Prosegue a conta atrás para o XGN 2011
xoves, 24 de marzo do 2011
A falla de tres
semanas para que dea comezo Xuventude Galicia Net, probablemente a party informática máis importante do
noso país (para sermos exactos, 3 semanas e 1 día), o contador habilitado na web oficial
para levar a conta atrás segue a ser o punto de mira dos milleiros de internautas
que agardan con ansiedade a chegada da fin de semana do 15 ó 17 de abril.
Porén, a parte
dos días que restan para a súa celebración e un enderezo de correo electrónico
para poñerse en contacto coa organización, poucas novidades máis se achegan na
Rede sobre esta party. Xa na anterior
edición, a web oficial presentouse pouco antes do evento, que fora organizado, en palabras dun
blogueiro habitual, “un pouco á
carreira”; “feito que se manifestou durante a realización e que eu, entre
outros, sufrimos”, conclúe.
Aínda así, nas
redes sociais percíbese a impaciencia dos internautas asiduos ao evento
compostelá, o que significa que, entre outras cousas, segue a haber interese e
devezo por compartir, de coñecer e sobre todo, de aprender nos seus relatorios
e obradoiros.
Malia o pouco
tempo que resta para que o contador se poña a cero, o certo é que a comunidade
internauta do noso país non perde de vista as novidades que xorden arredor do
tema, e os que non crearon alertas de aviso automáticas, repasan cada día as
webs relacionadas co evento á procura da boa nova: a apertura dos prazos de
inscrición.