Proseguen con normalidade os acendidos dixitais de As Neves e Arbo

A normalidade, segundo informan dende a Secretaría Xeral de Medios, foi a “nota característica” na segunda xornada de apagados analóxicos levada a cabo no día de onte, unha xornada que se inclúe dentro da terceira e última fase de incorporación de Galicia á Televisión Dixital Terrestre. Neste luns procedeuse ao cese de sinal dos emisores analóxicos denominados As Neves e Arbo o que supuxo a incorporación á TDT dos concellos pontevedreses de Arbo, As Neves, Salvaterra, Ponteareas e Salceda de Caselas.
Os apagados, que continuarán ao longo de toda a xornada de hoxe, producíronse sen que se rexistrasen incidencias técnicas salientables e con eles beneficiáronse preto de 50.000 habitantes máis de toda a zona.
Os vindeiros ceses analóxicos desta Área Técnica de Domaio produciranse o vindeiro día 23 deste mes, nos emisores da Cañiza e Carril, correspondentes aos concellos de A Cañiza, Covelo e a unha parte de Vilagarcía de Arousa, o que suporá a incorporación doutros 10.108 habitantes ao novo sistema de televisión dixital.
O seguinte cese nesta Área Técnica producirase o día 24 e afectará aos emisores Meis e Moaña, mentres que os concellos beneficiados serán os de Meis, O Grove, Cambados, Ribadumia, Portas, Barro, Moraña e, parcialmente, o de Moaña, é dicir, 45.507 habitantes máis incorporados á TDT.