Os tablets con Android inchan peito no CES de Las Vegas

O Acer Iconia Tab A700 presentouse en Las Vegas, aínda que haberá que agardar ao MWC de Barcelona para saber máis do dispositivo

Este ano no Consumer Electronics Expo (CES) de Las Vegas están a destacar especialmente os tablets co sistema operativo Android 4.0, que parecen quere pórlle as cousas difíciles ao iPad, e que entre outras cousas parecen querer estandarizar os potentes procesadores de 4 núcleos con tecnoloxía nVIDIA Tegra 3 e pantallas de alta resolución como a de 10 polgadas e 1.920 x 1.200 píxeles que presenta o Acer Iconia Tab A700, o que permite a reprodución nativa de contidos de alta definición, colocando nunha pequena pantallas e sen perda de calidade os vídeos que normalmente veriamos nun televisor de salón. No caso do tablet indicado tamén teriamos cámara de 5 Mpíxeles con flash, son Dolby Digital, porto micro-HDMI, lector de tarxetas microSD e batería de 9.800 mAh, aínda que deberemos agardar ao Mobile World Congress de Barcelona para coñecer máis detalles deste impresionante dispositivo que este mesmo mes vai ter un irmán que tamén dará moito que falar, xa que o Acer Iconia Tab A200, armado cun procesador nVIDIA Tegra 2, pantalla de 10,1 polgadas cunha resolución de 1.280 x 800 píxeles e sistema operativo Android 3.2 (actualizable de balde a Android 4.0 a mediados de febreiro), pese a non ser tan potente como o Iconia Tab A700, destacará polo seu prezo axustado de 329,99 dólares (258,05 euros) no seu modelo de 8 Gb e de 349,99 dólares (273,69 euros) para o modelo con 16 Gb de almacenamento interno.

O Lenovo IdeaTab S2 contará cunha base que fai de teclado externo do tablet

Lenovo tamén quixo amosar un interesante tablet con Android 4.0, o Lenovo IdeaTab S2, aínda que conformándose con funcionar cun procesador de dobre núcleo Snapdragon S4 MSM8960, que seguindo a liña do Asus Transformer Prime, contará cunha base con teclado que converterá o dispositivo nunha especie de ordenador portátil, o que mellorará a súa autonomía para achegarse ás 20 horas.
Toshiba, pola súa banda, decidiu presentar o tablet Excite X10, que presume de ser o dispositivo deste tipo máis delgado do mundo (con 7 milímetros de grosor) e con só uns 544 gramos de peso. Ten unha pantalla de 10 polgadas cunha resolución de 1.280 x 800 píxeles, procesador TI OMAP 4420 de dobre núcleo a 1,2 GHz, 1 Gb de RAM, cámaras de 5 e 2 Mpíxeles, micro USB, mini HDMI, lector de microSD e Android 3.2 (actualizable a Android 4.0), aínda que ao chegar ás tendas no primeiro trimestre do ano correo o perigo de quedar curto á hora de ter que baterse cun hipotético iPad 3 (algo que terán máis doado os tablets antes destacados pola súa grande potencia ou por características que van máis aló do seu grosor).