Os teléfonos de información sobre a TDT recibiron máis de 7000 chamadas dende a súa posta en marcha

Dende que se iniciaron os apagados dixitais no noso país (co consecuente acendido dixital nos diferentes núcleos) alá polo pasado 18 de xaneiro ata o día 4 deste mes, os teléfonos de información sobre a TDT postos a disposición da cidadanía pola Xunta de Galicia recibiron máis de 7000 consultas, unha cifra que rondou unha media de entre 250 e 300 chamadas diarias, superando nalgunhas xornadas as 500 consultas.
O teléfono da Oficina Técnica da TDT (981 57 21 54) presta atención aos cidadáns, instaladores e concellos sobre todos os aspectos relacionados co proceso de transición á Televisión Dixital Terrestre, igual que o 012, un servizo de atención da Xunta reforzado para servir como punto de información centralizado sobre a TDT, que atende as dúbidas dos usuarios sobre a cobertura da TDT e o satélite en caso de que o precisen. Este teléfono está dispoñible todos os días da semana, incluidos os sábados e os domingos.
O 012 recibiu nas primeiras xornadas de apagado das fases I e II arredor de 1000 chamadas diarias que se foron reducindo de xeito paulatino ata as 150/200 dos últimos de xaneiro, producíndose un repunte o 1 e o 2 de febreiro, días nos que se atenderon 625 e 384 chamadas, respectivamente. Un incremento previsto xa que o primeiro de febreiro o apagado analóxico chegou a preto dun millón de persoas.
Os temas fundamentais das consultas dos cidadáns ao servizo 012 durante o mes de xaneiro centráronse en incidencias de sintonización (no 23 por cento dos casos), normalmente asociadas a non ter adaptada a instalación das antenas colectivas, fallos na orientación cara o mellor centro de difusión ou a necesidade de resintonizar o receptor para recibir todas as canles. Outro 21 por cento das chamadas foron para solicitar información sobre a cobertura da TDT e cal era a orientación cara o centro emisor correcto. Un 18 por cento das cuestións solicitadas referiuse á información sobre as datas de apagado e un 11 por cento a incidencias de cobertura debido a problemas de coberturas parciais (ven unhas cadeas e outras non), avarías nos centros reemisores e dúbidas sobre o satélite. Por último, un 6 por cento das chamadas realizaron consultas sobre as axudas para a dixitalización.
Na Oficina da TDT resolvéronse neste tempo dúbidas semellantes e porcentaxes parecidas. Así un 27 por cento dos cidadáns que chamaron a 981 57 21 54 plantexaron incidencias de cobertura e sintonización, un 15 por cento solicitaron información sobre as zonas de cobertura, un 14 por cento polas zonas de satélite, un 12 por cento tiñan problemas coa instalación de antena, un 7 por cento preguntaron polos trámites para recorrer á instalación do satélite, un 4 por cento pediu información sobre as datas de apagado, a mesma porcentaxe preguntou sobre axudas e un 2 por cento sobre cuestións relacionadas coa instalación.