Segue a dispararse o uso de software libre nas empresas galegas
luns, 1 de xuño do 2015
A
pasada semana AMTEGA (Axencia para a Modernización Tecnolóxica de
Galicia) presentou novos
informes sobre o emprego de programación aberta no noso tecido
produtivo elaborados polo Observatorio para a Sociedade da
Información (OSIMGA). Trátase das investigacións Software
Libre nas pequenas e medianas empresas de Galicia
e Software Libre nas empresas
informáticas de Galicia. Entre
outros datos de interese, neles dise que por primeira vez na
historia, o uso deste tipo de ferramentas nas empresas de todos os
sectores equipárase ao nivel de implantación das mesmas no sector
TIC galego, sendo a taxa de afianzamento do open
source do
84,7%. Nos estudos faise fincapé en que oito de
cada dez empresas de Galicia con 10 ou máis empregados empregan
software libre, o que supón un crecemento de 10,6 puntos porcentuais
respecto ao ano anterior.
No que atinxe ás
empresas con menos de 10 empregados, algo máis da metade usan
programas sen licenzas privadas, o que significa un medre de 6,9
puntos respecto do ano anterior.
Segundo
se sinala nas investigacións, o maior incremento rexístrase sobre
todo nos servidores. Así, explícase, houbo un crecemento de 6,6
puntos porcentuais no uso do sistemas operativos libres nos
servidores acompañado dun descenso de 10,5 puntos porcentuais no uso
de sistemas privativos. Isto tradúcese noutro acontecemento
histórico: por primeira vez a taxa de empresas do sector das TIC con
servidores baseados en ferramentas libres é superior á taxa de
firmas que apostan polos sistemas privados en servidores.
Os programas libres con
maior implantación nas empresas galegas son os navegadores de
Internet e as aplicacións ofimáticas, cun 80,2% e 58,2%
respectivamente no caso das empresas de máis de 10 empregados e un
46,2% e 34,8% respectivamente no caso das microempresas.
No caso
das empresas informáticas, as aplicacións máis usadas son os
navegadores de internet (66,1%), as suites ofimáticas (59,5%) e os
xestores de correo (48,7%).
Asemade, un
60,7% das empresas informáticas galegas que se adican á venda de
produtos de software, ofrecen solucións libres aos seus clientes,
case 10 puntos máis que no ano 2013. O que máis salienta neste
punto é o software para comercio electrónico (8 de cada 10 empresas
que venden produtos de comercio electrónico fano con software libre)
Nos
informes indícase tamén que “as empresas informáticas galegas
perciben os programas abertos como un posíbel nicho de mercado e
máis da metade consideran que aumentarán no mercado no futuro,
presentando unha perspectiva lixeiramente máis optimista que o ano
anterior (aumenta do 51,4% a un 55,1%)”.