Presentan a plataforma de préstamo de libros electrónicos das bibliotecas públicas galegas
luns, 20 de outubro do 2014
O
conselleiro de Cultura, Educación e Ordenación Universitaria, Xesús Vázquez
Abad, acompañado pola subdirectora xeral de Coordinación Bibliotecaria do
Ministerio de Educación, Cultura e Deporto, Concepción Vilariño, o secretario
xeral de Cultura, Anxo Lorenzo, a director da AMTEGA, Mar Pereira, e a subdirectora
xeral de Bibliotecas da Consellería, Cristina Rubal, presentou
en rolda de prensa o novo programa de préstamo de libro electrónico que pon
a disposición dos usuarios das bibliotecas públicas galegas un nutrido catálogo
de libros e audiolibros en galego e español cun total de 1.710 títulos, 11.100
licenzas e a posibilidade de realizar 277.000 descargas durante as 24 horas do
día os 365 días do ano.
Vázquez Abad salientou que tamén teñen previsto que a colección en liña GaliciaLe “se
vexa ampliada con novas obras e licenzas, así como con álbums ilustrados e un
libro interactivo, o cal suporá unha novidade importante, xa que se trata dunha
oferta de contidos dixitais en galego para os máis pequenos pioneira en España”,
buscando igualmente “contribuír a que ningún de nós perdamos o tren da lectura
dixital”.
Pola súa parte Mar Pereira afirmou que a
Administración galega asumiu hai cinco anos o reto de conseguir que todos os
galegos teñan acceso a uns servizos públicos dixitais de calidade e que
GaliciaLe é unha excelente ferramenta para facilitar o acceso a lectura na nosa
comunidade, na que máis do 22% dos galegos, que compran por Internet,
adquiriron libros revistas e xornais no último ano e preto do 60% prefire
descargar libros electrónicos en vez de recibilos por correo postal, 4 puntos
por riba da media estatal. A directora da AMTEGA sinalou que GaliciaLe é unha
peza nunha estratexia global que, no medio prazo, ten como obxectivo que
Galicia conte cun único sistema de xestión para todas as bibliotecas da
Comunidade e un catálogo único que permita acceder online a todos os fondos
bibliográficos da rede de bibliotecas de Galicia.
Préstamo dixital de balde
Para facer uso deste novo servizo soamente é necesario ter o carné de lector ou
lectora dalgunha das bibliotecas públicas integradas na Rede de Bibliotecas de
Galicia, conexión a internet e rexistrarse na plataforma virtual para obter as
claves de acceso. O usuario poderá tomar en préstamo ata un máximo de dous
libros durante un prazo máximo de 21 días. Se a obra ou obras que se buscan
están prestadas, poderanse solicitar en reserva (ata un máximo de dúas). Unha
vez realizado o préstamo, o usuario poderá optar pola lectura en liña ou
descargar o libro electrónico en dispositivos compatibles: tabletas, teléfonos
móbiles, ordenadores persoais e/ou lectores electrónicos.
A colección está composta por 1.710 títulos que cobren diferentes campos da
cultura e do coñecemento e van dirixidos tanto ao publico adulto como infantil,
estruturados en oito campos: ficción para público adulto, infantil e xuvenil,
ciencia e tecnoloxía, ciencias sociais e humanidades, saúde, desenvolvemento
persoal, ocio, deporte e informática, idiomas, audiolibros, aplicación
interactiva e, proximamente, álbum ilustrado.