Os xogos violentos para as consolas de Nintendo fracasan en vendas

As consolas de videoxogos de Nintendo vense habitualmente coma dispositivos familiares, aptos para todos os públicos, polo que algúns dos últimos lanzamentos dirixidos a maiores de 18 anos resultaron rechamantes pero, pese a conseguir unhas críticas excelentes que os converten case en insignias das súas plataformas, o público non os recibiu ben, o que podería facer perigar futuros xogos semellantes baixo o selo de Nintendo.
A Wii conta xa cun par de títulos violentos que realmente agradan aos hardcore gamers, coma son MadWorld e House of the Dead: Overkill, pero pese a ser un xogos de grande peso, nos seus meses de estrea nos EE.UU. só conseguiron vender 66.000 e 45.000 unidades nos EE.UU., o que sería unha grande decepción (pois nese mercado a Wii conta cun parque de máis de 22 millóns de consolas).

Non estamos a falar dun fracaso dos xogos, pero si dunha acollida moito peor da prevista, o que tamén se fixo notar no Grand Theft Auto: Chinatown Wars, que apareceu coma o primeiro grande títulos adulto para a Nintendo DS, e nos EE.UU. só vendeu no que vai de ano 500.000 copias pese a que as estimacións da súa distribuidora estaba nos 2 millóns de unidades. O mes pasado só colocaron 89.000 unidades, polo que o xogo xa está a esmorecer nas tendas e, aínda que falamos dunhas boas vendas para case calquera outro título, ao estar a falar da primeira entrega da saga de GTA para a consola portátil de Nintendo (cun parque norteamericano de 34 millóns de unidades) o resultado resulta lamentable.
Curiosamente, nin o violentísimo MadWorld (xogo que consiste en matar aos nosos inimigos do xeito máis orixinal posible, camuflando o seu gore cunha aparencia inspirada no cómic Sin City) nin o feito de que en GTA: Chinatown Wars aparecese un mini-xogo consistente en traficar con drogas, causaron unha grande polémica coma outros títulos anteriores, pero o rexeitamento do público estaría presente onde máis doe ás compañías: nas vendas.
Resulta un pouco precipitado chegar a conclusións a partir de tan poucos lanzamentos (aínda que o feito de que esteamos a falar de xogos de altísima calidade os fai máis relevante), pero os desenvolvedores de xogos poderían tomar nota, e considerar que é demasiado arriscado lanzar títulos para maiores de 18 anos para consolas que non parecen orientadas a tal público, de xeito que certos xéneros continúen illados en plataformas como a PlayStation 3 ou a Xbox 360.