Rexistran as sedes españolas de Google ante sospeitas de fraude fiscal

As dúas sedes de Google en Madrid (en Torre Picasso no Campus Madrid da rúa Moreno Nieto) estarían a ser rexistradas por parte da Axencia Tributaria no marco dunha investigación por evasión fiscal e fraude, por sospeitas de que o xigante de Internet non estea a cumprir coas súas obrigas fiscais relativas ao pagamento do IVE que sospeitan que non está a declarar. Algúns medios incluso aseguran que a Garda Civil tería incautado todos os equipos informáticos das oficinas.
Dende Google aseguran estar a colaborar coas autoridades, e tamén afirman que respectan a lexislación fiscal española.
Estamos ante un tipo de investigación que está a replicarse en distintos países europeos, por terse rexistrado un pagamento local de IVE moi reducido nos distintos estados europeos, cando a lexislación actual obriga a que os impostos se paguen no país onde están os clientes, de xeito que o feito de que as operacións de Google en Europa estean radicadas en Irlanda non os eximiría de realizar os pagamentos de IVE establecidos segundo os tipos de cada país comunitario.