Startup Weekend na Coruña do 24 ao 26 de febreiro
luns, 2 de xaneiro do 2012
Comezamos o ano con novos eventos tecnolóxico-dixitais
á vista, eventos nos que se pon de manifesto a nosa capacidade e as teorías se
converten en práctica, visíbeis e con todo luxo de detalles prácticos. Nesta
liña insírese Startup Weekend, que se vai celebrar en febreiro en Valencia (do
10 ao 12) e máis en Galicia, máis
polo miúdo na Coruña e do 24 ao 26 de febreiro no Centro Ágora. Startup Weekend,
un evento organizado pola plataforma de negocios Internet Business Booster, é
un acontecemento que, na súa arela por acadar o máximo equilibrio entre o
universal e o local, desenvólvese en centos de cidades de todo o mundo cos seus
puntos en común e tamén coas súas particularidades.
O encontro inclúe, no seu formato xeral, 54
horas de actividades para deseñadores, desenvolvadores, promotores,
publicistas, xefes de produto e, en definitiva, seareiros de startups que busquen un espazo común no
que compartir ideas, formar equipos e darlle forma a proxectos de posíbeis
empresas. O formato esténdese ao longo dunha semana, con experiencias prácticas
que serven entre outras cousas para saber se cada startup que se prepara e que se presente pode ter potencialidade de
éxito no futuro.