Telefónica achéganos o primeiro móbil con Android, o sistema operativo de Google

Telefónica, nunha das súas moitas accións que a levaron a situarse como a primeira operadora de telecomunicacións de Europa (e terceira do mundo por detrás de China Mobile e AT&T), vén agora de anunciar a disposición do HTC Dream para os seus clientes, o primeiro dispositivo móbil que incorpora o sistema operativo Android™ con aplicacións de Google.
Deste xeito, a compañía española convértese na primeira operadora en traer ao noso país un dispositivo co devandito sistema operativo e ratifica o seu liderado á hora de incorporar ao mercado os teminais móbiles máis avanzados.
O HTC Dream estará dispoñible a partir da vindeira semana por un prezo que oscila entre os 0 e os 179 euros para os clientes que proveñan de outras compañías móbiles, e entre 0 e 299 euros para os actuais clientes de Telefónica que pasen de prepago a contrato.
Tamén estará dispoñible dende 0 euros no programa de puntos, porén os prezos variarán segundo o compromiso de voz e datos que queira contratar o cliente en función da intensidade de uso que vaia ter.
O HTC Dream, fabricado por HTC, conta unha interface divertida e intuitiva con acceso táctil. Dispón dunha brillante pantalla de alta calidade que esbara para mostrar o teclado Qwuerty completo e é ideal para comunicarse en liña ou usando as prestacións de correo electrónico, mensaxería instantánea e móbil das que dispón o teléfono.
Asemade, o terminal conta con acceso ao Android Market™, a tenda virtual na que se poden atopar centos de aplicacións exclusivas para seren descargadas de balde e persoalizar o móbil ao estilo de cada cliente.
O HTC Dream trae instalado de fábrica as máis populares aplicacións de Google, como YouTube, Google Maps e Gmail, a ferramenta de correo electrónico que permite recibir e enviar correos electrónicos automaticamente e en tempo real directamente dende o móbil.
Grazas ás conexións 3G e Wi-Fi deste dispositivo, os usuarios de Telefónica poderán adxuntar e compartir imaxes mediante correo electrónico e mensaxes multimedia (MMS), ou descargar música dende os seus sitios favoritos, así como subir e publicar fotografías no seu blog persoal, manténdose ao día na moderna web 2.0.
Con este lanzamento, os responsables da compañía aseguran “abrir unha fiestra a desenvolvedores, consumidores e empresas, para acelerar a adopción masiva de Internet móbil en España”.
Asemade, como parte dese compromiso de desenvolvemento das telecomunicacións, o lanzamento vén acompañado da 1ª edición do Concurso HTC-MovilForum de Ideas e Desenvolvemento de Aplicaións para Android, que terá lugar entre o 20 e o 21 de maio.