Sierra leva Geometry Wars a dispositivos móbiles de Apple

xoves, 28 de maio do 2015 Marcus Fernández

Tras grande éxito en consolas dos xogos da saga Geometry Wars, chega hoxe á App Store a un prezo de 4,99 euros o xogo Geometry Wars 3: Dimensions, co que Sierra consegue trasladar a dispositivos móbiles a trepidante acción deste shooter arcade.
O xogo conta con 50 niveis de Aventura cunha grande variedade de formas de cuadrícula 3D, modos de xogo e combates con xefes finais, niveis exclusivos para esta nova versión, 5 niveis de arcade clásico inspirados nas primeiras entregas da franquía, máis de 10 modos de combate, 5 drons de apoio únicos e 5 superhabilidades demoledoras. Tamén é posible competir cos amigos en liña, e anotar en marcadores en liña.
Para achegar uns gráficos de impresión o xogo desenvolveuse cos ferramenta Metal de Apple, presenta controis innovadores dun único toque, é compatible con mandos de xogo de iOS, soporta gardado de partidas en iCloud e logros en Game Center. Todo un imprescindible para os amantes dos shooters arcade, que agora non terán que limitar as súas partidas ao fogar, xa que as consolas e os ordenadores persoais xa non son únicas plataformas nas que é posible gozar de Geometry Wars 3: Dimensions.


Vídeo promocional do novo xogo para iOS

PUBLICIDADE