ao abeiro da xornada TICs e Social Media: Claves para a Competitividade, dirixida a amosar perante os nosos profesionais as principais vantaxes das ferramentas dixitais de hoxe no camiño do éxito no mercado. Máis polo miúdo, poderemos velo a través de Twitter, coa etiqueta #ticsGal, e máis en Facebook. A xornada, que forma parte dunha iniciativa máis ampla, unha xira que se desenvolve polas principais cidades do Estado, encamíñase a favorecer claves para aumentar a competitividade.
Será inaugurada pola secretaria xeral de Modernización, Mar Pereira, e polo director de Administracións Públicas Norte de Telefónica España, Manuel Ángel Alonso. Tamén contará coa presenza, a apertura, do presidente do Círculo de Empresarios de Galicia, Marcelino Otero. No programa está previsto que interveña, entre outros, o director de Relacións Sectoriais e Territoriais da operadora, Antonio Bengoa, quen fará un percorrido por casos concretos de impacto positivo das novas tecnoloxías e das redes 2.0 nas empresas. Asemade, afondará nos cambios provocados polo afianzamento das TIC e, como consecuencia disto, de como xorden novas oportunidades para os eidos da produtividade e da competitividade. A continuación celebrarase unha mesa redonda na que os responsábeis de algunhas das firmas máis representativas do sector tecnolóxico-dixital galego explicarán cadanseu caso de éxito.
Segundo apunta a operadora española, organizadora do evento, o obxectivo do mesmo é afondar un pouco máis nas ferramentas tecnolóxico-dixitais que as PEME galegas e de todo o conxunto do Estado teñen ao seu dispor para melloraren a súa produtividade e competitividade, “e como internet e a integración das redes sociais na estratexia das empresas estase a converter na clave para ter éxito neste obxectivo, desde unha perspectiva moi práctica”, engaden fontes de Telefónica.